Klei Aê Diê Blŭ: Y‑Mathiơ 14:22-23
Êlan kliăng: “Leh brei phung lu đuĕ wĭt, Ñu đĭ čư̆ hjăn Ñu, čiăng wah lač. Tơl adiê mmăt leh, Ñu dôk hjăn Ñu tinăn.” (Y‑Mathiơ 14:23)
Klei êmuh ksiêm mĭn: Ya Khua Yang Yêsu đĭ čư̆ čiăng ngă? Si ngă Khua Yang Yêsu čiăng wah lač hjăn? Ya klei mtrŭt drei tơdah leh hriăm klei hriăm anei?
Khua ƀĭng kna Y‑Mathiơ brei thâo, “Tơl adiê mmăt leh, Ñu dôk hjăn Ñu tinăn.” (êlan 23). Wưng mmông pia “mmăt leh” jing hlăm brô năm mmông truh kơ dua păn mmông mlam. Êlâo kơnăn Khua Yang Yêsu ngă klei yuôm bhăn bliư̆ kpŭng kơ êbeh êma êbâo čô ƀơ̆ng, ka tĭng ôh phung mniê leh anăn hđeh. Knuih myang Khua Yang bi êdah hŏng bruă ngă klei yuôm bhăn, kyuanăn Ñu amâo čiăng ôh phung ƀuôn sang leh anăn phung ƀĭng kna čhuai thâo săng leh anăn mpŭ čiăng Ñu jing mtao ti lăn ala, kyuanăn Khua Yang brei phung lu đuĕ wĭt leh anăn brei phung ƀĭng kna đĭ čhŏng nao kơ hang nah dih, bi Ñu đĭ čư̆ wah lač hjăn.
Pă hdruôm hră Klei Mrâo Mrang Jăk čih lu blư̆ Khua Yang Yêsu pioh mmông wah lač hjăn hŏng Aê Diê Ama. Mâo đa blư̆ Ñu wah lač ti anăp jih jang mnuih, ƀiădah mâo lu blư̆ Ñu wah lač hjăn hlăm anôk kriêp ñăt. Khua Yang Yêsu jing Aê Diê yơh, ƀiădah tơdah hriê ti lăn ala jing mnuih, Ñu ăt čiăng wah lač bi mguôp hŏng Aê Diê Ama. Klei Aê Diê Blŭ brei thâo anôk Khua Yang Yêsu khăng wah lač hjăn jing ti dlông čư̆ (êlan 23; Y‑Markôs 6:46; Y‑Luk 6:12; Y‑Yôhan 6:15). Čư̆ jing sa anôk kriêp êyăng Khua Yang ruah, Ñu čiăng mâo sa anôk kriêp ñăt pioh wah lač hjăn, čiăng blŭ hrăm hŏng Aê Diê Ama, čiăng mă tŭ ai ktang leh anăn klei ktrâo atăt mơ̆ng Ama êjai wưng trŭn hriê jing mnuih čiăng bi leh hdră bi mtlaih phung mnuih.
Khua ƀĭng kna Y‑Mathiơ amâo brei thâo ôh Khua Yang wah lač kơ ya mta klei, ƀiădah klă nik Khua Yang thâo săng klei čiăng wah lač jing yuôm snăk. Wăt tơdah Ñu jing Aê Diê, Ñu ăt bi hmô kơ drei klei bi mguôp nanao hŏng Ama jing yuôm leh anăn amâo dưi kƀah ôh. Khua Yang Yêsu wah lač nanao leh anăn amâo kĭ kơ̆ ôh. Klei anei mñă leh anăn mtrŭt phung tui hlue Khua Yang brei êpa mhao duah mmông dôk hjăn čiăng bi mguôp hŏng Aê Diê.
Drei mâo klei bi mđĭ ai leh anăn mtrŭt hŏng jih ai tiê wah lač hjăn hŏng Khua Yang. Tơdah Khua Yang jing myang, amâo mâo klei soh ôh ƀiădah wah lač nanao msĕ snăn, hĭn êjai mơh drei jing phung mnuih awăt, amâo klă kluôm brei wah lač lu hĭn êjai. Jing Aê Diê ƀiădah Ñu ăt myơr klei kwưh akâo hŏng jih ai tiê (Y‑Markôs 14:34-36), snăn drei hĭn mơh brei ƀuh klei hur har wah lač jing amâo dưi kƀah ôh tơdah tlă anăp hŏng lu mta klei kƀah leh anăn klei dleh dlan hlăm klei hdĭp grăp hruê. Hŏng tlâo thŭn knŏng đŭt bhiâo ti lăn ala, Khua Yang Yêsu mâo ƀiă snăk mmông čiăng mdei amâodah dôk hjăn hŏng phung ƀĭng kna, ƀiădah Ñu ăt pioh êlâo hĭn mmông bi mguôp hjăn hŏng Aê Diê Ama. Khua Yang brei leh klei bi hmô wah lač. Grăp čô drei brei tui kru jơ̆ng Khua Yang Yêsu hlăm klei wah lač, pioh mmông dôk hjăn msĕ si Khua Yang čiăng wah lač hŏng Ama ti dlông. Brei drei thâo bi ktlah drei pô mơ̆ng klei ngañ bañ leh anăn gun kpăk hlăm klei hdĭp, čiăng duah anôk kriêp ñăt pioh wah lač hjăn.
Si ngă drei khăng pioh mmông dôk hjăn čiăng wah lač hŏng Khua Yang mơ̆?
Wah lač: Ơ Khua Yang, akâo Ih đru kâo thâo tui hlue klei Ih bi hmô hlăm klei mưng wah lač hjăn hŏng Ama. Mñă brei kâo thâo pioh mmông kriêp ñăt hjăn wah lač hŏng Khua Yang nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 40-41
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
