Klei Aê Diê Blŭ: Y‑Luk 23:33-34
Êlan kliăng: “Yêsu lač, “Ơ Ama, pap brei kơ diñu; kyuadah diñu amâo thâo ôh ya klei diñu ngă.”” (Y‑Luk 23:34a)
Klei êmuh ksiêm mĭn: Ti dlông kyâo bi kal, ya klei Khua Yang Yêsu wah lač brei kơ phung pơ̆ng msei kđĭn Ñu? Ya klei Khua Yang bi hmô mơ̆ng klei wah lač anăn? Hruê anei, si drei tui hriăm mơ̆ng klei Khua Yang bi hmô hlăm klei wah lač?
Pơ̆ng msei kđĭn jing sa klei bi kmhal jhat kjham hĭn hlăm ênuk phung Rôm đưm, kyuadah ngă kơ mnuih arăng bi mdjiê ruă knap tơl hnơ̆ng leh anăn sui hruê mmông êlâo kơ djiê. Ƀiădah hlăm klei ruă knap tơl hnơ̆ng anăn, Khua Yang Yêsu ăt ƀuh leh anăn mâo klei pap kơ pô mrâo pơ̆ng msei kđĭn Ñu, kyuadah diñu amâo thâo ôh ya klei diñu ngă jing soh hŏng Aê Diê, diñu amâo thâo ôh Pô diñu pơ̆ng msei kđĭn anăn jing Anak Aê Diê! Khua Yang myơr leh kơ Ama klei wah lač brei kơ phung pơ̆ng msei kđĭn Ñu, “Ơ Ama pap brei kơ diñu; kyuadah diñu amâo thâo ôh ya klei diñu ngă.”
Khua Yang Yêsu wah lač “Ơ Ama pap brei kơ diñu”, amâo djŏ ôh Khua Yang akâo kơ Ama pap brei amâo mâo hnơ̆ng čuăn kơ phung mnuih soh anei, wăt tơdah diñu amâo mâo kmhal kơ klei soh ôh, ƀiădah tinei Khua Yang akâo kơ Ama pap brei kơ klei mluk mgu diñu kyuadah diñu amâo thâo ôh bruă diñu ngă jing klei soh prŏng prĭn hŏng Aê Diê, hŏng klei anăn diñu dưi mâo hruê mmông leh anăn mmông găl kmhal kơ klei soh čiăng dưi mâo klei bi mtlaih. Mơ̆ng klei wah lač ti dlông kyâo bi kal, Khua Yang Yêsu brei leh kơ phung ƀĭng kna leh anăn phung dôk dlăng ƀuh klă klei Khua Yang mtô brei khăp kơ phung roh leh anăn wah lač brei kơ phung ngă jhat kơ drei (Y‑Mathiơ 5:43-48) amâo djŏ knŏng klei blŭ mang amâodah Khua Yang knŏng mtô kơ phung ƀĭng kna, ƀiădah Khua Yang pô amâo ngă tui si klei Ñu mtô ôh. Klei Khua Yang blŭ kluôm dhuôm nao mbĭt mđrĭng hŏng bruă Ñu ngă. Khua Yang bi êdah klei hdĭp bi hmô djŏ hŏng klei Ñu mtô lač, leh anăn klei bi hmô anei bi hmăi ktang truh kơ khua sang yang Y‑Êtiên. Hlăk êjai ñu dôk ruă knap snăk sơưn kyuadah grăp klŏ boh tâo bi êmut bhĭr ñu, êlâo kơ ñu djiê, ñu čuôn kơŭt wah lač, “Ơ Khua Yang, đăm yap klei soh anei kơ diñu ôh!” (Bruă Phung Khua Ƀĭng Kna 7:60).
Khua Yang Yêsu brei leh sa klei bi hmô wah lač brei drei tui hlue. Tal sa, năng ai hruê anei drei amâo adôk tŭ klei bi kmhal jhat kjham msĕ si phung anak ƀuôn sang Aê Diê hlăm ênuk Phung Sang Aê Diê tal êlâo ôh, ƀiădah lĕ drei ăt adôk hdĭp hlăm klei roh bi kdơ̆ng mơ̆ng lăn ala msĕ si Klei Aê Diê Blŭ hưn êlâo leh hlăm Y‑Yôhan 17:18-26. Wăt snăn dưn mơh, brei drei ăt khăp kơ diñu kyuadah diñu dôk nao hlăm êlan soh jhat. Tui hlue klei Khua Yang bi hmô, brei drei wah lač brei kơ phung bi êmut leh anăn ngă jhat kơ drei, čiăng kơ diñu dưi mâo mmông găl lŏ hdơr wĭt, thâo kral Khua Yang, kmhal kơ klei soh leh anăn mâo klei bi mtlaih. Tal dua, êlâo kơ đĭ wĭt kơ adiê, Khua Yang mtă kơ grăp čô drei brei nao mtô Klei Aê Diê Blŭ kơ mnuih mkăn, boh nik nak kơ phung ka tuôm thâo Khua Yang (Y‑Mathiơ 28:19-20). Brei drei hdơr snei, klei mtô tŭ dưn jing klei mtô nao mđrĭng mbĭt hŏng bruă ngă. Tơdah drei knŏng blŭ ƀiădah amâo ngă ôh, amâodah bruă ngă bi mklăk hŏng klei drei blŭ, snăn jih jang klei drei mtô jing hơăi mang.
Si drei wĭt ngă hŏng klei Khua Yang bi hmô hlăm klei wah lač ti dlông kyâo bi kal?
Wah lač: Ơ Khua Yang, akâo klei khăp Ih bi bŏ hlăm kâo, čiăng kơ klei khăp anăn dlai truh kơ phung bi êmut kơ kâo, bi kdơ̆ng hŏng kâo. Akâo Khua Yang brei kâo khăp leh anăn wah lač brei kơ diñu, msĕ si Khua Yang tuôm wah lač leh kơ phung pơ̆ng msei kđĭn Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
