Mathais 14:22-23
Nqe cim:
“Tom qab uas Yexus kom lawv mus tsev tas lawm, nws tib leeg nce mus thov Vajtswv pem roob. Thaum tsaus ntuj lawm nws tseem nyob nws pem roob.” (Mathais 14:23)
Lus nug rau sawvdaws xav:
– Tswv Yexus nce mus pem roob ua dabtsi?
– Vim li cas Nws cheemtsum thov Vajtswv ntsiag to?
– Peb tau txhawb zog li cas thaum kawm dhau zaj kawm no?
Timthawj Mathais qhia paub, “Thaum tsaus ntuj lawm nws tseem nyob nws pem roob.” (nqe 23). Ntu sijhawm uas hais tias “tsaus ntuj” yog ntu sijhawm txij thaum rau sij mus txog cuaj sij tsaus ntuj. Ua ntej ntawd Tswv Yexus ua mov rau tsib txhiab leej noj tsis tau xam pojniam thiab menyuam. Tswv Yexus tus yamntxwv Vajtswv qhia tshwm los ntawm qhov txujci tseemceeb no, yog li Nws tsis xav kom cov pejxeem thiab cov thwjtim totaub yuam kev thiab muab Nws txhawb ua vajntxwv hauv ntiajteb no, yog li ntawd Tswv Yexus tso cov neeg pejxeem mus tsev thiab hais kom cov thwjtim caij nkoj hla hiavtxwv mus rau sab tim ub, tus Tswv txawm nce mus rau saum roob thov Vajtswv ntsiag to. Plaub Phau Txojmoo Zoo sau tseg ntau zaus tias Tswv Yexus siv sijhawm los thov Vaj Leej Txiv. Muaj qee lub sijhawm Nws thov Vajtswv tabmeeg sawvdaws, tiamsis kuj muaj qee lub sijhawm Nws thov Vajtswv ntsiag to ib leeg. Tswv Yexus yog Vajtswv, tiamsis thaum los yug ua neeg, Nws yeej cheemtsum thov Vajtswv txuas lus nrog Leej Txiv. Vajtswv Txojlus qhia paub qhov chaw ntsiag to Tswv Yexus thov Vajtswv yog saum roob (nqe 23; Malakaus 6:46; Lukas 6:12; Yauhas 6:15). Roob yog ib hauv cov chaw ntsiag to uas tus Tswv xaiv, Nws cheemtsum ib qhov chaw ntsiag to thov Vajtswv, nrog Vaj Leej Txiv sib txuas lus, kom tau Leej Txiv lub zog thiab qhia thaum Nws los ua neeg cawm neeg ntiajteb.
Timthawj Mathais tsis qhia paub tias Tswv Yexus thov yam dabtsi, tiamsis Tswv Yexus zeem paub qhov cheemtsum thov Vajtswv tseemceeb heev. Txawm tias Nws yog Vajtswv, los Nws yeej tseem ua qauv qhia rau peb txog txojkev sib txuas nrog Leej Txiv cheemtsum thiab muaj nqis heev. Tswv Yexus niaj hnub thov Vajtswv thiab tsis qaug zog. Qhov no qhia thiab txhawb cov neeg uas nrog tus Tswv mus cheemtsum yuav tau nrhiav sijhawm ntsiag to nrog Vajtswv sib txuas lus.
Peb tau txhawb zog kom kub siab lug thov Vajtswv ntsiag to. Yog tus Tswv dawbhuv, tsis ua txhaum los Nws twb niaj hnub thov Vajtswv li ntawd, hais txog peb yog cov neeg txhaum, qaug zog peb hajyam cheemtsum thov Vajtswv ntau dua. Yog tus Tswv tiamsis Tswv Yexus tseem qhia tej uas Nws lub siab xav tau rau Leej Txiv (Malakaus 14:34-36), yog li mas hajyam cheemtsum rau siab thov Vajtswv thaum peb ntsib raug ntau yam teebmeem thiab kev nyuaj hauv lub neej txhua hnub. Hauv peb xyoos luv luv ntawm tswv Yexus tes hauj lwm hauv ntiajteb no, Tswv Yexus muaj tsawg heev sij hawm los so lossis nrog cov thwjtim nyob tiamsis Nws siv sijhawm tseem ceeb los nyob ntsiag to nrog Leej Txiv. Tus Tswv ua qauv thov Vajtswv rau peb. Peb txhua tus yuav tsum xyaum ua raws li Tswv Yexus ua, siv sijhawm ntsiag to ib yam li Tswv Yexus los thov Vajtswv. Peb cheemtsum paub cais tawm tej chaw neeg coob coob thiab tej haujlwm khwv khwv hauv neej, mus nrhiav qhov chaw ntsiag to thov Vajtswv.
Thov Vajtswv,
Tus Tswv, thov Koj pab kom nyuam yaus paub xyaum ua li Koj tus qauv thov Vajtswv. Thov Koj qhia nyuam yaus paub siv sijhawm tshwjxeeb ntsiag to los thov Vajtswv. Nyuam yuav Tswv Yexus lub npe thov, Amees.
Peb puas pheej siv lub sijhawm ntsiag to los mus thov Vajtswv thiab?
Nyeem Vajluskub hauv peb lub xyoo: Phau Ntawv Nkauj 40-41
Kênh Youtube BHKTHN:
