Klei Aê Diê Blŭ: Klei Mmuñ Hđăp 150:2
Êlan kliăng: “Bi mni bĕ kơ Ñu kyua bruă myang Ñu ngă;
bi mni bĕ kơ Ñu tui si klei prŏng êdimi Ñu. ” (Klei Mmuñ Hđăp 150:2)
Klei êmuh ksiêm mĭn: Ya phŭn knhal kơ klei kkuh mpŭ leh anăn mpŭ mni kơ Aê Diê, pô čih bi êdah? Thâo săng klei anei, ya klei đru drei mâo knhuah kkuh mpŭ bi djŏ?
Mâo đa đa phung đăo dleh dlan ha blŭ klei bi mni leh anăn kkuh mpŭ kơ Aê Diê kyua amâo thâo klă sĭt ôh phŭn knhal čiăng bi mni kơ Aê Diê. Tĭng nah mkăn, lu phung đăo blŭ klei bi mni leh anăn kkuh mpŭ kơ Aê Diê, ƀiădah tơdah êmuh phŭn knhal snăn amâo thâo wĭt lač ôh! Djŏ mơh hĕ kyuadah dleh đei duah čiăng ƀuh phŭn knhal bi mni leh anăn kkuh mpŭ kơ Aê Diê?
Hlăm Klei Mmuñ Hđăp 150:2 pô čih bi êdah dua mta phŭn knhal brei bi ti gŭ drei pô čiăng bi mni hơêč hmưi kơ Aê Diê. Phŭn knhal tal êlâo hĭn kyua “bruă myang ñu ngă”. Tơdah lač kơ “bruă myang ñu ngă” sĭt nik drei amâo dưi wơr bĭt ôh klei hrih mjing. Aê Diê năng kơ drei kkuh mpŭ kyuadah Ñu jing Pô hrih mjing leh anăn drei jing mnơ̆ng Ñu hrih mjing. Mnuih amâo djŏ mâo mă hjăn ôh, ƀiădah mơ̆ng Aê Diê hrih mjing, kyuanăn ti krah klei hdĭp drei jing Pô Hrih Mjing yơh. Ti djiêu klei hrih mjing snăn “bruă myang ñu ngă” ăt bi êdah hŏng bruă bi tui mnuih tlaih mơ̆ng klei phat kđi kơ klei soh. Kyua hŏng klei Khua Yang Yêsu hriê jing mnuih yơh Aê Diê mŭt leh hlăm hƀuê ênuk phung mnuih hlăm klei jing sa čô mnuih, tŭ klei djiê leh anăn kbiă lŏ hdĭp čiăng ba klei bi mtlaih kơ hlei pô đăo kơ Ñu. “Bruă myang ñu ngă” ăt bi êdah hlăm klei sĭt suôr Ñu. Anăn Aê Diê kñăm ktang hlăm Klei Mmuñ Hđăp anei jing Yêhôwa, jing anăn pia mñă kơ drei Aê Diê kơ klei Bi Mguôp leh anăn brei drei thâo Aê Diê khăp leh, leh anăn djă pioh klei sĭt suôr Ñu hŏng drei êjai răng kriê, ktrâo atăt, răng mgang, leh anăn thiê brei djăp mta mnơ̆ng yua grăp hruê kơ drei, Ñu ăt wĭt lač kơ klei drei wah lač leh anăn bi doh klei hdĭp drei hŏng bruă Yang Mngăt Jăk.
Phŭn knhal tal dua drei bi mni kơ Aê Diê jing kyua “tui si klei prŏng êdimi ñu”. Drei bi mni kơ Aê Diê amâo djŏ knŏng kyua bruă Ñu ngă kơ drei ôh, ƀiădah wăt kyua Ñu pô. Ñu jing Pô ti dlông hĭn, amâo mâo pô msĕ si Ñu ôh (Y‑Yêrêmi 10:6), Ñu jing Mtao mâo jih klei myang, jing Alpha leh anăn Ômêga, jing mphŭn dơ̆ng leh anăn knhal tuč, jing phŭn kơ jih jang mnơ̆ng.
Mơ̆ng klei thâo kral Khua Yang klă hĭn êjai grăp hruê yơh srăng atăt drei mŭt hlăm klei kkuh mpŭ leh anăn mmuñ bi mni kơ Ñu êlam hĭn, leh anăn drei knŏng dưi thâo kral Khua Yang klă hĭn hŏng klei Ñu bi êdah mơ̆ng Klei Aê Diê Blŭ. Klei drei kkuh mpŭ brei mâo klei ktrâo atăt leh anăn klei mtrŭt mơ̆ng Klei Sĭt Nik (Y‑Yôhan 4:23). Kyuanăn, čiêm rông bĕ ai tiê khăp ciăng kơ Klei Aê Diê Blŭ, kriăng ksiêm hriăm leh anăn khut khat gưt Klei Ñu Blŭ srăng brei klei drei kkuh mpŭ kơ Aê Diê êlam hĭn leh anăn bi mơak kơ Ñu nanao.
Hŏng ya phŭn knhal drei dôk bi mni leh anăn kkuh mpŭ kơ Aê Diê?
Wah lač: Ơ Khua Yang, bi mni kơ Ih bi tui leh kâo, akâo kơ Ih đru kâo grăp hruê khăp kơ Ih leh anăn kơ Klei Ih Blŭ hĭn, čiăng kơ klei kâo kkuh mpŭ kơ Ih dưi bi mơak kơ Ih leh anăn bi guh kơang kơ Anăn Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 5:11 – 6:15
Kênh Youtube BHKTHN:
