Klei Aê Diê Blŭ: Klei Bi Hriêng 25:1-3; Rôm 11:33-36
Êlan kliăng: “Ơ, êlam êdi klei mdrŏng Aê Diê, klei thâo mĭn leh anăn klei thâo săng Ñu! Si dưi mblang klei Ñu phat kđi! Leh anăn si dưi thâo săng klei Ñu ngă! Kyuadah jih jang mnơ̆ng kbiă hriê mơ̆ng Ñu, kyua Ñu, leh anăn kơ Ñu. Pioh kơ Aê Diê yơh klei guh kơang hlŏng lar. Amen” (Rôm 11:33, 36)
Klei êmuh ksiêm mĭn: Si klei guh kơang Aê Diê leh anăn mtao bi êdah? Si klei thâo mĭn mnuih mâo kdriêl? Si ngă drei ngă čiăng dưi mâo klei thâo mĭn mơ̆ng Aê Diê pioh hdĭp bi mơak kơ Ñu?
Dĭng buăl Mtao Hêsêkia lŏ tui čih klei bi hriêng Mtao Salômôn čiăng lui pioh kơ phung ênuk êdei. Tơdah đĭ jing mtao, Mtao Salômôn wah lač akâo kơ Aê Diê brei kơ ñu klei thâo mĭn kyuadah ñu thâo anei jing klei yuôm bhăn êdimima hlăm bruă sa čô khua gĭt gai (I Bruă Mtao 3:8-9). Boh blŭ klei bi hriêng brei ƀuh, mdăp klei thâo mĭn hlăm bruă hrih mjing jing klei guh kơang leh anăn klei myang Aê Diê; ƀiădah phung mtao mâo klei guh kơang hŏng klei ksiêm duah jih jang klei truh kơ ala čar leh anăn phung ƀuôn sang. Klei bi msĕ hlăm êlan 2 kñăm kơ klei djŏ pruê̆ êlan mơ̆ng dlông trŭn ti gŭ hlăm klei thâo mĭn, klei dưi leh anăn klei ktang mơ̆ng Aê Diê, phung mtao leh anăn phung mnuih ƀuôn sang.
Phung mtao mă tŭ klei guh kơang tơdah ƀuh leh jih jang klei Aê Diê mdăp. Klei thâo ƀuh anei amâo djŏ mâo mơ̆ng klei bi knal hlăm klei bi blah amâodah mơ̆ng klei mdrŏng ôh, ƀiădah mơ̆ng klei Aê Diê pô bi êdah brei. Klei guh kơang kơ Aê Diê tơdah Ñu mdăp klei yuôm hgăm, ƀiădah klei guh kơang kơ phung mtao tơdah Aê Diê bi êdah kơ digơ̆ sa hlăm dŭm klei yuôm hgăm anăn. Bruă klam kơ mtao jing duah êlan mgaih mkra hĕ klei dleh dlan phung ƀuôn sang, ƀiădah mtao amâo dưi ngă êgao kơ klei Aê Diê mdăp ôh.
Êlan 3 brei thâo amâo mâo pô dưi thâo săng ôh jih jang klei čiăng thâo kơ klei hrih mjing amâodah kơ klei prŏng Yêhôwa, Pô hrih mjing lăn adiê (Rôm 11:33-36). Msĕ snăn mơh, kăn mâo pô dưi thâo săng rei kơ ai tiê phung mtao. Arăng bi msĕ ai tiê mtao dlông msĕ si phung adiê, êlam msĕ si lăn ala. Wăt mtao pô kăn tuôm thâo săng ênŭm lei kơ djăp mta klei, tơl kơ asei mlei pô phung ƀuôn sang kăn thâo săng klă rei, snăn ƀai êjai hĭn amâo dưi ksiêm kơ hdră mtao mĭn hlăm ai tiê.
Khua ƀĭng kna Y-Pôl lač jih jang drei jing mnơ̆ng Aê Diê hrih mjing sơăi “kyua Ñu, leh anăn kơ Ñu. Pioh kơ Aê Diê yơh klei guh kơang hlŏng lar!” (Rôm 11:36), snăn drei amâo dưi knang kơ klei thâo mĭn, klei bi knal drei pô čiăng thâo săng kơ Aê Diê ôh. Kyuanăn, akâo bĕ kơ Aê Diê đru drei knang kơ Ñu hŏng jih ai tiê, hdĭp hlăm klei gưt kơ klei dưi Ñu leh anăn gưt kơ klei dưi phung khua gĭt gai ala čar Aê Diê mjing leh. Yuôm hĭn kơ jih jang, brei phung anak ƀuôn sang Aê Diê wah lač hŏng jih ai tiê akâo kơ Yang Mngăt Jăk atăt gai, mtô, bi hriăm čiăng thâo klei Aê Diê čiăng, hdĭp hŏng klei thâo mĭn, mâo klei tŭ dưn kơ gŏ sang, kơ phung riêng gah leh anăn bi guh kơang kơ Anăn Khua Yang.
Si drei duah klei thâo mĭn hlăm klei hdĭp grăp hruê?
Wah lač: Ơ Khua Yang, kâo bi mni kơ Ih kyuadah Ih hrih mjing leh lăn adiê, hrih mjing kâo leh anăn bi tui kâo. Akâo Khua Yang đru kâo gưt nanao kơ klei dưi Khua Yang. Akâo Yang Mngăt Jăk bi hriăm kâo leh anăn brei kơ kâo mâo klei đăo, duah nanao klei atăt gai mơ̆ng Ih hlăm klei hdĭp grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Philêmôn
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
