2 Xwmtxheej Vajntxwv 32:20-23
Nqe cim:
“Hnub uas kuv hu koj pab kuv, kuv cov yeebncuab yuav thim rov qab; kuv paub hais tias Vajtswv tuaj kuv tog” (Ntawv Nkauj 56:9)
Lus nug rau sawvdaws xav:
– Vajntxwv Hexekiyas ua dabtsi thaum uas raug vajntxwv Axilias hem?
– Vajtswv pab cawm cov Yudas li cas?
– Peb ua li cas thaum uas raug luag tsim teebmeem thiab hais phem?
Cov Yudas tabtom raug cov Axilias tuaj tua thiab vij lub nroog Yeluxalees. Cov Axilias tus vajntxwv Xenakhelis tau siv lub tswvyim tawmtsam los ntawm kev xav, siv tej lus hem, sau ntawv tshaj tawm tej lus txob thuam, hais lus tuam mom Vajtswv thiab tej lus dag kom cov Yudas ua xyem xyav thiab poob siab, tsis tso siab rau Vajtswv. Thaum tiv thaiv lub tswvyim phem thiab tej lus hem no, vajntxwv Hexekiyas mus rau hauv tus Tswv lub Tuamtsev muab tsab ntawv yeebncuab sau tuaj hem qhia rau Vajtswv thiab thov Vajtswv mloog tej lus uas txhob thuam Vajtswv. Vajntxwv ntseeg hais tias, Vajtswv yog tus Tswv uas muaj sia nyob, Nws tsis zoo li tej vajtswv uas yog pob ntoo thiab pob zeb ntawm lwm haivneeg uas raug cov Axilias rhuav puastsuaj. Vajntxwv Hexekiyas thov Vajtswv cawm kom lawv dim ntawm cov Axilias tus vajntxwv Xenakhelis txhais tes, kom txhua haivneeg, txhua lub tebchaws paub hais tias, tsuas muaj tus Tswv tib leeg xwb thiaj yog Vajtswv tseeb (saib 2 Vajntxwv 19:14-19).
Thaum uas vajntxwv Hexekiyas thiab tus cevlus Yaxayas thov Vajtswv pab rau tes haujlwm no thiab tig mus rau saum ntuj taij thov, Vajtswv thiaj txib Nws ib tug tub txib los tua cov Axilias tej tubrog, cov nomtswv thiab cov thawjcoj tuag tas rau hauv lawv lub yeej. Thaum uas Xenakhelis pom hais tias, nws cov tubrog tsis muaj zog lawm, cov Axilias tus vajntxwv thiaj rov qab mus rau hauv nws lub tebchaws txajmuag ntsuav vim ua tsis tau dabtsi rau lub nroog Yeluxalees. Tsis yog txajmuag xwb, Xenakhelis tseem raug Vajtswv rau txim thiab. Thaum Xenakhelis mus rau hauv lub tsev teev nws cov vajtswv, nws raug luag muab ntaj tua nws tuag. Tus uas tuam mom Vajtswv thiab hais tias Vajtswv cawm tsis tau Vajtswv haivneeg dim ntawm nws txhais tes, ces nws tus vajtswv cuav yeej cawm tsis tau nws dim ntawm luag tua nws pov tseg!
Yog li ntawd, Vajtswv tau cawm vajntxwv Hexekiyas thiab cov pejxeem hauv Yeluxalees ntawm vajntxwv Xenakhelis txhais tes thiab ntawm txhua tus yeebncuab; Vajtswv qhia paub hais tias Nws yog tus Vajtswv uas muaj hwjchim. Vajntxwv Hexekiyas tau hla dhau kev txajmuag, tsis raug kev quab yuam caij tsuj ntxiv lawm, “txij thaum ntawd los txhua haivneeg thiaj hwm Hexekiyas heev” (nqe 23).
Niaj hnub nim no, dab Ntxwjnyoog kuj siv ntau lub tswvyim phem los tawmtsam Vajtswv cov menyuam sab kev ntseeg zoo ib yam li Hexekiyas thiab cov Yudas hnub thaud. Dab pheej siv tej lus tuam mom Vajtswv, lus hem thiab lus txob thuam los tawm tsam peb sab kom peb ua xyem xyav, yoj yees hauv lub neej ntseeg. Kawm raws Hexekiyas thiab Yaxayas tus qauv, peb tsis ntshai, tsis poob siab vim paub tseeb hais tias, Vajtswv muaj zog dua dab Ntxwjnyoog. Peb tsis sib cav nrog dab Ntxwjnyoog tiamsis cia li coj tej teebmeem ua Dab siv tawm tsam peb los qhia Vajtswv thiab tos Vajtswv pab peb. Thov Vajtswv pab kom peb sawv ruaj hauv kev tso siab rau Vajtswv thiab ntseeg ruaj khov rau Vajtswv ib yam li vajntxwv Daviv tau muaj los lawm: “Hnub uas kuv hu koj pab kuv, kuv cov yeebncuab yuav thim rov qab; Kuv paub hais tias Vajtswv tuaj kuv tog,” (Ntawv Nkauj 56:9).
Thov Vajtswv,
Vajtswv, thaum ua nyuam yaus ntsib teebmeem, thov pab nyuam yaus paub tig los rau ntawm Koj, los thov Koj yog tus uas muaj hwjchim loj kawg nkaus kev pab. Thov pab nyuam yaus tsis cim civ daws teebmeem tiamsis paub ua siab ntev tos Koj ua haujlwm. Nyuam yaus tuav Tswv Yexus Khetos lub npe thov, Amees.
Peb yuav ua li cas thaum ntsib teebmeem tawmtsam peb kev ntseeg?
Nyeem Vajluskub hauv peb lub xyoos: 1 Petus 3
Kênh Youtube BHKTHN:
