Klei Aê Diê Blŭ: Klei Mtô Mñă Klei Bhiăn 31:14-23
Êlan kliăng: “Yêhôwa jao bruă kơ Y-Yôsuê anak êkei Y-Nun, lač, “Brei jing ktang leh anăn mđĭ ai bĕ; kyuadah ih srăng atăt ba phung anak Israel mŭt hlăm čar kâo kat asei leh čiăng brei kơ diñu; kâo srăng dôk mbĭt hŏng ih.” (Klei Mtô Mñă Klei Bhiăn 31:23)
Klei êmuh ksiêm mĭn: Ya klei Yêhôwa lač leh hŏng Y-Môis leh anăn Y-Yôsuê? Si klei Aê Diê ƀuăn mđĭ ai kơ diñu dua? Ya klei đru drei đăo kjăp leh anăn êbat hlăm bruă klam Aê Diê jao?
Anei jing sa trăn Klei Aê Diê Blŭ mdê hjăn kyua Yêhôwa bi êdah hŏng Y-Môis leh anăn Y-Yôsue hlăm kmeh knam, blŭ hŏng diñu dua kơ êdei anăp phung Israel. Ñu brei thâo leh mâo klei hdĭp jăk mơak ti Lăn Aê Diê Ƀuăn, phung ƀuôn sang Aê Diê srăng bi kdơ̆ng hŏng Aê Diê, kkuh kơ rup yang mkăn. Klei ngă kơ drei bi kngăr jing wăt tơdah Aê Diê thâo êlâo leh phung ƀuôn sang Israel srăng bi kdơ̆ng hŏng Aê Diê, ƀiădah Ñu ăt jao bruă klam kơ Y-Yôsuê atăt gai phung ƀuôn sang hlăm krĭng lăn Aê Diê ƀuăn leh kơ phung aê diñu đưm. Wăt tơdah phung ƀuôn sang Aê Diê amâo sĭt suôr ôh ƀiădah Aê Diê ăt sĭt suôr nanao!
Dŭm klei hưn êlâo kơ êdei anăp phung ƀuôn sang Israel ƀiă lu ăt ngă kơ Y-Môis ƀuh ktrŏ hlăm ai tiê, kyua ñu yua leh jih klei hdĭp pô čiăng mtô kơ phung ƀuôn sang êbat tui hlue Aê Diê, ƀiădah leh ñu djiê snăn phung ƀuôn sang srăng lui Aê Diê. Bi kơ Y-Yôsuê leh mă bruă klam, klă sĭt ñu ƀuh klei ktrŏ snăk dôk guôn pô phă anăp. Klei bi blah plah mă krĭng Lăn Aê Diê Ƀuăn klă sĭt amâo ênưih ôh, ƀiădah wăt tơdah dleh dlan dưn mơh pô gĭt gai ăt dưi tŭ, kyua anei jing asăp iêô, jing bruă klam ñu mă tŭ mơ̆ng Aê Diê. Khădah snăn, klei bi êdah kơ klei phung ƀuôn sang Israel bi kdơ̆ng hŏng Aê Diê jing klei ngă kơ Y-Yôsuê ăt ƀuh, wăt tơdah ka mphŭn kčưm bruă klam ôh, ăt ƀuh leh pô jing sa čô pô gĭt gai amâo tŭ jing. Aê Diê thâo klei Y-Yôsuê bi mĭn anăn Ñu lač: “Brei jing ktang leh anăn mđĭ ai bĕ; kyuadah ih srăng atăt ba phung anak Israel mŭt hlăm čar kâo kat asei leh čiăng brei kơ diñu; kâo srăng dôk mbĭt hŏng ih” (êlan 23). Klei anei đru kơ drei ƀuh, Yêhôwa jing Pô sĭt suôr, wăt tơdah Ñu thâo êlâo kơ klei hdĭp jhat ƀai phung ƀuôn sang Israel, ƀiădah Aê Diê amâo lui phung ƀuôn sang Ñu ôh. Aê Diê jao bruă klam leh anăn mđĭ ai Y-Yôsuê gĭt gai phung ƀuôn sang Ñu plah mă krĭng lăn Aê Diê ƀuăn leh kơ phung aê diñu.
Klei yăl dliê hlăm trăn Klei Aê Diê Blŭ hruê anei đru drei ƀuh grăp čô brei jhŏng hlăm djăp boh klei čiăng sĭt suôr hdĭp hlue si bruă klam Aê Diê jao tơl truh kơ jih klei hdĭp Y-Môis. Aê Diê mâo hdră kơ grăp čô mnuih, hlăm djăp bruă mă leh anăn grăp wưng jing mdê mdê sơăi. Čiăng dưi dôk kjăp leh anăn êbat hlăm bruă klam, drei hdơr nanao Aê Diê jing Pô sĭt suôr dôk mbĭt nanao, hơêč hmưi leh anăn atăt gai drei hlăm hdră êlan, knŏng čiăng kơ drei sĭt suôr hlue ngă Klei Aê Diê Blŭ mtô.
Drei mdei mơ̆ hlăm klei mă bruă tơdah tuôm hŏng klei gun kpăk? Ya klei brei drei ngă čiăng hdĭp nanao hlue si asăp Khua Yang iêô?
Wah lač: Ơ Khua Yang, Pô iêô leh leh anăn jao kơ kâo sa bruă klam. Akâo kơ Ih đru kâo đăo kjăp hlăm Khua Yang sĭt suôr čiăng kjăp ktang nanao leh anăn sĭt suôr êbat hŏng bruă klam Ih jao. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
