Lukas 1:46-50
Nqe cim:
“Vim tej uas Vajtswv tus uas muaj hwjchim loj kawg nkaus tau ua rau kuv lawm. Nws lub npe dawbhuv kawg nkaus; Vajtswv hlub txhua tus uas hwm nws ib tiam dhau ib tiam.” (Lukas 1:49-50)
Lus nug xav:
– Malis qhuas thiab txhawb nqa Vajtswv li cas?
– Nws pom nws tus kheej zoo li cas thaum nyob hauv Vajtswv tus uas muaj hwjchim loj kawg nkaus txhais tes?
– Peb xav li cas txog Vajtswv tus uas muaj hwjchim loj kawg nkaus nyob rau lub caij Koob Tsheej nco txog Tswv Yexus yug xyoo no?
Qhov uas tus ntxhais nkauj xwb Malis xeeb Yexus Khetos yog ib zaj uas tsis yooj yim totaub rau tibneeg, vim li ntawd tus timtswv thiaj qhia ntxiv ib lub cim kom paub tseeb tias “tsis muaj ib yam dabtsi uas Vajtswv yuav ua tsis tau li”, lub cim ntawd yog Malis tus phauj Elixanpes uas ibtxwm xeeb tsis taus tub twb xeeb tub tau rau lub hli lawm (Lukas 1:36-37).
Tom qab ntawd, Malis mus ntsib nws tus phauj Elixanpes, thiab nyob qhov ntawd nws tsa suab hu ib zaj nkauj qhuas Vajtswv, nws pib zaj nkauj los ntawm kev pehawm Vajtswv tagnrho nws tus ntsujplig thiab lub siab. Nws puv npo kev zoo siab thiab ua Vajtswv tsaug rau Vajtswv txojkev hlub, nws thiaj hu nkauj hais tias: “Vajtswv uas yog kuv tus Cawmseej.” Nws paub hais tias nws yog ib tug neeg txhaum uas cheemtsum tau cawmdim los ntawm Vajtswv txojkev hlub (nqe 46-47), thiab nws tsuas yog ib tug ntxhais qhev me me ntawm Vajtswv xwb, tiamsis Vajtswv tus uas muaj hwjchim loj kawg nkaus tseem tig saib nws thiab xaiv siv nws los ua ib txoj haujlwm loj heev rau Vajtswv, uas yog xeeb Tswv Yexus. Qhov no yog ib txoj koob hmoov loj thiab muaj nqis heev uas tsis muaj ib tug pojniam twg tau txais dua li, thiab yog ib zaj txuj ci tseem ceeb heev uas yuav ua rau txhua tiam neeg tom qab qhuas tias nws yog tus pojniam uas tau koob hmoov heev (nqe 48-50).
Zaj nkauj uas Malis hu qhia pom txog kev zoo siab kawg nkaus vim paub tias nws yog ib tug neeg txhaum, ib tug ntxhais qhev me me xwb, tiamsis tseem tau Vajtswv pub txoj koob hmoov loj kawg nkaus li ntawd. Tus uas muaj hwjchim loj kawg nkaus tau ua tej zaj txuj ci tseem ceeb thaum Nws ua tes haujlwm coj txojkev cawmdim los rau ntiajteb, nyob hauv tej haujlwm ntawd, Vajtswv tau siv Malis los xeeb Tswv Yexus. Nyob hauv zaj nkauj hu qhuas Vajtswv, Malis yeej tsis cim civ lees hais tias nws muaj feem hauv kev pab yug Tswv Yexus, tiamsis nws paub tseeb tias nws tsuas yog ib thooj av nplaum nyob hauv tus kws puab av txhais tes xwb, thiab nws txo hwjchim mloog Tus uas muaj hwjchim loj kawg nkaus tej lus. Yog peb hais tias Malis pab coj Tswv Yexus los rau hauv ntiajteb ces peb twb hnov qab hais tias Vajtswv yog tus uas muaj hwjchim loj kawg nkaus lawm. Vajtswv txojkev npaj cawm tibneeg dim yeej zoo tag nrho lawm, txojkev theej txhoj yeej ua tiav hauv Tswv Yexus Khetos lawm, tsis muaj leejtwg muaj cuabkav txhab, ntxiv lossis muaj feem dabtsi li (Loos 3:24).
Xav txog zaj xwm Tswv Yexus los yug, peb lub siab puv npo kev ua Vajtswv tsaug vim Tus uas peb pehawm yog Vajtswv tus uas muaj hwjchim loj kawg nkaus. Ua Vajtswv tsaug vim los ntawm Nws txojkev hlub, Malis thiab peb niaj hnub nimno thiaj tau cawmdim. Thov kom tsis txhob muaj leejtwg khavtheeb xav tias nws muaj tej yam zoo dua lwm tus, tiamsis cia peb txo hwjchim txais txojkev cawmdim uas Vajtswv pub thiab hais rau Tus uas muaj hwjchim loj kawg nkaus ib yam li Malis hais thaum ub hais tias: “Kuv lub siab cia li qhuas tus Tswv; Vajtswv uas yog kuv tus Cawmseej, nws ua rau kuv zoo siab kawg li!” Cia peb xav txog Vajtswv tus uas muaj hwjchim loj kawg nkaus hauv lub caij Koob Tsheej nco txog Tswv Yexus yug xyoo no thiab ua Vajtswv tsaug tag nrho peb lub siab lub ntsws.
Thov Vajtswv,
Tus Tswv, nyuam yaus ua Koj tsaug, Koj yog Tus uas muaj hwjchim loj kawg nkaus, Koj hlub thiab cawm nyuam yaus los ntawm Tswv Yexus kev los yug thiab tuag saum ntoo khaub lig. Thov qhia kom nyuam yaus paub hlub Koj tag nrho lub siab thiab txiav txim siab yuav ua neej rau Koj mus txog hnub kawg. Nyuam yaus tuav Yexus Khetos lub npe thov, Amees.
Peb puas kam tso peb lub neej rau hauv Tus uas muaj hwjchim loj kawg nkaus txhais tes?
Vajluskub hauv peb lub xyoos: Tes Haujlwm 10
Kênh Youtube BHKTHN:
