Lukas 23:33-34
Nqe cim:
“Yexus hais tias, Txiv, thov koj zam txim rau lawv! Rau qhov lawv tsis paub hais tias lawv ua dabtsi.” (Lukas 23:34a)
Lus nug rau sawvdaws xav:
– Saum ntoo khaublig, Tswv Yexus thov Vajtswv rau cov muab Nws ntsia li cas?
– Tus Tswv twb ua qauv li cas ntawm Nws tej lus thov Vajtswv?
– Nimno peb kawm xyaum Tswv Yexus tus qauv thov Vajtswv zoo li cas?
Ntsia saum ntoo khaublig yog txojkev rau txim hnyav kawg nkaus nyob tiam cov neeg Loos kav, rau qhov ua rau tus neeg raug txim hnyav mob kawg nkaus ib lub sijhawm ntev loo mam tuag. Tiamsis thaum raug mob kawg nkaus ntawd, Tswv Yexus tseem ntsia pom thiab ua siab ntev rau cov neeg uas muab Nws ntsia saum ntoo khaublig, rau qhov lawv tsis paub tias Nws yog Vajtswv tus Tub! Tus Tswv tau thov Vajtswv pab rau cov neeg uas muab Nws ntsia saum ntoo khaublig, “Txiv, thov koj zam txim rau lawv! Rau qhov lawv tsis paub hais tias lawv ua dabtsi.”
Tswv Yexus thov Vajtswv “Txiv, thov koj zam txim rau lawv”, tsis yog tus Tswv thov Vajtswv zam txim tsis suav cov neeg txhaum no tej kev txhaum, tiamsis yog thov Leej Txiv zam txim rau qhov uas lawv tsis paub tias lawv tabtom ua kev txhaum loj heev, ua li ntawd kom lawv muaj sijhawm tig los lees txim tau kev cawm dim. Los ntawm cov lus thov Vajtswv saum ntoo khaublig, Tswv Yexus qhia rau cov thwjtim thiab cov neeg ntawd pom hais tias Nws tej lus qhia kom hlub yeebncuab thiab thov Vajtswv pab rau lawv muaj tseeb (Mathais 5:43-48), tsis yog hais lus dawb xwb lossis tus Tswv tsuas qhia nws cov thwjtim tiamsis nws tus kheej tsis ua raws li Nws cov lus qhia. Tswv Yexus tej lus qhia mus raws nraim li Nws lub neej ua. Tus Tswv ua qauv ua tau raws nraim li Nws qhia, thiab tus qauv no Xatefanaus xyaum tau. Thaum nws tabtom raug mob vim luag xuas pobzeb ntaus, ua ntej tuag, Xatefanaus txhos caug thov Vajtswv, “Tus Tswv! Thov koj zam txim rau lawv.” (Tes Haujlwm 7:60).
Tswv Yexus tseg ib tug qauv thov Vajtswv rau peb xyaum ua raws. Thib ib, nimno tej zaum peb yuav tsis raug tej lub txim hnyav zoo li cov ntseeg xubthawj, tiamsis peb tseem ua neej nyob nrog txojkev ua yeebncuab ntawm lub ntiajteb raws li Vajtswv Txojlus qhia hauv Yauhas 17:18-26. Txawm yog li ntawd los, peb yuav tsum hlub lawv vim lawv tabtom yuam kev taug txojkev txhaum. Xyaum Tswv Yexus tus qauv, cia li thov Vajtswv pab rau cov neeg ua yeebncuab thiab tsimtxom peb, kom lawv muaj sijhawm xav, paub txog tus Tswv, lees txim thiab tau cawm dim. Thib ob, ua ntej mus saum ntuj, Tswv Yexus hais kom peb cov ntseeg cia li tawm mus qhia Vajtswv Txojlus rau lwm tus, tshwjxeeb yog cov neeg uas tsis tau paub tus Tswv (Mathais 28:19-20). Yuav tsum nco ntsoov hais tias tej lus qhia muaj qabhau yog qhia thiab ua haujlwm. Yog peb tsuas hais xwb tsis ua li ntawd lossis ua txawv li qhov peb qhia ces yuav tsis muaj qabhau li.
Thov Vajtswv,
Vajtswv, thov Koj txojkev hlub puv npo hauv nyuam yaus thiab cia kom ntws tawm mus rau cov neeg ua yeebncuab, ntxub nyuam yaus. Thov Koj pab kom nyuam yaus paub hlub thiab thov Vajtswv pab lawv zoo ib yam li tus Tswv Koj tau thov Vajtswv thaum Koj raug ntsia saum ntoo khaublig. Tuav Tswv Yexus lub npe thov, Amees.
Peb puas ua li tus Tswv cov lus thov Vajtswv thaum Nws raug ntsia saum ntoo khaublig?
Nyeem Vajluskub hauv peb lub xyoo: I Vajntxwv 3
Kênh Youtube BHKTHN:
