Klei Aê Diê Blŭ: Bruă Phung Khua Ƀĭng Kna 20:17-24
Êlan kliăng: “Kâo mă bruă kơ Khua Yang hŏng jih klei luă gŭ, hŏng klei hia, êjai lu klei lông dlăng truh kơ kâo mơ̆ng klei phung Yuđa trông čhai čiăng ngă jhat kơ kâo.” (Bruă Phung Khua Ƀĭng Kna 20:19)
Klei êmuh ksiêm mĭn: Khua ƀĭng kna Y-Pôl blŭ hrăm hŏng phung khua mduôn ti ƀuôn Êphêsô kơ ya mta klei? Klei blŭ hrăm anăn brei ƀuh si ngă ai tiê klei mĭn Khua ƀĭng kna Y-Pôl mă bruă kơ Khua Yang? Si klei bi mđĭ ai drei găn gao klei lông dlăng hlăm klei mă bruă kơ Khua Yang mơ̆ng klei hdĭp ñu?
Hlăm gưl hiu hưn Klei Mrâo Mrang Jăk knhal tuč, Khua ƀĭng kna Y-Pôl mjưh ti ƀuôn Milê. Ñu tiŏ nao mnuih nao kơ ƀuôn Êphêsô iêô phung khua mduôn hlăm Phung Sang Aê Diê hriê tuôm hŏng ñu tal knhal tuč. Tơdah digơ̆ truh leh, ñu blŭ hrăm hŏng digơ̆ kơ ai tiê ñu pioh hŏng digơ̆ hlăm jih hruê êgao. Wăt tơdah tuh lu êa ală leh anăn tuôm hŏng klei bi kdơ̆ng mơ̆ng phung Israel pô, ñu ăt dôk kjăp, găn gao jih klei lông dlăng, hdĭp luă gŭ mă bruă kơ Aê Diê hrăm mbĭt hŏng Phung Sang Aê Diê.
Khua ƀĭng kna Y-Pôl hŏng jih ai tiê mtô jih jang mta klei yuôm kơ phung đăo, amâo mdăp ya mta klei kơ ñu pô ôh (êlan 20). Ñu iêô mthưr wăt phung Israel leh anăn phung Grek kmhal kơ klei soh lŏ wĭt kơ Aê Diê leh anăn đăo kơ Khua Yang Yêsu. Anăn yơh jing Klei Mrâo Mrang Jăk ñu hiu hưn mtô lač amâo êgah êmăn hlăm jih jang anôk ñu nao. Khua ƀĭng kna Y-Pôl lui brei leh sa rup bi hmô tloh ênoh kơ sa čô dĭng buăl mă bruă sĭt suôr hŏng Klei Mrâo Mrang Jăk, sa čô hiu hưn klei đăo amâo uêñ ôh kơ klei dleh dlan, sa čô khua gĭt gai luă gŭ leh anăn tuh lu êa ală kơ lu mnuih. Klei hdĭp ñu găn lu lĭn klei lông dlăng (II Kôrantô 11:23-28), ƀiădah ñu lač klă “Ƀiădah kâo amâo yap klei hdĭp kâo yuôm ôh, knŏng kâo čiăng bi leh jih bruă kâo mă tŭ leh mơ̆ng Khua Yang Yêsu, brei kâo hưn klei mrâo mrang jăk klei Aê Diê pap” (êlan 24). Ñu knŏng dlăng kơ anôk kñăm kčah Khua Yang iêô ñu, mă bruă kơ Khua Yang hŏng jih ai tiê, săn asei mlei klei hdĭp ñu pioh mă bruă kơ Khua Yang. Klei ktang čiăng kơ ñu dưi găn gao jih jang klei lông dlăng jing klei khăp kơ Khua Yang, hdơr knga kơ Khua Yang leh anăn khăp kơ mngăt mnuih dôk rai luč.
Dơ̆ng mơ̆ng hlăk ñu bi tuôm hŏng Khua Yang ti êlan nao kơ ƀuôn Đamas, klei hdĭp Khua ƀĭng kna Y-Pôl knŏng pioh hjăn kơ Khua Yang. Ñu hdĭp knŏng pioh mă bruă leh anăn gưt ngă tui si klei Khua Yang Yêsu čiăng (Galati 2:20). Ñu đup gưt kluôm dhuôm klei Khua Yang gĭt gai. Hlăk Yang Mngăt Jăk mtrŭt ñu nao ti ƀuôn Yêrusalem, leh anăn hưn brei ñu thâo êlâo mơh, tinăn arăng srăng mă krư̆ ñu leh anăn ñu srăng tŭ klei knap mñai (êlan 22-23), wăt tơdah thâo snăn dưn mơh, ñu kăn kdŭn tluôn rei, ƀiădah ăt jhŏng tui hlue klei Khua Yang atăt gai leh anăn čiăng bi leh jih bruă ñu mă tŭ leh mơ̆ng Khua Yang jao. Anei yơh jing klei mblang sĭt klă kơ klei “mă bruă kơ Khua Yang hŏng klei luă gŭ, hŏng lu êa ală”. Brei dưm Khua Yang jing êlâo nanao!
Khua ƀĭng kna Y-Pôl lui brei leh rup bi hmô găn gao jih jang klei lông dlăng čiăng dưi dôk kjăp amâo êgah êmăn, amâo êdu ai. Hruê anei, grăp čô Phung đăo kơ Krist jing dĭng buăl kơ Khua Yang, bi tui leh hŏng êrah yuôm Ñu, brei drei gưt tŭ klei knap mñai, găn gao klei lông dlăng leh anăn dôk sĭt suôr.
Si ngă drei hmiêt mkăp tŭ klei knap mñai, săn asei mlei găn gao jih jang klei lông dlăng hlăm klei mă bruă kơ Khua Yang leh mơ̆?
Wah lač: Ơ Khua Yang, brei kâo mă bruă kơ Khua Yang hŏng klei luă gŭ, hŏng jih ai tiê, jih ai ktang. Brei kơ kâo mâo ai tiê jhŏng leh anăn ktang tlă anăp hŏng klei dleh dlan, čiăng dưi dôk sĭt suôr êbat hlue klei Khua Yang atăt gai tơl tuč klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
