Tes Haujlwm 20:17-24
Nqe cim:
“Txawm yog cov Yudais pheej tuavhauv ua phem rau kuv kom kuv raug kev txomnyem los kuv tseem ua siab ntev ua Vajtswv tes haujlwm. Thaum kuv ua tes haujlwm ntawd, muaj qee zaus los kuv kua muag kawg li” (Tes Haujlwm 20:19)
Lug nug rau sawvdaws xav:
– Timthawj Paulus tau nkaw lus licas rau cov txwjlaug hauv Efexus?
– Tej lus ntawd qhia pom nplooj siab ua tus Tswv haujlwm ntawm nws zoo licas?
– Nws lubneej txhawb peb lub zog tiv dhau tej kev sim siab hauv kev ua tus Tswv haujlwm licas?
Nyob hauv ncua kev xa Txojmoo Zoo zaug kawg, Timthawj Paulus los so hauv lub nroog Miletus. Nws txib neeg mus hu cov txwjlaug hauv Pawg Ntseeg Efexus tuaj ntsib nws zaug kawg. Thaum lawv tuaj txog, Timthawj Paulus nkaw lus txog nws nplooj siab pub rau lawv yav dhau los. Txawm yuav poob ntau lub kua muag thiab ntsib ntau yam kev tawmtsam ntawm cov Yixalayees, los nws yeej muaj lub siab tawv, tiv dhau tej kev sim siab, ua neej txo hwjchim ua tus Tswv haujlwm hauv nruab nrab ntawm cov Pawg Ntseeg.
Timthawj Paulus tau kawg siab kawg ntsws qhuab qhia txhua zaj muaj nqis rau cov ntseeg, tsis zais ib los li (nqe 20). Nws nqua hu cov Yixalayees thiab cov Kilis yuav tsum lees kev txhaum tig rov los cuag Vajtswv thiab txais yuav Tswv Yexus. Ntawd yog Txojmoo Zoo uas nws tau qhia tsis nkees txawm yog yuav nyob qhov chaw twg. Timthawj Paulus yog ib tug qauv zoo heev txog ib tug tub txib ua haujlwm ncaj ncees rau Txojmoo Zoo, yog ib tug tub xa Txojmoo Zoo tsis ntshai kev khwv, yog ib tug thawjcoj txo hwjchim thiab poob ntau lub kua muag rau lwm tus. Nws lub neej ntsib ntau yam kev sim siab kawg li (II Kauleethaus 11:23-28), tiamssis nws hais khov kho hais tias “Kuv yeej tsis suav hais tias kuv lub neej tseemceeb dabtsi, rau qhov kuv xav ua tes haujlwm uas tus Tswv Yexus muab rau kuv ua kom tiav. Tes haujlwm ntawd yog mus qhia Txojmoo Zoo rau sawvdaws kom lawv paub hais tias Vajtswv hlub lawv” (nqe 24). Timthawj Paulus tig mus rau lub homphiaj tus Tswv hu nws, ua haujlwm kawg siab kawg ntsws thiab yeem muab nws txojsia los ua tus Tswv haujlwm. Lub zog pab nws tiv dhau txhua yam kev sim siab yog nplooj siab hlub tus Tswv, nco Nws txiajntsig thiab hlub cov ntsujplig uas tabtom raug kev puastsuaj.
Txij thaum ntsib tus Tswv ntawm txojkev mus rau lub nroog Damaxes, Timthawj Paulus yog tus Tswv tug lawm. Nws lubneej tseg ua haujlwm thiab ua raws Tswv Yexus lub siabnyiam nkaus xwb (Kalatias 2:20). Nws ua raws nraim li tus Tswv coj kev. Thaum tau Vaj Ntsujplig tshoov siab mus Yeluxalees, thiab tau qhia ua ntej hais tias yuav raug ntes coj mus kaw thiab tiv kev txomnyem qhov ntawd (nqe 22-23); txawm paub li ntawd, los nws yeej tsis thaub qab tiamsis ua siab tawv mus raws tus Tswv coj kev thiab ua tiav tes haujlwm tus Tswv muab cob. Ntawd yog lub ntsiab ntawm kev “ua tus Tswv haujlwm ntawm lub kua muag”. Tus Tswv yuav tsum yog tus tseemceeb xubthawj!
Timthawj Paulus tau ua qauv zoo tiv dhau txhua yam kev sim siab kom ncaj ncees ua tus Tswv haujlwm tsis nkees, tsis qaug zog. Niaj hnub nimno, txhua tus ntseeg puavleej yog tus Tswv cov tubtxib, tau tus Tswv muab Nws cov ntshav tsimtxiaj txhiv los, peb yuav tsum txais yuav kev sim siab, tiv dhau tej kev sim siab ntawd thiaj yuav mob siab ua tus Tswv tes haujlwm kom zoo thiab tsis tso tseg.
Thov Vajtswv,
Tus Tswv, thov pab nyuam yaus ua Koj tes haujlwm los ntawm lub siab txo hwjchim, kawg siab ntsws, kawg dag zog. Thov pub rau nyuam yaus muaj lub siab tawv thiab muaj dag zog tiv kev txomnyem kom ncaj ncees mus raws li Koj coj kev tas simneej. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas txaus siab tiv kev txomnyem kom tiv dhau txhua yam kev sim siab hauv kev ua tus Tswv haujlwm lawm tau?
Nyeem Vajluskub hauv peb lub xyoos: Cov Thawjtswj 17
Kênh Youtube BHKTHN:
