Mathais 28:18-20; 1 Kauleethaus 9:19-23
Nqe cim:
“Kuv xyaum ua li txhua haivneeg ua. Kuv ua li ntawd saib puas yuav pab tau qee leej rov los ua neeg tshiab.” (1 Kauleethaus 9:22b)
Lus nug rau sawvdaws xav:
– Vim li cas thov Vajtswv yuav tsum ua ua ntej tshaj tawm Txojmoo Zoo?
– Timthawj Paulus xyaum ua txhua yam rau txhua tus li cas?
– Peb kawm tau yam dabtsi dhau los ntawm timthawj Paulus tus qauv?
Ua tim khawv txog tus Tswv kev Cawmdim yog ib lolus samhwm meej heev rau Pawg Ntseeg txhua tiam. Tswv Yexus hais meej hais tias txhua lub hwjchim saum ntuj thiab hauv ntiajteb nov puavleej muab cob rau nws lawm thiab Nws txib Nws cov menyuam mus qhia Txojmoo Zoo hauv Nws lub hwjchim (Mathais 28:19). Tshaj tawm, cob qhia thiab ua kevcai raus dej yuav tsum ua los ntawm Vajtswv Vaj Peb Leeg lub npe. Lub luag haujlwm tshaj tawm Txojmoo Zoo ibtxwm muaj Vajtswv nyob nrog, vim li ntawd, thov Vajtswv yuav tsum ua ua ntej tshaj tawm Txojmoo Zoo.
Vajtswv Txojmoo Zoo pub rau txhua haivneeg. Tus Tswv nqua hu Nws cov menyuam txhua tus uas muaj kev txawj ntse kom mus coj txhua haivneeg los ua Nws thwjtim. Timthawj Paulus yog ib tug qauv zoo li ntawd. Cia kom coj tau Txojmoo Zoo mus rau cov Yudas, nws ua kevcai txiav rau Timautes cog kev hlub, kom zam dhau kev tsimtxom, kev tsis txais yuav Txojmoo Zoo ntawm cov Yudas uas nyob ib cheebtsam ntawd. Timthawj Paulus paub meej hais tias Kevcai txiav yog kev coglus ntawm Vajtswv thiab cov Yixalayees (Chivkeeb 17:9-12), tiamsis tsis yog qhov uas yuav tsum muaj ntawm txoj kev Cawmdim (Loos 4:10-12). Ib zaug ntxiv, Titus uas yog ib tug tub hluas pab haujlwm rau timthawj Paulus, nws cajceg yog neeg Kilis, txawm yog yuav raug tibneeg hais li cas los xij timthawj Paulus yeej txiav txim siab tsis ua Kevcai txiav rau Titus (Kalatias 2:3-5).
Ntawm lwm haivneeg, timthawj Paulus nws ho muaj lwm txoj haukev coj lawv los cuag Vajtswv. Zoo li kev noj haus, cov Yudas coj raws li txoj Kevcai, feeb muaj cov tsiaj huv thiab tsis huv (Levi Kevcai 11), pivxam li tus npua, tus ntses txha, lub qwj… yog cov tsiaj tsis huv lawv tsis noj. Vim li ntawd cov Yudas yeej tsis zaum nrog lwm haivneeg noj haus ua ke. Tiamsis timthawj Paulus, nws ibtxwm yog neeg Falixais coj kevcai nruj heev, tiamsis nws ho zaum nrog lwm haivneeg noj haus ua ke, lub homphiaj yog kom tau nyob ze thiab ua tim khawv txog Tswv Yexus rau lawv. Tej yam noj tsis huv hauv Levi Kevcai 11 yeej tsis ua rau sab ntsujplig qias. Timthawj Paulus qhia meej hais tias: “Ib puas tsav yam uas Vajtswv tsim cia rau neeg noj puavleej zoo huv tibsi, tsis tas peb yuav caiv ib yam dabtsi li. Peb yeej noj tau txhua yam huv tibsi, tiamsis thaum peb yuav noj peb yuav tsum xub ua Vajtswv tsaug tso mam li noj. Rau qhov Vajtswv Txojlus thiab qhov uas peb thov Vajtswv foom koob hmoov twb ua rau tej ntawd zoo thiab huv lawm” (1 Timautes 4:4-5).
Txhua haivneeg puavleej muaj tej kevcai, kev coj noj coj ua sib txawv. Xav ua tim khawv rau lawv yuav tsum ua phoojywg thiab nyob ze lawv. Dhau los ntawm kev thov Vajtswv kawg siab ntsws, vamkhom Vaj Ntsujplig kev coj, kev qhia dhau hauv Vajtswv Txojlus, peb yeej yuav feeb tau tej yam twg yuav tsum zam, xws li qaug rau txoj kev ntseeg tsis muaj tseeb, saib hmoov, saib yaig, quav dej quav cawv, twv txiaj yuam pov…, thiab tej yam uas peb yuav koom tau nrog lawv thiab muaj sijhawm coj tau lawv los cuag tus Tswv Yexus.
Thov Vajtswv,
Tus Tswv, thov pub kev txawj ntse rau nyuam yaus thaum nyob ze nyuam yaus cov phoojywg thiab cov txheeb ze, kom muaj tswvyim ua tau tim khawv rau lawv los cuag Koj kom tau txais kev cawmdim. Nyuam yaus tuav Tswv Yexus Khetos lub npe thov, Amees.
Peb puas thov Vaj Ntsujplig coj kev kom peb mus ntsib tau peb cov phoojywg hauv kev tshaj tawm Txojmoo Zoo?
Nyeem Vajluskub hauv peb lub xyoos: Nkauj Quaj Ntsuag 4
Kênh Youtube BHKTHN:
