Loos 8:31-39
Nqe cim:
“Leejtwg tseem yuav rau txim tau rau peb? Yexus Khetos twb tuag thiab sawv hauv qhov tuag rov qab los lawm, nws nyob ntawm Vajtswv sab xis thiab thov Vajtswv pab peb.” (Loos 8:34)
Lus nug rau sawvdaws xav:
– Yam dabtsi ua tabpov kev cawm dim rau cov neeg tau xaiv?
– Leejtwg yog tus nkaug? Nws hais li cas rau cov neeg uas tau xaiv?
– Yam dabtsi muaj peevxwm cais tau peb tawm ntawm Vajtswv txojkev hlub muab pub rau peb?
Timthawj Paulus ua tabpov tias tsis muaj leejtwg muaj cuabkav tawmtsam tau cov neeg uas Vajtswv tuaj lawv tog (nqe 31, 33), kev cawm dim yeej yuav yog cov neeg uas tau xaiv lawm tug. Ntawm lub rooj txiav txim dawbhuv, Vajtswv yog tus txiav txim yuav hais tias cov neeg uas Nws xaiv lawm ncaj ncees thiab tsis muaj txim. Lub sijhawm ntawd Xatas thiab nws cov tubtxib yuav nkaug thiab hais tej kev txhaum uas tibneeg ua, nrhiav tswvyim cais tibneeg thiab Vajtswv, cov uas Nws hlub.
Peb twb tau suav tias tsis muaj txim vim peb qhov vimchiv: Thib ib, Tswv Yexus yog lub Zwmtxwv thib ob hauv Vajtswv Vaj Peb Leeg los yug ua neeg tsis ua txhaum, Nws cov ntshav ntws si laim saum ntoo khaublig ua txojkev cawm dim rau cov neeg uas ua raws li Vajtswv lub siab nyiam. Tswv Yexus txojkev tuag txhiv them tau Vajtswv txojkev ncaj ncees thiab dawbhuv. Cov neeg uas ntseeg Tswv Yexus twb them tas nqi kev txhaum thiab twb tuag hauv Yexus Khetos lawm. Thib ob, Vajtswv twb zoo siab txais yuav qhov khoom fij, tsa Tswv Yexus sawv hauv qhov tuag rov los thiab nyob ntawm Vajtswv sab xis (nqe 34). Cov neeg ntseeg Tswv Yexus kuj yuav sawv rov los thiab nyob ntawm Vajtswv ib sab hnub Tswv Yexus nqis los. Thib peb, Tswv Yexus tabtom thov Vajtswv pab peb. Cov neeg ntseeg Yexus yuav tau txais lub zog qaum ntuj thiab Vaj Ntsujplig coj txhua hnub.
Cov ntseeg Yexus ua neej nyob hauv lub ntiajteb tsis muaj ib tug zam dhau nqi zog ntawm txojkev txhaum yus tau ua, kuj tsis khiav dhau tej kev tsimtxom, ntxub ntxaug ntawm lub hwjchim tawmtsam Vajtswv. Peb yuav ntsib tej lub tsamthawj nyuaj siab heev xws li kev txomnyem, kawg kev, tsimtxom, tshaib nqhis, txaus ntshai thiab hniav ntaj hniav riam (nqe 35). Tiamsis hauv txhua yam ntawd peb muaj yeej vim peb tus Tswv uas hlub peb muaj yeej (nqe 37). Vajtswv txojkev hlub nyob mus ibtxhis, Timthawj Paulus hais tias tsis muaj ib yam dabtsi yuav txeeb tau peb, txawm yog kev tuag, txojsia, cov timtswv, tej hwjchim, tamsim no thiab yav tom ntej…tawm ntawm Vajtswv txojkev hlub uas tabpov nyob hauv Yexus Khetos mus li. (nqe 38-39). Thaum peb hnov Xatas cov lus nkaug yus tej kev ua txhaum, cia li ntseeg hais tias hauv Tswv Yexus txhua yam kev txhaum tau zam huvsi.
Thov Vajtswv,
Tus Tswv, nyuam yaus ua Vajtswv Vaj Peb Leeg tsaug, uas Koj tau cawm nyuam yaus hauv Tswv Yexus. Thov Koj txojkev hlub thiab lub hwjchim nyob puag ncig nyuam yaus. Thov Leej Txiv Koj tswj kav thiab yeb kom nyuam yaus ua tau zoo li Koj txhua hnub. Nyuam yaus tuav Tswv Yexus lub npe thov, Amees.
Peb ua neej zoo li cas thaum paub tias Vajtswv txojkev hlub loj heev pub rau yus?
Nyeem Vajluskub hauv peb lub xyoo: Yauhas 12
Kênh Youtube BHKTHN:
