Klei Aê Diê Blŭ: Klei Mtô Mñă Klei Bhiăn 24:5
Êlan kliăng: “Tơdah sa čô êkei mrâo bi dôk ung mô̆, ñu amâo srăng nao mbĭt hŏng phung kahan amâodah djă sa mta bruă ôh; ñu srăng dôk êngiê ti sang ñu êjai sa thŭn, čiăng mâo klei hơ̆k mơak hŏng mô̆ ñu mă leh” (Klei Mtô Mñă Klei Bhiăn 24:5)
Klei êmuh ksiêm mĭn: Ya klei mdê kơ phung êkei mrâo dôk mô̆ mâo? Ya ngă Aê Diê mtrŭn hĕ klei bhiăn anei? Klei bhiăn anei bi êdah si Pô Aê Diê jing?
Êlan Klei Aê Diê Blŭ anei blŭ djŏ kơ klei bhiăn phưi lui phung êkei mrâo dôk mô̆ amâo klam bruă răng mgang ala čar ôh êjai sa thŭn čiăng kơ digơ̆ ba klei mơak kơ mô̆ mrâo dôk. Djă mnơ̆ng bi blah jing bruă kơ grăp čô êkei hlăm klei bi blah plah mă anôk Lăn Aê Diê Ƀuăn kơ phung Israel tui si klei Aê Diê gĭt gai. Ƀiădah tơdah sa čô êkei mrâo dôk mô̆, klei hdĭp pô anăn amâo djŏ klam knŏng bruă ala čar ôh ƀiădah mâo bruă klam wăt hlăm gŏ sang mơh.
Hlăm thŭn tal êlâo, êlâo kơ ngă bruă kơ ala čar, pô jing ung srăng ngă êlâo hĭn bruă mkŏ mjing klei hdĭp mrâo hŏng mô̆ ñu. Aê Diê mjing klei bi dôk ung mô̆ êkei hŏng mniê amâo djŏ knŏng brei digơ̆ dua hdĭp mbĭt sa boh sang ôh ƀiădah wăt čiăng đru kơ klei bi dôk ung mô̆ dôk kjăp msĕ mơh. Kyuanăn, Aê Diê brei mông kơ dua čô ung mô̆ pioh mkŏ mjing gŏ huă mrâo leh anăn hơ̆k mơak mbĭt mđrăm.
Klei bhiăn anei lŏ bi ƀai kơ klei bi hriăm hlăm Klei Mtô Mñă Klei Bhiăn 20:7 čiăng ƀuăn rơ̆ng kơ phung êkei amâo djŏ ôh kyua ktrŏ đei hŏng bruă ala čar snăn amâo dưi dưn ôh klei mơak mñai hlăm hlăm klei bi dôk ung mô̆ Aê Diê brei. Êgao hĭn kơ-năn, klei bhiăn ăt čiăng răng mgang kơ pô jing mô̆ amâo srăng djiê ung ưm ôh. Kyuadah tơdah ung gơ̆ djiê hlăm kdrăn blah hlăk digơ̆ mrâo bi dôk, huĭdah lui hĕ gơ̆ dôk hjăn êjai dôk ba tian tuôm hŏng klei kƀah knap kyua luč leh pô mă bruă phŭn hlăm sang. Lŏ sa blư̆, drei ƀuh Aê Diê dlăng yuôm snăk kơ klei bi dôk ung mô̆, Ñu uêñ mĭn kơ bruă răng mgang leh anăn mkŏ mdơ̆ng sa klei hdĭp mơak mñai kơ gŏ huă mrâo, boh nik nak kơ phung mniê.
Hruê anei ăt msĕ mơh, klei bi dôk ung mô̆ amâo dưi djă pioh jăk ôh tơdah ung hŏng mô̆ amâo pioh mông leh anăn amâo bi liê ai kơ klei bi kjăp klei hdĭp gŏ sang. Klei hdĭp mrâo ênuk anei mâo lu hlâo ung mô̆ uêñ đei kơ klei duah ƀơ̆ng huă tơl amâo pioh mông bi uêñ ôh hdơ̆ng ung mô̆ amâodah amâo bi mguôp ngă sa mta klei ôh čiăng bi kjăp klei khăp leh anăn klei mơak mñai dua ung mô̆.
Kyua mñik mñak đei hŏng lu mta bruă pô dê snăn wơr bĭt hĕ kơ bruă klam hdơ̆ng ung mô̆, tơl ung mô̆ dơ̆ng truh kơ klei bi lui. Aê Diê mjing klei bi dôk ung mô̆ amâo djŏ knŏng pioh kơ anak mnuih bi knal klei hơ̆k mơak mơ̆ng klei bi dôk ung mô̆ ba hriê ôh, ƀiădah mbĭt hŏng klei anăn Ñu ăt jao mơh bruă klam wăt kơ ung leh anăn mô̆ hlăm bruă mkŏ mdơ̆ng leh anăn răng kriê gŏ sang pô. Brei drei hdĭp mâo bruă klam hŏng klei bi dôk ung mô̆ Aê Diê brei.
Si ngă drei pioh mông bi kjăp klei hơ̆k mơak kơ gŏ sang drei mơ̆?
Wah lač: Ơ Aê Diê, Pô mjing klei bi dôk ung mô̆ leh anăn uêñ mĭn kơ klei djă pioh sa klei bi dôk ung mô̆ mơak mñai. Đru kâo thâo mpŭ kơ klei bi dôk ung mô̆ leh anăn pioh mông kơ gŏ sang kâo, mâo bruă klam hlăm klei bi kjăp leh anăn răng mgang klei bi dôk ung mô̆ Ih brei leh kơ kâo. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: II Kôrantô 4:1-5:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
