Klei Aê Diê Blŭ: Rôm 8:31-39
Êlan kliăng: “Hlei pô srăng phat kđi bi kmhal diñu? Krist Yêsu jing Pô djiê leh, wăt kbiă lŏ hdĭp leh mơh, Pô dôk tĭng hnuă kơ Aê Diê leh anăn đru wah lač brei kơ phung drei” (Rôm 8:34)
Klei êmuh ksiêm mĭn: Ya mnơ̆ng ƀuăn rơ̆ng klei bi mtlaih kơ phung Aê Diê ruah leh? Hlei jing pô kčŭt? Si klei diñu kčŭt kơ phung Aê Diê ruah? Ya mnơ̆ng dưi bi ktlah drei mơ̆ng klei Aê Diê khăp?
Khua ƀĭng kna Y‑Pôl lač amâo mâo pô dưi bi kdơ̆ng ôh hŏng phung mâo Aê Diê dôk mbĭt, kăp dŏng mgang (êlan 31,33). Sĭt nik phung Aê Diê ruah leh srăng mâo klei bi mtlaih. Ti anăp jhưng phat kđi kô̆, Aê Diê jing Khua Phat Kđi Prŏng Hĭn srăng yap kpă leh anăn hưn jih jang phung Ñu ruah leh amâo mâo klei soh ôh. Hlăk anăn Satan mbĭt hŏng phung ñu srăng kčŭt leh anăn phat kđi, diñu srăng bi êdah jih jang klei soh hlăm klei hdĭp grăp čô mnuih, duah djăp êlan čiăng bi ktlah Aê Diê hŏng mnuih, phung Aê Diê khăp êdimima.
Wăt snăn dưn mơh, drei mâo klei yap kpă kluôm ênŭm kyua tlâo mta klei: Tal sa, Khua Yang Yêsu, jing Aê Diê Tal Dua trŭn hriê leh ti lăn ala, hdĭp klei hdĭp amâo tuôm ngă soh ôh, Ñu tuh leh êrah ti kyâo bi kal čiăng ngă hdră bi mtlaih anak mnuih tui si klei Aê Diê čiăng. Klei Khua Yang Yêsu djiê hrô brei jing năng hŏng klei doh jăk leh anăn kpă ênô Aê Diê. Jih jang phung đăo kơ Khua Yang Yêsu tŭ leh klei phat kđi leh anăn djiê leh hlăm Khua Yang Yêsu Krist. Tal dua, hŏng klei mơak Aê Diê mă tŭ leh mnơ̆ng ngă yang bi tui klei soh, Ñu lŏ bi kbiă lŏ hdĭp leh Khua Yang Yêsu leh anăn brei dôk gŭ tĭng hnuă kơ jhưng mtao Ñu (êlan 34). Jih jang phung đăo kơ Khua Yang Yêsu srăng kbiă lŏ hdĭp leh anăn dôk mbĭt hŏng Aê Diê hlăm hruê Khua Yang Yêsu lŏ hriê. Tal tlâo, Khua Yang Yêsu Krist dôk đru wah lač brei kơ phung drei. Jih jang phung đăo kơ Khua Yang Yêsu srăng mă tŭ klei ktang myang leh anăn klei Yang Mngăt Jăk atăt gai čiăng dưi jing doh jăk grăp hruê.
Phung đăo kơ Krist dôk hdĭp ti krah lăn ala anei amâo tlaih ôh kơ boh jhat mơ̆ng klei soh diñu pô ngă leh, kăn srăng tlaih rei kơ klei phung bi kdơ̆ng hŏng Aê Diê ngă jhat leh anăn bi êmut. Drei srăng bi tlă anăp hŏng klei truh jhat hĭn msĕ si klei knap mñai, klei rŭng răng, klei arăng ngă jhat, klei ư̆ êpa, klei lưng mlŭn, klei jŭ jhat leh anăn đao gưm (êlan 35). Ƀiădah, hlăm jih jang klei anăn hŏng Pô khăp kơ drei, drei jing phung dưi hĭn nanao (êlan 37). Klei khăp Khua Yang dôk nanao hlŏng lar amâo tuôm tuč ôh, Khua ƀĭng kna Y‑Pôl mñă amâo mâo sa mta klei ôh thâodah klei djiê, klei hdĭp, phung dĭng buăl jăk, phung khua kiă kriê, mnơ̆ng ênuk anei, mnơ̆ng ênuk êdei, klei myang hlăm lăn adiê, boh dlông, boh êlam, amâodah ya mnơ̆ng mkăn hlăm jih jang mnơ̆ng hrih leh, amâo srăng dưi bi ktlah drei ôh mơ̆ng klei Aê Diê khăp bi êdah leh hlăm Khua Yang Yêsu Krist (êlan 38-39). Tơdah drei hmư̆ klei Satan kčŭt kơ klei soh drei ngă, đăo kjăp bĕ snei, hlăm Khua Yang Yêsu, jih jang klei soh drei mâo klei pap brei leh.
Si ngă drei srăng hdĭp tơdah thâo klei Khua Yang khăp kơ drei prŏng snăk?
Wah lač: Ơ Aê Diê Tlâo Čô Yang, kâo lač jăk kơ Ih brei leh kơ kâo klei bi mtlaih hlăm Khua Yang Yêsu Krist. Akâo klei khăp leh anăn klei myang Ih guôm kâo nanao. Akâo Khua Yang kiă kriê leh anăn ƀư̆ mkra kâo jing msĕ si Ih hĭn grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
