Lukas 22:39-46
Nqe cim:
“Thaum lawv mus txog ped, Yexus hais rau lawv hais tias, “Nej yuav tsum thov Vajtswv, kev sim siab thiaj yuav los ntxias tsis tau nej” (Lukas 22:40)
Lus nug rau sawvdaws xav:
– Tswv Yexus nqua hu cov thwjtim thov Vajtswv los ntawm homphiaj dab tsi?
– Peb kawm tau dab tsi dhau ntawm Tswv Yexus tus qauv thov Vajtswv?
– Peb coglus yuav ceev kev thov Vajtswv hauv xyoo tshiab 2025 no li cas?
Tswv Yexus mus rau pem Roob Txiv Ntoo Roj li niaj zaus, Nws mus rau hauv lub vaj Khexemanes thov Vajtswv ua ntej uas yuav tuag saum khaublig cawm tibneeg. Qhov xwm txheej no tseemceeb heev thiaj tau cov uas sau plaub phau Moo Zoo puavleej sau tseg (Mathais 26:36-56; Malakaus 14:32-50; Yauhas 18:3-11). Tus duab Tswv Yexus thov Vajtswv thiab Nws tejlus qhia rau cov thwjtim tseg tau ntau zaj kawm muaj nqi heev rau Vajtswv cov menyuam hauv kev thov Vajtswv.
Ua ntej, Vajtswv cov menyuam yuav tsum thov Vajtswv ua ke thiab ib leeg thov Vajtswv pab rau ib leeg. Kev thov Vajtswv yog tus yaum sij pab lawv kom “Kev sim siab thiaj yuav los ntxias tsis tau…”. Tiamsis cov thwjtim tsis thov Vajtswv lawv mus pw tsaug zog vim “Lub siab mas kub lug, tiamsis lub cev qaug zog heev” (Malakaus 14:38). Vajtswv cov menyuam cheemtsum kawg rau kev thov Vajtswv ua ke thiab ib leeg thov Vajtswv rau ib leeg kom sib pab hla dhau kev dag ntxias thiab kovyeej cev nqaij daim tawv uas qaug zog zig no.
Txuas ntxiv, Vajtswv cov menyuam yuav tsum thov Vajtswv li Tswv Yexus tau thov, “Tsis txhob ua raws li kuv lub siab, cia ua raws li koj lub siab!” (Nqe 42 HMOWSV). Tus Tswv thov Vajtswv tshem lub khob uas yog Vajtswv txojkev chim tawm ntawm Nws mus thaum uas tagnrho tibneeg tej kev txhaum puavleej tsuam saum Nws, tiamsis tsuas yog thaum “Leejtxiv pom zoo xwb”. Vim li ntawd Tswv Yexus thov Vajtswv ntxiv: “Tsis txhob ua raws li kuv lub siab”. Tswv Yexus thov yam uas nws tshaw tiamsis coglus ua raws li Leejtxiv siab nyiam.
Thaum kawg, Tswv Yexus siv zog thov Vajtswv. Hauv txoj kev mob, Nws thov Vajtswv mus txog qib uas hws tawm zoo li tej ncos ntshav loj. Tswv Yexus tabtom muab Nws lub nra hnyav qhia rau Leej Txiv thaum uas nws yuav ntsib txoj kev tuag ntawm tibneeg. Tswv Yexus, Vajtswv Leej Tub, tseg tau ib tug qauv zoo kawg nkaus hauv kev thov Vajtswv rau peb.
Hla mus rau xyoo tshiab 2025, thov kom Vajtswv pab peb txhua tus xyaum Tswv Yexus tus qauv, muab siab thov Vajtswv ntau dua. Peb ib leeg thov Vajtswv rau ib leeg, thov Vajtswv ua ke kom sib pab kovyeej txhua yam kev dag ntxias. Thov Vajtswv pab kom peb txhua tus muaj kev ntseeg ruaj khov rau Vajtswv, thov Vajtswv thiab ua neej raws li Vajtswv lub siab nyiam txhua hnub. Cia li tas siab, tas zog tag xyaum muaj tus cai tswj rau kev thov Vajtswv. Vaj Leej Txiv yeej tsis tshem qhov kev sim siab tawm ntawm Tswv Yexus mus, tiamsis Nws pub kom Tswv Yexus muaj zog tiv taus kev sim siab thiab kovyeej. Cov timtswv hnub thaud txhawb Tswv Yexus zog li cas, peb kuj yuav tau Vaj Ntsujplig pub koob hmoov thiab txhawb zog ib yam li ntawd. Cia li nco ntsoov hais tias yeej tsis muaj ib txoj kev sim siab twg yuav hnyav dhau peb lub zog; Vajtswv yog tus uas ncaj ncees Nws yeej yuav qhib kev rau peb tawm (1 Kauleethaus 10:13). Cia li ruaj siab ntseeg thiab tas siab thov Vajtswv raws Tswv Yexus tus qauv!
Thov Vajtswv:
Vajtswv, thov pab nyuam yaus paub thov Vajtswv kawg siab kawg ntsws ib leeg thiab nrog sawdaws. Thov txhawb zog thiab pub koob hmoov rau nyuam yaus kom hla dhau tej kev sim siab hauv lub xyoo tshiab no thiab ua neej paub thov Vajtswv raws li Koj siab nyiam. Nyuam yaus tuav Tswv Yexus Khetos lub npe thov, Amees.
Hla mus rau xyoo tshiab 2025, peb coglus rau Vajtswv yam dabtsi thaum uas kawm dhau zaj kawm no?
Nyeem Vajluskub hauv peb lub xyoo: Phau Ntawv Nkauj 25-26
Kênh Youtube BHKTHN:
