II Kevcai 31:14-23
Nqe cim:
“Tom qab ntawd tus TSWV hais rau Noos tus tub Yausuas hais tias: Koj cia li ua siab tawv qhawv tsis txhob ntshai. Koj yuav ua tus coj cov Yixalayees mus nyob hauv lub tebchaws uas kuv tau coglus tseg yuav muab rau lawv, thiab kuv yuav nrog nraim koj” (II Kevcai 31:23)
Lug nug rau sawvdaws xav:
– Tus Tswv tau samhwm rau Mauxes thiab Yausuas yam dabtsi?
– Tus Tswv tej lus cogtseg txhawb ob tug lub zog licas?
– Yam dabtsi pab peb tuav ruaj kev ntseeg thiab rhais ruam hauv tes haujlwm tus Tswv muab cob?
Ntawm no yog ib ntu Vajluskub tshwjxeeb heev vim tus Tswv tshwm los rau Mauxes thiab Yausuas pom nyob hauv tauv huab ntawm lub qhovrooj Tsevntaub, samhwm tim ntsej tim muag rau nkawd txog haivneeg Yixalayees lubneej tomntej. Tus Tswv qhia paub hais tias tomqab uas muaj noj muaj haus txaus thiab nyob tso siab lug hauv Tebchaws Coglus Tseg, tus Tswv haivneeg yuav ntxeev siab rau Nws, mus pe luag tej vajtswv. Yam ua rau peb xav tsis thoob yog qhov uas txawm tias tus Tswv paub ua ntej txog cov Yixalayees kev ntxeev siab, los Nws yeej muab haujlwm cob rau Yausuas coj cov pejxeem mus hauv lub tebchaws uas tus Tswv coglus rau lawv cov yawgkoob. Txawm tus Tswv haivneeg ua tsis ncaj ncees los Vajtswv yeej yog tus ncaj ncees!
Tej lus hais tseg ua ntej txog cov Yixalayees lubneej txawm ntau thiab tsawg los yeej ua rau Mauxes hnov hnyav siab, vim nws siv tagnrho nws lubneej los qhuab qhia cov pejxeem mus raws tus Tswv, tiamsis thaum nws tuag lawm, ces cov pejxeem yuav tso tus Tswv tseg. Hais txog Yausuas feem, thaum txais haujlwm paub tseeb hais tias nws yuav hnov muaj ntau yam kev khwv nyob tom hauv ntej. Kev mus txeeb lub Tebchaws Coglus Tseg tsis yog yoojyim, tiamsis txawm khwv npaum twg los tus thawjcoj yeej tiv taus, vim ntawm no yog lub suab nqua hu, yog lub luag haujlwm uas nws txais tau ntawm tus Tswv los. Txawm tias Yausuas tseem tsis tau pib ua haujlwm, los tej lus hais ua ntej txog cov Yixalayees kev ntxeev siab yeej ua rau nws xav hais tias nws yuav yog ib tug thawjcoj ua tsis tiav haujlwm. Tus Tswv paub Yausuas lub siab xav, Nws thiaj samhwm hais tias: “Koj cia li ua siab tawv qhawv tsis txhob ntshai. Koj yuav ua tus coj cov Yixalayees mus nyob hauv lub tebchaws uas kuv tau coglus tseg yuav muab rau lawv, thiab kuv yuav nrog nraim koj” (nqe 23). Tej no qhia peb paub hais tias, tus Tswv yog tus uas ncaj ncees, txawm tias Nws xub paub ua ntej txog cov Yixalayees tej kev txhaum, los Nws yeej tsis tso Nws haivneeg tseg. Tus Tswv muab cob haujlwm thiab txhawb Yausuas lub zog coj tus Tswv haivneeg mus txeeb lub tebchaws uas Nws coglus rau lawv cov yawgkoob.
Zaj xwm hauv ntu Vajluskub hnub no qhia peb pom hais tias peb txhua tus yuav tsum ua siab loj thiab muaj lub siab tawv txhua lub tsamthawj thiaj yuav ncaj ncees ua tiav lub luag haujlwm tus Tswv muab cob kom kawg zoo li Mauxes. Tus Tswv muaj homphiaj rau txhua tus ua nyias tes haujlwm raws li sijhawm teem tseg. Yuav kom tuav ruaj kev ntseeg thiab ua neej nrog lub luag haujlwm mus ntxiv, peb yuav tsum cim ntsoov hais tias tus Tswv yog tus ncaj ncees yuav niaj hnub nrog nraim, pub koob hmoov thiab coj peb txoj haukev, tsuav yog peb muab siab npuab ua raws Nws tej lus qhia xwb.
Thov Vajtswv,
Tus Tswv, Koj yog tus nqua hu thiab muab haujlwm cob rau nyuam yaus. Thov pub nyuam yaus muaj kev ntseeg ruaj khov ntawm Koj kom nyuam yaus tau txhawb zog, ua neej nrog tes haujlwm Koj muab cob. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas raug theem hauv txojkev ntseeg thaum ntsib teebmeem? Peb yuav tsum ua dabtsi kom ua tau lubneej raws tus Tswv lub suab hu?
Nyeem Vajluskub hauv peb lub xyoos: Loos 7
Kênh Youtube BHKTHN:
