II Kevcai 32:48-52
Nqe cim:
“Koj yuav tuaj deb pom lub tebchaws Kana-as xwb, tiamsis koj yuav tsis tau mus nyob lub tebchaws uas kuv yuav muab rau cov Yixalayees.” (II Kevcai 32:52)
Lus nug rau sawvdaws xav:
– Tus Tswv hais kom Mauxes ua dabtsi?
– Qhov uas Mauxes tsis tau mus nyob hauv lub Tebchaws Coglus Tseg qhia tshwm Vajtswv yog Tus zoo licas?
– Peb yuav tsum ua licas kom nrog tus Tswv mus txhua hnub raws nraim li Nws tej lus qhia?
Tomqab uas Mauxes ua tiav tej haujlwm kawg ntawm lub luag haujlwm coj tus Tswv haivneeg, Tus Tswv hais kom nws “nce mus rau saum tej Roob Anpalees, thiab nce mus rau saum lub ncov Roob Nenpaus” kom nws tau saib pom lub tebchaws Kana-as uas tus Tswv coglus pub rau haivneeg Yixalayees lawm. Nrog rau qhov ntawd, tus Tswv kuj qhia rau Mauxes paub ua ntej hais tias nws yuav tuag rau saum lub roob ntawd, zoo ib yam li nws tus tijlaug Aloos tuag rau saum lub roob Haules. Qhov tseemceeb nyob hauv ntu Vajluskub no yog qhov uas Mauxes tsis tau mus nyob hauv lub Tebchaws Coglus Tseg, muaj vimchiv hais tawm tseeb meej thiab ntxaws heev txog qhov no. Muaj coob leej khuvleej rau Mauxes rau qhov tagnrho nws lubneej muab siab npuab tus Tswv, tso txhua yam tseg, mus raws tus Tswv lub suab hu tiamsis tsuas vim ib nyuag qhov kev txhaum hauv tes haujlwm ua rau nws tsis tau mus nyob hauv lub tebchaws tus Tswv coglus tseg.
Kev rau txim uas Vajtswv muab rau Mauxes qhia tshwm Nws txojkev ncaj ncees, tus Tswv tsis vim Mauxes ua tiav haujlwm zoo lossis ua haujlwm khwv es ho zam rau nws tej kev txhaum. Kev rau txim txaus ntshai no kuj ua rau haivneeg Yixalayees tsis mus pe tus thawjcoj loj uas nyob nrog lawv, tiamsis pab lawv zeem paub hais tias Mauxes tsis yog ib tug neeg zoo txaus nkaus. Thiab kuj qhuab ntuas tus Tswv haivneeg yuav tsum muaj tus cwjpwm xyuamxim nyob hauv lubneej ntseeg tus Tswv, tsis txhob ua dog ua dig ib zaug li tabmeeg tus Tswv tej lus qhia. Txawn yog Vajtswv tsis pub Mauxes mus nyob hauv lub Tebchaws Coglus Tseg, los Nws yeej pub kom Mauxes tau tuaj deb saib pom lub tebchaws uas zoo thiab av rog kom pom txog Tus uas nws ua haujlwm rau yog Vajtswv tus uas ncaj ncees, puv npo kev hlub, thiab ua siab ntev mus li. Mauxes mus raws li tus Tswv lub suab hu thiab tau txais nqi zog yog qhov uas haivneeg uas tus Tswv muab cob rau nws tabtom yuav tau txais lub tebchaws zoo qoob loo thiab av rog los ua lawv tug dhau ntawm Yausuas kev coj.
Vajluskub sau txog ntau tug muaj meej hauv sab kev ntseeg los txhawb peb lub zog, tiamsis yeej tsis npog lawv tej kev txhaum, kev qaug, thiab tsis zais tej teebmeem uas lawv raug thaum ua txhaum, Mauxes los kuj zoo ib yam nkaus li ntawd. Zaj xwm hnub no sau tseg qhuab ntuas peb hais tias, peb tsuas yog cov neeg qaug zog, muaj txim tabmeeg tus Tswv xwb. Peb yuav poob rau kev txhaum thaum xav hais tias tus kheej tabtom muaj zog. Txawm tias Vajtswv yog tus muaj kev hlub tshua cov neeg muaj txim zoo li peb, los Nws kuj yog Tus dawbhuv, ncajncees. Vim li ntawd peb txhua tus tsis txhob muaj tus cwjpwm ua saib tsis taus, tiamsis yuav tsum thov Vajtswv thiab cia siab rau Nws txhua lub sijhawm kom tau nrog Nws mus txhua hnub raws li Nws tej lus qhia.
Thov Vajtswv,
Tus Tswv, Koj yog tus puv npo kev hlub, tiamsis kuj yog tus ntxub ntxaug kev txhaum. Thov pab nyuam yaus xyuamxim nyob hauv txhua tes haujlwm hauv lubneej txhua hnub, niaj hnub taij thov thiab ua raws Koj tej lus, kom nyuam yaus muaj lubneej haum Koj siab. Nyuam yaus tuav Yexus Khetos lub npe thov, Amees.
Ntu Vajluskub no ceebtoom peb txog yam dabtsi?
Nyeem Vajluskub hauv peb lub xyoos: II Vajntxwv 16
Kênh Youtube BHKTHN:
