I Thexalaunikes 5:23-28
Nqe cim:
“Yog li ntawd, nimno nej yuav tsum muab Vajtswv tej cuabyeej los hnav. Yog nej ua li ntawd thaum dab Ntxwgnyoog los tawmtsam nej, nej thiaj kovyeej. Thiab thaum tej kev tawmtsam ntawd dhau lawm, nej thiaj tseem nyob ruaj nrees” (Efexus 6:13).
Lus nug rau sawvdaws xav:
– Tej lus kawg ntawm tsab ntawv qhia pom dabtsi txog Timthawj Paulus nplooj siab ua tus Tswv tes haujlwm?
– Nws hais hnyav txog yam dabtsi nyob hauv lo lus thov Vajtswv ntawm nqe 28?
– Tej lus kawg ntawm tsab ntawv no muaj lub ntsiab licas rau peb lubneej?
Tej lus kawg hauv tsab ntawv I Thexalaunikes qhia pom peb yam txog Timthawj Paulus nplooj siab ua tus Tswv haujlwm. Thib ib, Timthawj Paulus tes haujlwm muaj kev thov Vajswv thiab thov pab lwm tus. Tomqab uas tas siab thov Vajtswv rau cov ntseeg hauv Thexalaunikes tau lubneej dawbhuv kawg nkaus (nqe 23-24), timthawj Paulus thov cov ntseeg hais tias:“Cov kwvtij, nej yuav tsum thov Vajtswv pab peb thiab” (nqe 25). Tus neeg ua Vajtswv haujlwm cheemtsum cov ntseeg thov Vajtswv pab kawg nkaus li, tiamsis Timthawj Paulus tsis yog tsuas thov kom lwm tus thov Vajtswv pab nws xwb, nws ua qauv zoo hauv kev thov Vajtswv sib pab rau cov ntseeg xyaum, tomqab ntawd nws mam hais kom lawv thov Vajtswv pab nws thiab cov uas nrog nws ua haujlwm ua ke. Peb txhua tus txij li xibfwb mus rau cov ntseeg niaj hnub cheemtsum Vajtswv lub zog los txhim kho thiab ua kom Pawg Ntseeg loj hlob. Los ntawm tej lus thov Vajtswv sib pab, xibhwb thov pab cov ntseeg thiab cov ntseeg thov pab xibhwb yog yam pab kom Vajtswv lub hwjchim ua haujlwm hauv peb txhua tus tes haujlwm. Thib ob, Timthawj Paulus nqua hu tus Tswv cov menyuam cia li ua neej sib hlub. Tej kablis kevcai thaum ub qhia tshwm kev hlub los ntawm txoj kevcai nwj uas dawbhuv, niaj hnub nimno nyob ntawm nyias lub tebchaws kev coj, tej zaug yog cov neeg sab Hnub Poob kev sib qawg xubpwg lossis kev nchos tes uas peb pheej pom, tiamsis nyob hauv Timthawj Paulus nplooj siab rau tus Tswv cov menyuam txhua tus, yog txoj kev hlub dawbhuv hauv tus Tswv. Sib hlub qhia tshwm hais tias peb tau yug dua tshiab lawm thiab paub Vajtswv (I Yauhas 4:7). Thib peb, Timthawj Paulus tuav tus Tswv lub npe nkaw lus kom nyeem tsab ntawv no rau txhua tus ntseeg lawv thiaj yuav paub thiab ua lubneej raws li Vajtswv Txojlus qhia.
Tej lus kawg nyob hauv nqe 28, Timthawj Paulus rov hais txog lo lus thov Vajtswv hauv thawj tsab ntawv, uas yog thov kom Tswv Yexus txojkev hlub nyob nrog cov ntseeg txhua tus. Nws lo lus taij thov hais nyhav txog txojkev hlub vim ntawd yog yam uas pab kom tus Tswv cov menyuam txais tau tej koobhmoov saum ntuj los.
Tus Tswv Pawg Ntseeg tus Tswv niaj hnub ntsib pluav rog sab ntsujplig, peb tej cuabyeej ua rog tsis yog kev txawjntse, ntawv povthawj, lossis peb lub zog tiamsis txhua yam yog los ntawm Vajtswv lub hwjchim (Efexus 6:10-20). Tas siab ntsws thov Vajtswv sib pab, ua neej sib hlub thiab ua raws Vajtswv Txojlus qhia yog txoj haukev pab peb tawmtsam thiab kov yeej tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim uas kav tiam tsaus ntuj.
Thov Vajtswv,
Tus Tswv, nyuam yaus paub tias tus kheej tabtom nyob hauv pluav rog sab ntsujplig, thov pab nyuam yaus paub vamkhom Koj lub zog kom ua neej raws Koj Txojlus qhia, thov Vajtswv sib pab thiab sib hlub. Thov Koj txojkev hlub puv npo rau nyuam yaus lubneej. Nyuam yaus tuav Yexus Khetos lub npe thov, Amees.
Peb puas mloog tus Tswv lus ua neej sib hlub thiab thov Vajtswv sib pab lawm?
Nyeem Vajluskub hauv peb lub xyoo: Levis Kevcai 24
Kênh Youtube BHKTHN:
