2 Xwmtxheej Vajntxwv 7:11-15
Nqe cim:
“Yog lawv thov kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua.” (2 Xwmtxheej Vajntxwv 7:14)
Lus nug rau sawvdaws xav:
– Vajtswv tshwm rau Xalumoos thiab ntuas txog yam tseemceeb twg rau vajntxwv thiab lub tebchaws?
– Yam twg qhia pom Vajtswv yog Tus muaj lub siab ntev thiab npluamias kev hlub?
– Peb, tsev neeg, thiab pawg ntseeg cheemtsum muaj tus cwjpwm li cas thaum ntsib kev txomnyem?
Tom qab uas vajntxwv Xalumoos ua tiav lub tuamtsev thiab fij rau Vajtswv lawm, kiag rau hmo ntawd, Vajtswv tshwm rau Xalumoos zaum tim ob (1 Vajntxwv 9:2) tus Tswv hais tias “Kuv twb hnov koj tej lus thov” thiab Nws xaiv lub Tuamtsev no “ua qhov chaw fij khoom”. Tus Tswv zoo siab thiab txais yuav vajntxwv tej lus thov “hluavtaws txawm poob saum ntuj los” (2 Xwmtsheej Vajntxwv 7:1). Hnub no, tom qab 30 xyoo, tus Tswv rov hais dua tias Vajtswv tau xaiv lub Tuamtsev hauv Yeluxalees no ua qhov chaw fij khoom kom Nws tshwm los nyob hauv lawv.
Tsis tas li ntawd, tus Tswv thiab Xalumoos tsis yog sib ntsib ntsiag to xwb, tiamsis tus Tswv tseem ntuas hais tias lubtebchaws tabtom nyob qib uas vammeej, vajntxwv yuavtsum ua zoo qhia tus Tswv haivneeg, vim tus Tswv hu lawv hais tias “kuv haiv neeg uas luag hu raws li kuv lub npe” (HMOWSV) yog li ntawd tsis txhob hnov qab Vajtswv ho mus caum luag tej vajtswv. Yuavtsum tas siab thov Vajtswv, thov Vajtswv rau txhua yam, yog tsis ua li ntawd koob hmoov yuav dhau los ua kev puastsuaj. Tus Tswv yog Tus dawbhuv, vim li ntawd thaum Vajtswv haivneeg ua txhaum, Vajtswv yuav pom zoo tso tej kev puastsuag xwsli ntuj qhuav, kooj txomfav, muaj kev mob nkeeg los ceebtoom lawv. Tiamsis Vajtswv yog tus muaj kev hlub npluamias, Nws yeej yuav zam txim thiab cawm lawv dim ntawm tej kev puastsuaj ntawd. Vim li ntawd, txawm yuav muaj kev puastsuaj dab tsi tshwm tuaj los tus uas yog Vajtswv tug yuavtsum paub hais tias Vajtswv hlub Nws haivneeg pub sijhawm rau lawv tso kev txhaum tseg, txo hwjchim, thov Vajtswv thiab nrhiav Nws. Vajtswv yeej mloog thiab teb tej lus thov ntawm tus neeg uas lees txim thiab hloov siab.
Cov ntseeg niaj hnub nim no tau sib txuas kiag ncaj nraim mus rau ntawm Vajtswv los ntawm Tswv Yexus kev tuag theej txhoj saum ntoo khaublig. Peb txhua tus lub neej puavleej yog Vajtswv lub tuamtsev, muaj Vaj Ntsujplig nyob hauv tswj kav. Peb kuj tau Vajtswv pub li no “nej yog haivneeg uas Vajtswv twb xaiv cia lawm, nej yog cov povthawj uas ua Vajtswv txoj haujlwm, nej yog haivneeg uas dawbhuv” (1 Petus 2:9). Peb yog Vajtswv haivneeg peb txais tau Vajtswv lolus cogtseg txog kev zam txim thiab kev pab cawm thaum ntsib kev txomnyem sim siab yog peb paub “txo hwjchim thiab taij thov thiab nrhiav Vajtswv thiab tig ntawm peb tej kev txhaum Vajtswv yuav nyob saum ntuj mloog thiab yuav zam peb lub txim”. Thov Vajtswv pab kom peb txhua tus thov Vajtswv kawg siab ntsws thiab txawj txhawb lwm tus paub nrhiav thiab thov Vajtswv.
Thov Vajtswv,
Tus Tswv, thov pab kom nyuam yaus paub txo hwjchim, lees txim, paub thov Koj zam txim thiab pab cawm thaum raug kev txomnyem. Thiab thov pab kom nyuam yaus paub txhawb lwm tus zog tsis hais hauv tsevneeg thiab Pawg Ntseeg. Nyuam yaus tuav Yexus Khetos lub npe thov, Amees.
Thaum ntsib kev txomnyem, sim siab peb thiab Pawg Ntseeg puas txo hwjchim, puas thov Vajtswv, nrhiav Vajtswv thiab lees txim?
Nyeem Vajluskub hauv peb lub xyoo: 2 Xamuyees 6
Kênh Youtube BHKTHN:
