Klei Aê Diê Blŭ: I Têsalônik 5:23-28
Êlan kliăng: “Kyua anăn mă yua bĕ jih mnơ̆ng bi blah Aê Diê brei, čiăng kơ diih dưi bi kdơ̆ng hlăm ênuk jhat, leh anăn tơdah bi blah leh jih, diih srăng ăt dôk kjăp” (Êphêsô 6:13)
Klei êmuh ksiêm mĭn: Klei čih knhal tuč hră brei ƀuh ya klei kơ ai tiê Khua ƀĭng kna Y-Pôl mă bruă kơ Khua Yang? Ñu mñă klă kơ ya klei hlăm klei ñu akâo hlăm êlan 28? Si klei yuôm bhăn klei čih knhal tuč hră anei hŏng klei hdĭp drei?
Klei čih knhal tuč hră I Têsalônik brei ƀuh tlâo mta klei kơ ai tiê mă bruă kơ Khua Yang mơ̆ng Khua ƀĭng kna Y-Pôl. Tal sa, bruă klam Khua ƀĭng kna Y-Pôl jing bruă klam jiă kma hlăm klei wah lač leh anăn wah lač brei. Leh jih ai tiê wah lač kơ phung đăo Têsalônik dưi jing doh jăk kluôm ênŭm (êlan 23-24), ñu akâo “Ơ phung ayŏng adei, wah lač kơ hmei đa” (êlan 25). Pô mă bruă kơ Khua Yang čiăng kơ klei wah lač brei mơ̆ng phung đăo, khădah snăn Khua ƀĭng kna Y-Pôl amâo djŏ knŏng dưi mâo arăng wah lač brei ôh ƀiădah ñu pô bi hmô nanao kơ klei wah lač brei kơ jih jang phung đăo, leh anăn kơh akâo kơ ayŏng adei wah lač brei kơ ñu leh anăn kơ phung khua ƀĭng kna. Jih jang drei mơ̆ng khua pô mtô truh kơ phung đăo čiăng nanao kơ klei ktang mơ̆ng Aê Diê čiăng hrăm mbĭt mkŏ mjing leh anăn mđĭ kyar Sang Aê Diê. Mơ̆ng klei bi wah lač brei, khua pô mtô jih ai tiê wah lač brei kơ phung đăo leh anăn phung đăo mđing uêñ wah lač brei kơ khua pô mtô jing klei găl kơ klei myang Aê Diê mă bruă hlăm bruă klam grăp čô drei. Tal dua, ñu iêô mthưr phung ƀuôn sang Aê Diê brei hdĭp bi khăp hŏng klei sĭt nik. Klei bhiăn hlăk êlâo bi êdah klei khăp hŏng klei čŭm doh jăk, ară anei năng ai drei khăng ƀuh klei bi kmiêk ti êgar Yŭ amâodah mâo lu jing bi mă kiê kngan, hlue si grăp anôk ; ƀiădah hlăm lam ai tiê Khua ƀĭng kna Y-Pôl hŏng jih jang phung ƀuôn sang Ñu amâo lui hlei pô ôh, jing klei khăp sĭt nik hlăm Khua Yang. Bi khăp hdơ̆ng pô brei ƀuh drei dưi lŏ kkiêng mrâo leh anăn thâo kral Aê Diê (I Y-Yôhan 4:7). Tal tlâo, ñu akâo hlăm Anăn Khua Yang dlăng hră anei kơ jih jang phung đăo čiăng diñu thâo leh anăn hdĭp gưt asăp Klei Aê Diê Blŭ mtô.
Klei knhal tuč čih hlăm êlan 28, Khua ƀĭng kna Y-Pôl lŏ mñă wĭt klei wah lač akŏ hră, akâo kơ klei pap Khua Yang Yêsu Krist dôk mbĭt hŏng jih jang ayŏng adei. Klei ñu wah lač mñă kơ klei pap anei kyua anei jing klei brei kơ phung ƀuôn sang Ñu dưi mâo djăp klei pap yuôm bhăn hlăm Krist mơ̆ng adiê.
Phung Sang Aê Diê tlă anăp nanao hŏng klei bi blah hlăm mngăt, mnơ̆ng yua pioh drei bi blah amâo djŏ jing klei thâo hră mơar, hră bi mklă amâodah klei thâo ôh ƀiădah hriê mơ̆ng klei myang Aê Diê (Êphêsô 6:10-20). Jih ai tiê wah lač hdơ̆ng pô, hdĭp mbĭt hŏng klei khăp sĭt nik leh anăn gưt nanao kơ Klei Aê Diê Blŭ mtô jing klei đru drei bi blah leh anăn dưi hŏng klei myang ti lăn ala mmăt tĭt hŏng phung yang jhat mơ̆ng djăp anôk hlăm adiê.
Drei gưt asăp Khua Yang hdĭp bŏ hŏng klei khăp leh anăn bi wah lač brei hdơ̆ng pô mơ̆?
Wah lač: Ơ Khua Yang, kâo thâo pô dôk hdĭp hlăm klei bi blah hlăm mgăt, akâo kơ Ih đru kâo knang kơ klei myang Ih čiăng kâo hdĭp hlue si Klei Aê Diê Blŭ, bi wah lač brei leh anăn bi khăp hdơ̆ng pô. Akâo kơ klei pap êbeh dlai mơ̆ng Ih tuh brei kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
