Klei Aê Diê Blŭ: II Klei Yăl Dliê 32:20-23
Êlan kliăng: “Tơdah kâo ur krao kơ ih, phung roh kâo srăng kdŭn đuĕ. Klei anei kâo thâo: Aê Diê dôk tĭng kơ kâo” (Klei Mmuñ Hđăp 56:9)
Klei êmuh ksiêm mĭn: Ya klei Mtao Hêsêkia ngă tơdah Mtao Asiri nao blah leh anăn blŭ jhat? Si Aê Diê bi mtlaih leh phung ƀuôn sang Yuđa? Si drei ngă tơdah arăng ngă jhat, blŭ jhat wăt tơdah dôk ngă hlue si Klei Aê Diê Blŭ?
Phung ƀuôn sang Yuđa dôk tuôm hŏng klei phung Asiri nao blah, mŭt hlăm ƀuôn Yêrusalem. Mtao Sênakêrip mơ̆ng Asiri yua leh mnêč bi rŭng hlăm klei mĭn, yua boh blŭ hŏng hră hâo hưn kơ klei blŭ bi kdơ̆ng, ngă mgao, leh anăn klei luar bi kdơ̆ng hŏng Yêhôwa čiăng kơ phung ƀuôn sang luč klei đăo kơ Aê Diê leh anăn tŭ klei amâo lŏ tŭ dưi ôh. Bi kdơ̆ng hŏng mnêč ksŭng ngă leh anăn blŭ jhat anei, Mtao Hêsêkia nao ti Sang Yang Yêhôwa hưn hră anăn ti anăp Aê Diê leh anăn wah lač akâo kơ Aê Diê hmư̆ leh anăn ƀuh klei blŭ mưč mač kơ Ñu. Mtao đăo kơ Ñu jing Aê Diê pô hdĭp, mdê hŏng phung yang rup ngă hŏng kyâo leh anăn boh tâo mơ̆ng dŭm ala čar tŭ klei phung kahan Asiri bi rai leh. Mtao Hêsêkia akâo kơ Aê Diê bi mtlaih diñu mơ̆ng kngan Mtao Sênakêrip, čiăng kơ jih jang phung ƀuôn sang, ala čar thâo knŏng Yêhôwa jing Aê Diê (dlăng II Bruă Mtao 19:14-19).
Tơdah Mtao Hêsêkia leh anăn khua pô hưn êlâo Y-Êsai wah lač kơ bruă anei leh anăn dlăng phă adiê ur krao, Yêhôwa tiŏ nao sa dĭng buăl jăk bi mdjiê jih phung kahan jhŏng ktang, khua kahan leh anăn phung khua mkăn hlăm kđông Asiri. Tơdah ƀuh kahan pô luč jih leh ai ktang, mtao Asiria wĭt mtam kơ ƀuôn pô, hêñ kyua ñu blŭ mgao ƀiădah amâo dưi ngă ôh kơ Yêrusalem. Amâo djŏ knŏng hêñ ôh, Mtao Sênakêrip ăt tŭ klei Aê Diê bi kmhal. Tơdah ñu mŭt hlăm sang yang ñu, đa đa hlăm phung anak êkei ñu pô koh bi mdjiê ñu hŏng đao gưm. Ñu ngă mgao leh anăn lač Aê Diê amâo dưi bi mtlaih ôh phung ƀuôn sang Aê Diê mơ̆ng kngan ñu, snăn mklăk wĭt, yang mgưt mơ̆ng Mtao Sênakêrip amâo dưi bi mtlaih mtao ôh!
Snăn, Aê Diê bi mtlaih leh Mtao Hêsêkia leh anăn phung ƀuôn sang Yêrusalem mơ̆ng kngan mtao Asiri leh anăn djăp phung roh; Ñu bi êdah leh Ñu jing Yêhôwa Aê Diê kyua klei guh kơang Ñu. Mtao Hêsêkia ăt dưi mâo klei dưi bi mklă, amâo lŏ tŭ klei arăng ktư̆ juă ôh ƀiădah “mơ̆ng ênuk anăn kơ anăp, ñu mâo klei mpŭ ti anăp ală jih jang găp djuê mnuih” (êlan 23).
Hruê anei, yang jhat yua lu mnêč ngă kơ klei đăo phung ƀuôn sang Aê Diê msĕ si ngă leh kơ Mtao Hêsêkia leh anăn phung ƀuôn sang Yuđa hlăk đưm. Ñu blŭ lu klei mưč kơ Aê Diê, blŭ jhat, mčeh luar, ngă hŏng hdră čiăng ba klei đing leh anăn bi mgei klei đăo drei. Tui hriăm klei bi hmô mơ̆ng Mtao Hêsêkia leh anăn Khua pô hưn êlâo Y- Êsai, drei amâo huĭ ôh, kăn êdu ai rei kyua thâo Pô dôk mbĭt hŏng drei ktang hĭn kơ yang jhat. Drei amâo blŭ lu ôh hŏng yang jhat ƀiădah brei myơr jih klei mâo kơ Khua Yang leh anăn kăp dlăng Ñu ngă bruă. Akâo kơ Khua Yang đru drei krơ̆ng kjăp ai tiê knang kơ Ñu hŏng klei đăo kjăp msĕ si Mtao Đawit: “Tơdah kâo ur krao kơ ih, phung roh kâo srăng kdŭn đuĕ. Klei anei kâo thâo: Aê Diê dôk tĭng kơ kâo” (Klei Mmuñ Hđăp 56:9)
Si drei ngă tơdah arăng duah klei, blŭ jhat kơ drei?
Wah lač: Ơ Khua Yang, tơdah arăng ngă jhat, akâo kơ Ih đru kâo wah lač nanao wăt tơdah ka ƀuh ôh klei Ih wĭt lač. Akâo kơ Ih đru kâo amâo čŏng msir ôh boh klei mâo ƀiădah jao jih djăp mta klei hlăm kngan myang Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Pêtrôs 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
