Klei Aê Diê Blŭ: II Klei Yăl Dliê 7:11-15
Êlan kliăng: “Tơdah phung ƀuôn sang Kâo arăng pia hŏng anăn Kâo bi luă gŭ diñu pô, wah lač leh anăn duah ƀô̆ mta Kâo, leh anăn lui êlan soh diñu, hlăk anăn Kâo srăng hmư̆ mơ̆ng adiê, pap brei klei soh diñu, leh anăn bi hlao čar diñu” (II Klei Yăl Dliê 7:14)
Klei êmuh ksiêm mĭn: Aê Diê bi êdah kơ Mtao Salômôn čiăng lŏ bi hdơr ya klei yuôm bhăn kơ ñu pô leh anăn kơ lăn čar?Ti mta brei ƀuh Aê Diê jing Pô jăk leh anăn bŏ hŏng klei pap? Si brei drei, gŏ sang drei leh anăn Phung Sang Aê Diê ngă tơdah mâo klei knap mñai?
Tơdah Mtao Salômôn ruê̆ leh mdơ̆ng sang Aê Diê leh anăn ngă klei myơr hŏng klei bi kƀĭn prŏng, mlam anăn mtam, Aê Diê bi êdah kơ ñu tal dua (I Bruă Mtao 9:2). Aê Diê lač, “Kâo hmư̆ leh klei ih wah lač”, leh anăn Ñu ruah leh Sang kkuh mpŭ anei jing “sang kơ bruă ngă yang”, čiăng lač jing sang pioh myơr mnơ̆ng ngă yang kơ Aê Diê. Aê Diê bi êdah klei Ñu mơak leh anăn hmư̆ leh klei Y‑Salômôn wah lač hŏng klei brei “pui trŭn mơ̆ng adiê” (II Klei Yăl Dliê 7:1). Hruê anei, tloh tlâo pluh thŭn, Aê Diê lŏ mñă Ñu ruah leh Sang kkuh mpŭ ti ƀuôn Yêrusalem jing anôk myơr mnơ̆ng ngă yang čiăng Ñu trŭn dôk ti krah digơ̆.
Êgao hĭn kơ anăn, Aê Diê bi êdah kơ Mtao Salômôn ƀiădah amâo djŏ Ñu mjưh mă tăp klei bi mguôp hjăn plah wah Ñu hŏng Y‑Salômôn ôh, ƀiădah Ñu mñă kơ gơ̆ hdơr ala čar hlăk hlê mâo klei đĭ kyar, brei gơ̆ bi hriăm phung ƀuôn sang, jing phung Ñu pia leh jing “phung ƀuôn sang Kâo arăng pia hŏng anăn Kâo,” đăm wơr bĭt Aê Diê leh anăn kkuh mpŭ kơ rup yang ôh. Brei digơ̆ wah lač hŏng jih ai tiê, duah Aê Diê hlăm djăp mta klei, tơdah amâo ngă msĕ snăn ôh, klei jăk jĭn srăng bi mlih jing klei knap mñai. Aê Diê jing Pô doh jăk, kyuanăn tơdah phung ƀuôn sang Ñu ngă soh, Ñu srăng brei adiê không, ktuôp bi rai, klei ruă tưp čiăng brei digơ̆ ƀuh klei soh digơ̆. Ƀiădah Ñu ăt jing Aê Diê bŏ hŏng klei pap mơh, Ñu srăng pap brei leh anăn bi mtlaih digơ̆ mơ̆ng klei knap mñai. Kyuanăn, măng ai ya klei knap mñai truh dưn, brei phung jing leh dŏ Aê Diê thâo Aê Diê khăp nanao kơ phung ƀuôn sang Ñu leh anăn Ñu brei kơ digơ̆ mâo mmông myun dưi lŏ mă tŭ klei pap brei tơdah digơ̆ lui êlan soh, bi luă gŭ digơ̆ pô leh anăn duah ƀô̆ mta Ñu. Khua Yang hmư̆ nanao klei sa čô thâo kmhal kơ klei soh wah lač.
Phung đăo kơ Krist hruê anei grăp čô dưi nao mă ñu pô ti anăp Aê Diê kyua klei Khua Yang Yêsu djiê leh ti kyâo bi kal čiăng bi tui klei soh jih jang mnuih. Klei hdĭp grăp čô drei jing sang kkuh mpŭ kơ Aê Diê, mâo Yang Mngăt Jăk mŭt dôk kiă kriê. Drei msĕ mơh Aê Diê brei leh kơ drei klei “jing sa phung găp djuê Aê Diê ruah leh, phung khua ngă yang kơ mtao, sa phung găp djuê doh jăk, phung ƀuôn sang Aê Diê pô” (I Y‑Pêtrôs 2:9). Jing phung ƀuôn sang Aê Diê kyuanăn drei ăt dưi mă tŭ mơh klei Aê Diê ƀuăn leh kơ klei srăng pap brei klei soh leh anăn bi mtlaih tơdah tuôm hŏng klei lông dlăng knap mñai, tơdah drei thâo “bi luă gŭ drei pô, wah lač, duah ƀô̆ mta Ñu, lui jih êlan soh.” Akâo Khua Yang đru grăp čô drei wah lač hŏng jih ai tiê leh anăn bi mđĭ ai phung ayŏng amai adei drei duah nanao ƀô̆ mta Khua Yang.
Tơdah tuôm hŏng klei lông dlăng, klei dleh dlan knap mñai, si ngă drei pô leh anăn Phung Sang Aê Diê “bi luă gŭ drei pô, wah lač, duah ƀô̆ mta Aê Diê” leh anăn kmhal leh anăn lui hĕ klei soh drei mơ̆?
Wah lač: Ơ Khua Yang, đru kâo êlâo hĭn thâo bi luă gŭ kâo pô, akâo kơ Ih pap brei klei soh kâo leh anăn bi mtlaih kâo mơ̆ng klei knap mñai. Akâo Ih đru kâo thâo bi mđĭ ai leh anăn sa ai hŏng phung ayŏng amai adei hlăm gŏ sang, hlăm Phung Sang Aê Diê hlăm klei wah lač. Kâo wah lač hlăm Anăn Khua Yang Yêsu Krist. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 6
Kênh Youtube BHKTHN:
