II Samuel 12:13-23
“Đawit khan kơ Nathan: Inh pơm yoch boih hăm Kră Yang. Nathan tơl: Mă-lei Kră Yang sŭt boih tơdrong yoch ih, ih huay kơ lôch ôh.” (II Samuel 12:13)
Nơ̆r jet tơchĕng pơwao:
– Jơhngơ̆m pơtao Đawit thoi yơ kơplah kơtơ̆ng nơ̆r đơ̆ng Nathan ‘bok khan lê̆ adrol chrih kơ pơtao pơm yoch?
– Tơdrong kiơ đei tơbăt pơtao Đawit tơbral tơpă?
– Bơ̆n kăl kơ pơm kiơ wă kơ Kră Yang mơnat kơplah bơ̆n pơm yoch?
Nathan ‘bok khan lê̆ adrol chă trong gơh hơgei wă chrih khan kơ pơtao Đawit pơm yoch tơgar iŏk oei kơ akăn Uri păng pơlôch bơngai, pơtao sư ưh kơ sơngah dah mă ưh kơ đei pơm plơ̆ kơ bơngai mă chrih kơ sư noh ôh, mălei pơtao iŏk đon ala mơ̆ng, băt kơdih sư pơm glăI păng tơ’bôh jơhngơ̆m tơbral ‘bơ̆t anăp Nathan bơngai khan lê̆ adrol khan: “Inh pơm yoch bơih hăm Kră Yang” đơ̆ng tơdrong sư tơbral ‘nâu na đơ̆ng noh pơtao đei chih lăm Hơriso 51, roi tơbăt pơđĭ tơbral, apinh Kră Yang mơnat.
Mă khan, pơtao roi tơdrong yoch păng tơbral đei Kră Yang mơnat ăn, mălei Nathan ‘bok khan lê̆ adrol tơbăt pơtao oei pŭ iŏk dôm tơdrong đêl sư pơm (trong 10-12, 14). Đơ̆ng noh, ‘Bok Kei-Dei pơm kơ kon hơ’lơ̆p pơtao Đawit păng yă Batsêba jĭ trăp. Pơtao mơ̆t tơ lăm phŏng ‘bĭch tơ teh, ơ̆t kơ sŏng sa, krao khan apinh Kră Yang mơnat lăm tơpơh năr, mălei đơ̆ng noh nge noh lôch. Kơplah băt kon nge sư lôch bơih, pơtao Đawit iung đơ̆ng teh, hum hơpĕch, hơmet akâu sư mơ̆t tơ hnam Kră Yang wă kơkuh kơ Sư (trong 20). Pơtao tơbăt kơplah kon nge sư oei arih sư krao khan ơ̆t kơ sŏng sa hơmĕng Kră Yang gô mơnat păng ăn kơ kon nge sư arih mălei dang ei sư lôch bơih lei na pơtao chu kiơ̆ thoi Kră Yang wă păng lui ngeh sư gô tơ’bơ̆p kon sư ning mônh (trong 22-23). ‘Nâu bơih tơ’bôh jơhngơ̆m tơbral tơpă păng chu iŏk dôm tơdrong đơ̆ng Sư pơm.
Pơtao Đawit pơm yoch tih dêh, pơm pơyô kư̆ kă păng pơlôch bơngai. Mălei đơ̆ng rŏng kơ sư băt sư pơm yoch hăm ‘Bok Kei-Dei lei na sư đĭ jơhngơ̆m tơbral păng Kră Yang mơnat kơ sư hloi. Pơtao Đawit đei roi tơdrong đêl sư pơm lăm Hơriso 51:17 “Tơdrong pơm kơ Kră Yang lăp đon Kră Yang ‘Bok Kei-Dei ‘noh jơ̆ jơhngơ̆m pơchah. Ơ Kră Yang ‘Bok Kei-Dei! Jơhngơ̆m tơbral pơchah Ih kư̆m ưh kơ pơdê.”
Rŏ lăng rim ‘nu kơ bơ̆n kư̆m đei pơm yoch hăm Kră Yang. Păng phŏ phŏ Kră Yang yua iŏk lu ‘nhŏng oh bơ̆n wă tơbăt kơ tơdrong yoch bơ̆n. Jơhngơ̆m bơ̆n thoi yơ kơplah bơngai chrih kơ bơ̆n pơm yơch? Jơhngơ̆m bơ̆n tơ’bôh bơ̆n hăm đĭ jơhngơ̆m tơbral tơpă ưh? Apinh Kră Yang tơgŭm bơ̆n băt kơdih bơ̆n pơm yoch ưh kơ weh wer mălei athei roi tơdrong yoch păng ‘maih wă tơbral. Kră Yang pơkă: “Kră Yang khan: Dang ei lu bơ̆n năm bĕ wă kơ pơma pơđâu băl. Mă đơ̆ng tơdrong yoch lu iĕm ‘brê nhen thoi đak thêt gô jing kok thoi đak prĕl. Mă ‘brê gơhieo gô jing kok thoi sŏk triu.” (Êsai 1:18). Ưh kơ đei tơdrong yoch ayơ tih na Kră Yang ưh kơ đei mơnat ôh, dah bơ̆n tơbral đĭ jơhngơ̆m păng krao khan apinh Kră Yang mơnat.
Kơkuh kơ Yang Bơhngol ‘Lơ̆ng, inh bơnê kơ Ih gah nơ̆r Ih pơkă Ih gô mơnat ăn tơdrong yoch tơdah inh tơbral đĭ jơhngơ̆m tơpă. Apinh tơ’blŏk ăn kơ inh, lăp inh đĕch băt inh đei pơm yoch hăm Ih păng tơgŭm inh băt chu iŏk kơdih inh pơm yoch, chu tơbral, roi tơdrong yoch wă iŏk tơdrong mơnat đơ̆ng Ih. Krao khan yua anăn Kră Yang Yêsu Krist, Amen!
Bơ̆n hăm wă chu tơbral tơdrong yoch, tơbral wă kơ gơh iŏk tơdrong Kră Yang mơnat ăn dah ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Yôhan 5
Kênh Youtube BHKTHN:
