Phau Ntawv Nkauj 150:2
Nqe cim:
Cia li qhuas tus Tswv vim tej txujci tseemceeb uas nws ua,
Cia li qhuas nws lub hwjchim uas loj kawg nkaus!.
Lus nug rau sawvdaws xav:
- Tus sau nqe nkauj hais tias vim licas peb yuav tsum pehawm thiab qhuas Vajtswv?
- Paub txog qhov no pab rau peb muaj tus cwjpwm licas thiaj tsimnyog nyob hauv kev pehawm?
Muaj ib txhia yog cov uas ntseeg Vajtswv lawm, tiamsis lawv hnov khwv thaum hais lus ua tus Tswv tsaug thiab pehawm Nws vim nrhiav tsis pom lub vim chiv ua tus Tswv tsaug yog dabtsi. Kuj muaj ib txhia ntseeg, niaj hnub hais lus ua tus Tswv tsaug, tiamsis thaum nug txog qhov keebtiv ua tus Tswv tsaug ces lawv teb tsis tau! Puas yog khwv heev rau peb thaum nrhiav lub vimchiv los ua tsaug thiab pehawm tus Tswv?
Nyob hauv Phau Ntawv Nkauj 150:2 hais tawm ob lub vimchiv ua rau peb txo hwjchim los qhuas tus Tswv. Lub vimchiv xubthawj yog vim “tej txujci tseemceeb uas Nws ua”. Thaum hais txog “tej txujci tseemceeb uas Nws ua” ces peb yuav hnov qab tsis tau Vajtswv tes haujlwm tsim muaj txhua yam. Vajtswv tsimnyog rau peb pehawm vim Nws yog Tus uas Tsim txhua yam thiab peb tib neeg yog yam uas Nws tsim los. Peb tibneeg tsis yog xwbtim muaj, tiamsis yog tau tus Tswv tsim los, yog li ntawd tus uas tseemceeb tshajplaws hauv peb lubneej yuav tsum yog Vajtswv tus uas Tsim txhua yam. “Tej txujci tseemceeb uas Nws ua” tsis yog tsuas qhia tshwm dhau los ntawm tes haujlwm tsim txhua yam xwb, tseem qhia tshwm dhau los ntawm tes haujlwm cawm tibneeg dim ntawm kev txiav txim. Los ntawm qhov uas Tswv Yexus los hnav cev nqaij daim tawv, Vajtswv thiaj los rau hauv keebkwm noobneej zoo li ib tug neeg, raug tuag thiab sawv rov qab los pub kev cawmdim rau tus uas ntseeg Nws. Tsis tas li ntawd xwb, “tej txujci tseemceeb uas Nws ua” tseem tau qhia tshwm dhau los ntawm Vajtswv txojkev ncajncees. Vajtswv lub npe uas siv ntau hauv Phau Ntawv Nkauj yog Yehauvas (lossis tus Tswv), yog lub npe qhia rau peb txog tus Vajtswv Ntawm Tej Lus Cogtseg thiab qhia rau peb hais tias Vajtswv tau hlub tshua thiab ncajncees rau Nws tej lus cogtseg thaum Nws tsomkwm, saibxyuas, tiv thaiv, thiab pub rau peb muaj txaus txhua yam txhua hnub. Nws kuj teb peb tej lus thov thiab hloov peb lubneej kom dawbhuv dhau los ntawm Vaj Ntsujplig tes haujlwm.
Lub vimchiv tim ob uas peb qhuas Vajtswv yog vim “Nws lub hwjchim uas loj kawg nkaus”. Peb qhuas Vajtswv tsis yog tsuas qhuas txog tej haujlwm uas nws tau ua rau peb xwb, tiamsis peb qhuas Nws kuj yog vim Nws tus kheej thiab. Vajtswv yog tus muaj lub zog loj zog nchav, tsis muaj leejtwg zoo cuag Nws (Yelemis 10:6), Nws yog tus Vajntxwv muaj hwjchim, yog Alafas thiab Aumenkas, yog qhov chiv thiab qhov kawg, yog lub hauvpaus ntawm txhua yam.
Los ntawm qhov uas peb yim hnub yim paub tseeb txog tus Tswv yuav coj peb los rau kev pehawm thiab qhuas Nws zoo dua qhov qub, thiab peb yuav paub txog tus Tswv zoo dua qhov qub dhau los ntawm kev kawm Vajluskub. Peb kev pehawm yuav tsum tau Qhov Tseeb coj kev thiab txhawb zog (Yauhas 4:23). Yog li ntawd, peb yuav tsum muaj lub siab nyiam Vajtswv Txojlus, mob siab kawm xyaum thiab txiav txim siab ua raws Vajtswv Txojlus qhia. Yog ua li ntawd, yuav ua rau peb txojkev pehawm Vajtswv mus tob dua qub thiab haum Nws siab.
Peb tabtom ua tus Tswv tsaug thiab pehawm Nws los ntawm lub vim chiv twg?
Thov Vajtswv:
Tus Tswv, nyuam yaus ua Koj tsaug, vim Koj tau cawm nyuam yaus dim, thov pab nyuam yaus yim hnub yim hlub Koj thiab kawm Koj Txojlus, kom xwv nyuam yaus txojkev pehawm haum Koj siab thiab ua rau Koj tau koobmeej. Amees.
Nyeem Vajluskub hauv peb lub xyoo: I.Xwmtxheej Vajntxwv 5:11-6:15
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
