Pajlug 25:1-3; Loos 11:33-36
Nqe cim:
“Vajtswv yog tus uas muaj ib puas tsav yam nplua mias! Vajtswv muaj tswvyim thiab kev txawj ntse! Leejtwg thiaj yuav paub Vajtswv lub siab? Leejtwg thiaj yuav totaub tej uas Vajtswv ua? Vajtswv yog tus uas tsim ib puas tsav yam, Vajtswv lub hwjchim tuav ib puas tsav yam thiab ib puas tsav yam ntawd yog Vajtswv li. Thov kom Vajtswv tau koob meej mus ibtxhis li! Amees. (Loos 11:33,36)
Lus nug rau sawvdaws xav:
– Vajtswv lub hwjchim thiab vajntxwv qhia tawm zoo li cas?
– Tus nrim ntawm tibneeg txojkev txawj ntse zoo li cas?
– Yuav ua li cas peb thiaj nrhiav tau Vajtswv txojkev txawj ntse kom peb ua tau neej haum Vajtswv siab?
Vajntxwv Hexekiyas tus neeg twb sau Vajntxwv Xalumoos tej lus qhia rau tej menyuam tom qab. Thaum los ua Vajntxwv kav tebchaws, Xalumoos tau thov Vajtswv pub rau nws muaj tswvyim kav tej pejxeem, vim nws zeem paub tes haujlwm ua thawjcoj tseemceeb heev. (I Vajntxwv 3:8-9). Pajlug qhia paub, qhov zais ntshis ntawm txojkev txawj ntse yog Vajtswv lub tshwjchim thiab hwjchim; tiamsis cov vajntxwv uas muaj hwjchim los ntawm qhov uas nrhiav paub ntawm tej teebmeem tebchaws, tej pejxeem. Hauv nqe 2 muaj qhov kev sib piv hais txog lub zog ntawm txojkev txawj ntse, lub hwjchim saum ntuj uas Vajtswv pub rau cov vajntxwv, thiab tej pejxeem.
Cov vajntxwv tau hwjchim thaum lawv tshawb kawm tej tswvyim ntawm Vajtswv. Qhov kev tshawb kawm no tsis yog vamkhom tej kev ntsib raug lossis kev npluanuj tau, tiamsis yog Vajtswv qhia rau. Vajtswv lub hwjchim zais tej yam uas peb totaub tsis tau txog, tiamsis lub hwjchim ntawm cov vajntxwv yog thaum lawv tau qhia tshwm hauv yam uas peb paub tsis tau txog los. Vajntxwv feem xyuam yog yuav tau nrhiav tswvyim los daws cov pejxeem tej teebmeem, tiamsis vajntxwv yuav hla tsis dhau tus nrim ntawm qhov uas tus Tswv muab zais cia tsis qhia tawm.
Hauv nqe 3 qhia paub tias tsis muaj leejtwg yuav paub tau tej uas cheemtsum paub txog qhov tus Tswv tsim lossis lub hwjchim uas loj kawg nkaus ntawm tus Tswv(Loos 11:33-36), ces kuj tsis muaj leejtwg paub tau cov vajntxwv lub siab. Vajntxwv lub siab tau muab piv siab li nruab ntug, tob li hauv tibtxwv. Kiag vajntxwv los yeej tsis paub txhua yam, nws tus kheej los qee zaus nws twb tsis paub thiab, yog li tej pejxeem yuav ua li cas paub tau tej uas vajntxwv npaj teeb hauv siab.
Timthawj Paulus qhia hais tias peb txhua tus yog Vajtswv tsim, “Vajtswv lub hwjchim tuav ib puas tsav yam thiab ib puas tsav yam ntawd yog Vajtswv li. Thov kom Vajtswv tau koob meej mus ibtxhis li!” (Loos 11:36), yog li ntawd peb tsis yog vamkhom kev txawj ntse, kev paub Vajtswv. Thov Vajtswv pab kom peb cia siab ntsoov rau Nws, ua neej mloog Vajtswv lus thiab mloog tej nomtswv kav tebchaws lus. Qhov tseemceeb dua, Vajtswv cov menyuam yuav tsum rau siab thov Vaj Ntsujplig coj, qhia kom paub Nws tus dej siab, ua neeg txawj ntse, muaj nqis rau tsevneeg, tebchaws thiab ua rau Vajtswv tau ntsejmuag.
Thov Vajtswv,
Vajtswv, nyuam yaus ua Koj tsaug vim Koj yog tus uas tsim txhua yam, tsim neeg thiab cawm neeg. Thov Koj pab kom nyuam yaus niaj hnub hwm Koj lub hwjchim. Thov Vaj Ntsujplig qhia thiab pub kom nyuam yaus ntseeg thiab cia Koj coj nyuamyaus kev ua neej. Nyuam yaus tuav Tswv Yexus lub npe thov. Amees.
Peb nrhiav txojkev txawj ntse zoo li cas hauv kev ua neej txhua hnub?
Nyeem Vajluskub hauv peb lub xyoo: Filemoos
Kênh Youtube BHKTHN:
