2 Kevcai 24:5
Nqe cim zaj kawm:
“Thaum muaj ib tug txivneej twg nyuam qhuav yuav tau pojniam, tsis txhob coj tus ntawd mus tua rog lossis tsis txhob cia nws ua ib yam dabtsi rau nomtswv; tiamsis cia nws nyob hauv tsev ib xyoos, kom nws tus pojniam muaj kev zoo siab” (2 Kevcai 24:5).
Lus nug rau sawvdaws xav:
– Txhua tus txiv neej uas nyuam qhuav yuav pojniam muaj feem tau txais yam dab tsi?
– Yog ua cas Vajtswv kom Nws haiv neeg coj zoo li ntawd?
– Qhov ntawd qhia pom hais tias Vajtswv yog tus zoo li cas?
Nqe Vajluskub saum no hais txog pub cai rau txhua tus txiv neej uas nyuam qhuav yuav pojniam, tau zam txhua lub nra hauv tes haujlwm tiv thaiv lub tebchaws, nws tau nyob hauv tsev ib xyoos, kom nws muaj sijhawm nrhiav kev zoo siab pub rau nws tus pojniam uas nyuam qhuav yuav. Tuav cuabyeej mus ua rog yog txhua tus txiv neej lub nra uas nyob rau hauv txhua npluav rog mus txeeb lub tebchaws Vajtswv coglus rau los rau yus haivneeg. Tiamsis thaum ib tug txiv neej nyuam qhuav yuav pojniam, nws yuavtsum muaj feem xyuam rau yus lub cuab yig thiab tsis yog ris lub nra rau lub tebchaws xwb. Hauv thawj lub xyoo yuav tau pojniam yog cia sijhawm ua haujlwm pab rau nws tus pojniam, dhau ntawd lawm mam ua haujlwm pab rau lub tebchaws. Vajtswv tsis yog cia ib tug txiv neej thiab ib tug pojniam los nyob ua txij nkawm ua ke xwb tiamsis Vajtswv tseem pab kom txoj kev ua txij nkawm nyob ruaj khov thiab. Yog li ntawd, Vajtswv thiaj pub sijhawm rau nkawd txhim tsa lub cuabyig thiab ib leeg nrhiav kev zoo siab pub rau ib leeg hauv ib lub xyoos.
Nqe kevcai no yeej muab qhia tawm rau txhua tus paub. Raws li hauv 2 Kevcai 20:7 sau qhia txog, txhua tus txiv neej tsis yog tsuas muaj feem xyuam hnyav rau lub tebchaws xwb tiamsis yuav tsum txhawj txog kev zoo siab ntawm tus txij nkawm uas Vajtswv pub thiab. Dhau li ntawd, nqe kevcai no kuj yog ib qhov uas yuav pab tau tus nkauj nyab uas nyuam qhuav yuav tsis poob siab txog qhov uas nws mus ua ib tus poj ntsuam. Vim yog kev ua rog, tsis paub thaum twg tus txiv yuav raug tuag, tseg yus tus pojniam ua poj ntsuam, tsis hais tseem muaj menyuam hauv plab lossis tu ncua kev pab hauv lub cuabyig thiab tsis muaj tus yuav sawv nres lub cuabyig, Vajtswv thiaj pub sijhawm ib xyoos li ntawd rau nkawm niam txiv nyuam qhuav sib yuav los nyob uake. Yog li ntawd, peb pom hais tias Vajtswv saib txoj kev txij nkawm tseemceeb, Nws pub muaj kev zoo siab rau txhua nkawm niam txiv tshiab tshwjxeeb yog pub rau tus pojniam uas nyuam qhuav mus ua nyab.
Niaj hnub nimno kuj zoo yam li ntawd, txoj kev ua txij nkawm yuav mus tsis tau zoo yog hais tias tus txiv thiab tus pojniam tsis tseg sijhawm los txhim tsa lub cuabyig thaum nyuam qhuav pib. Lub neej vammeej niaj hnub nimno muaj ntau nkawm niam txiv siv sijhawm dag zog mus khwv noj khwv haus dhau, tsis muaj sijhawm los npoog txoj kev hlub sib pab ntawm kev ua txij nkawm thiab nrhiav kev zoo siab hauv yus tus txij nkawm. Vim maj nroos rau txhua tes haujlwm ntawm yus tus kheej, hnov qab feem xyuam uas ib leeg yuavtsum ua rau ib leeg, ntau nkawm niam txiv thiaj nyob tsis taus ua ke lawm, rau qhov ib leeg tsis quav ntsej ib leeg li. Vajtswv tsim txoj kev ua txij nkawm, tsis yog cia kom peb txais kev zoo siab xwb, tiamsis Vajtswv pub pojniam, txiv neej nyias muaj nyias feem xyuam rau hauv txoj kev txhim tsa thiab tiv thaiv yus lub cuabyig. Yog li ntawd, peb txhua tus yuavtsum ua tiav feem xyuam hauv txoj kev txij nkawm uas Vajtswv pub.
Thov Vajtswv
Vajtswv, Tus uas tsim muaj kev txij nkawm thiab yog Tus uas xav kom kev txij nkawm ruaj khov mus li. Thov pab nyuam yaus paub saib kev txij nkawm kom tseemceeb, paub tseg sijhawm rau nyuam yaus lub cuabyig thiab ua tiav feem xyuam hauv txoj kev txij nkawm uas Vajtswv Koj pub. Nyuam yaus tuav Tswv Yexus Khetos lub npe thov, Amees.
Peb puas tseg sijhawm los nrhiav kev zoo siab rau peb tus txij nkawm lawm?
Nyeem Vajluskub hauv peb xyoos: 1 Kauleethaus 4:1-5:15.
Kênh Youtube BHKTHN:
