Klei Aê Diê Blŭ: Y‑Luk 22:39-46
Êlan kliăng: “Tơdah Ñu truh leh kơ anôk anăn, Ñu lač kơ digơ̆, “Wah lač bĕ, čiăng kơ diih amâo lĕ hlăm klei mplư ôh.” (Y‑Luk 22:40)
Klei êmuh ksiêm mĭn: Ya klei kñăm Khua Yang Yêsu iêô mthưr phung ƀĭng kna wah lač? Ya klei hriăm kơ drei mơ̆ng klei Khua Yang Yêsu bi hmô kơ klei wah lač? Si klei drei ƀuăn rơ̆ng djă pioh ai tiê klei mĭn wah lač hlăm thŭn mrâo 2025?
Khua Yang Yêsu nao đĭ čư̆ Ôliwơ tui si klei Ñu khăng ngă, nao ti war djam Gêtsêmanê wah lač êlâo kơ čhuang mŭt hlăm êlan kyâo bi kal čiăng bi leh hdră bruă bi mtlaih phung mnuih. Klei truh prŏng anei jing yuôm bhăn snăk, kyuanăn jih jang pô čih hră čih sơăi hlăm jih pă hdruôm hră Klei Mrâo Mrang Jăk (Y‑Mathiơ 26:36-56; Y‑Markôs 14:32-50; Y‑Yôhan 18:3-11). Rup Khua Yang wah lač leh anăn klei Ñu mtô lač kơ phung anak ƀuôn sang Aê Diê jing klei hriăm yuôm bhăn hlăm klei wah lač.
Êlâo hĭn, phung anak ƀuôn sang Aê Diê brei wah lač hdơ̆ng găp leh anăn kơ hdơ̆ng găp. Khua Yang Yêsu ba leh phung ƀĭng kna nao mbĭt hŏng Ñu leh anăn iêô mthưr diñu wah lač. Klei wah lač jing kliăng pioh đru diñu “amâo lĕ hlăm klei mplư ôh”. Ƀiădah hrô kơ wah lač, phung ƀĭng kna dôk pĭt hĕ, kyua wăt tơdah “Mngăt čiăng snăk, ƀiădah kđeh jing awăt” (Y‑Markôs 14:38). Phung anak ƀuôn sang Aê Diê čiăng snăk mâo klei wah lač hdơ̆ng găp leh anăn brei kơ hdơ̆ng găp, čiăng bi đru hdơ̆ng găp dưi hŏng klei mplư, dưi hĭn hŏng klei awăt hlăm kđeh.
Lŏ čuê, phung anak ƀuôn sang Aê Diê brei wah lač msĕ si Khua Yang Yêsu wah lač leh, “ƀiădah tui si Ih čiăng, amâo djŏ tui si Kâo čiăng ôh!” (êlan 42). Khua Yang akâo mă mđuĕ hĕ atŏ klei knap mñai mơ̆ng Ñu tơdah jih jang klei soh anak mnuih mđua ti dlông Ñu, ƀiădah knŏng tơdah “Ama čiăng”. Kyuanăn, Khua Yang lŏ wah lač: “Amâo djŏ tui si Kâo čiăng ôh”. Khua Yang Yêsu myơr leh klei Ñu hmăng hmưi ƀiădah hŏng klei ƀuăn rơ̆ng ngă tui si klei Ama čiăng.
Knhal tuč, Khua Yang wah lač leh hŏng jih ai tiê. Hlăm klei ênguôt ktrŏ, Ñu wah lač tơl êa kơhŏ Ñu jing msĕ si kdrah êrah prŏng. Khua Yang Yêsu dôk myơr ênông ktrŏ Ñu kơ Aê Diê Ama tơdah tlă anăp hŏng klei djiê Anak Mnuih mbĭt hŏng lu mta klei ƀuh mdê mdê hlăm ai tiê asei mlei. Khua Yang Yêsu, Anak Aê Diê lui leh kơ drei sa klei bi hmô kơ klei wah lač tloh ênoh.
Mŭt hlăm thŭn mrâo 2025, akâo kơ Khua Yang đru grăp čô drei tui hlue klei Khua Yang bi hmô, uêñ mĭn kơ klei wah lač lu hĭn. Drei wah lač brei kơ hdơ̆ng găp, wah lač hdơ̆ng găp čiăng bi đru dưi găn jih jang klei mplư. Akâo kơ Khua Yang brei grăp čô drei mâo klei đăo kjăp kơ Khua Yang, wah lač leh anăn hdĭp tui si klei Khua Yang čiăng grăp hruê. Brei hŏng jih ai tiê, jih ai ktang leh anăn bi hriăm mjuăt pô hlăm klei wah lač. Aê Diê Ama amâo mă mđuĕ hĕ ôh klei lông dlăng mơ̆ng Khua Yang Yêsu ƀiădah brei kơ Ñu klei ktang čiăng dưi tlă anăp leh anăn mâo klei dưi hĭn hŏng klei lông dlăng. Si klei phung dĭng buăl jăk hlăk đưm thiăm leh klei ktang kơ Khua Yang Yêsu, ăt msĕ snăn mơh Yang Mngăt Jăk srăng brei klei pap kơ drei. Brei drei hdơr snei, amâo mâo ôh klei mplư truh êgao hnơ̆ng kơ drei dưi tŭ; Aê Diê jing sĭt suôr, ñu srăng pŏk êlan kơ drei tlaih đuĕ (I Kôrantô 10:13). Dôk kjăp bĕ leh anăn hŏng jih ai tiê wah lač tui si klei Khua Yang Yêsu bi hmô!
Čhuang mŭt hlăm thŭn mrâo 2025, ya klei drei ƀuăn rơ̆ng hŏng Khua Yang tơdah leh ksiêm mĭn klei hriăm anei?
Wah lač: Ơ Ama dôk hlăm adiê dlông, akâo kơ Ama brei kâo mbĭt hŏng ayŏng amai adei jih ai tiê hlăm klei wah lač. Akâo kơ Ama thiăm klei ktang, klei pap kơ hmei dưi găn klei lông dlăng hlăm thŭn mrâo anei leh anăn hdĭp hŏng ai tiê klei mĭn wah lač tui si klei Khua Yang čiăng. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: Klei Mmuñ Hđăp 25-26
Kênh Youtube BHKTHN:
