Klei Aê Diê Blŭ: Klei Mtô Mñă Klei Bhiăn 32:48-52
Êlan kliăng: “Wăt tơdah ih srăng dlăng kơ ala čar ti anăp ih, ƀiădah ih amâo dưi nao mŭt ôh hlăm čar kâo brei kơ phung ƀuôn sang Israel.” (Klei Mtô Mñă Klei Bhiăn 32:52)
Klei êmuh ksiêm mĭn: Ya klei Yêhôwa lač kơ Y-Môis ngă? Klei Y-Môis amâo dưi mŭt hlăm Lăn Aê Diê Ƀuăn brei ƀuh si Aê Diê Pô jing? Ya klei brei drei ngă čiăng êbat hŏng Khua Yang grăp hruê hlue si Klei Aê Diê Blŭ mtô?
Leh Y-Môis bi leh dŭm bruă knhal tuč hlăm bruă klam jing pô gĭt gai phung ƀuôn sang Aê Diê, Yêhôwa lač kơ ñu “Đĭ bĕ kơ čư̆ Abarim anei, ti dlông čŏng Nêbô” čiăng ƀuh čar Kanaan Aê Diê brei kơ phung ƀuôn sang Israel jing ngăn dưn. Mbĭt anăn, Ñu ăt hưn êlâo kơ Y-Môis ñu srăng djiê ti čư̆ anăn, msĕ si ayŏng ñu Y-Arôn ăt djiê ti čư̆ Hor. Klei năng mđing hlăm trăn Klei Aê Diê Blŭ anei jing bruă khua gĭt gai Y-Môis amâo dưi mŭt ôh hlăm Lăn Aê Diê Ƀuăn kyua mta phŭn mâo lač leh klă mngač leh anăn ƀhĭ klĭ. Lu mnuih ƀuh pap snăk kơ Y-Môis leh jih klei hdĭp ñu sĭt suôr, săn asei, êbat hlue si asăp Aê Diê iêô ƀiădah kyua sa blư̆ ngă soh hlăm bruă klam anăn amâo dưi mŭt ôh hlăm krĭng Aê Diê ƀuăn.
Klei Aê Diê bi kmhal Y-Môis lač kơ knuih kpă ênô Aê Diê, amâo djŏ ôh kyua klei dleh dlan amâodah boh tŭ ñu ngă leh Aê Diê lui hĕ klei soh ñu ngă. Klei bi kmhal khăng anei ăt đru kơ phung ƀuôn sang Israel đăm ôh mpŭ êgao hnơ̆ng kơ khua gĭt gai ti krah diñu, ƀiădah brei thâo kral Y-Môis amâo djŏ jing mnuih kluôm ênŭm ôh. Mbĭt anăn ăt mñă kơ phung ƀuôn sang Aê Diê brei mâo knuih jăk hlăm klei hdĭp huĭ mpŭ, amâo ngă ngơi mang ôh, wăt tơdah knŏng ƀiă dưn, ti anăp klei bhiăn Aê Diê. Wăt tơdah Aê Diê amâo brei Y-Môis mŭt hlăm Lăn Aê Diê Ƀuăn ôh, ƀiădah Ñu ăt brei Y-Môis ƀuh krĭng lăn jăk siam čiăng ñu ƀuh Pô ñu jih klei hdĭp mă bruă jing Aê Diê sĭt suôr, bŏ hŏng klei pap, leh anăn gĭr truh knhal tuč. Ñu êbat nao hlue si asăp Aê Diê iêô leh anăn dưi ƀuh klei bi êdah kơ êpul ƀuôn sang Aê Diê jao kơ ñu atăt gai dơ̆ng dưi dưn krĭng lăn bŏ hŏng êa ksâo leh anăn êa hnuê ti gŭ klei atăt gai pô lŏ čuê jing Y-Yôsuê.
Klei Aê Diê Blŭ khăng čih lu klei bi hmô kơ phung mâo klei đăo kjăp kñăm mđĭ ai drei, ƀiădah ăt kăn tuôm bi hgăm hĕ ôh klei amâo tŭ jing, klei soh, boh jhat klei soh mơ̆ng lu mnuih, wăt kơ khua kiă kriê Y-Môis. Klei yăl dliê hruê anei čih čiăng mñă kơ jih jang drei knŏng jing phung êdu awăt, soh jhat ti anăp Aê Diê. Drei srăng lĕ êbuh hlăk êjai mĭndah pô ktang hĭn. Wăt tơdah Aê Diê jing Pô mdrŏng hŏng klei pap kơ phung soh jhat msĕ si drei, ƀiădah Ñu ăt jing Pô doh jăk, kpă ênô. Kyua anăn grăp čô drei đăm mâo ôh knuih amâo uêñ, ƀiădah brei wah lač leh anăn knang kơ Aê Diê grăp mmông grăp anôk čiăng kơ grăp hruê êbat hlue si Klei Aê Diê Blŭ mtô.
Ya klei trăn Klei Aê Diê Blŭ anei mñă kơ drei?
Wah lač: Ơ Khua Yang, jing Pô bŏ hŏng klei khăp, ƀiădah ăt jing Pô kpă ênô kơ klei soh anak mnuih. Akâo kơ Ih đru kâo thâo răng nanao hlăm grăp bruă ngă grăp hruê hlăm klei hdĭp, wah lač nanao leh anăn gưt asăp Aê Diê, čiăng mâo knuih hdĭp bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
