Mathais 5:20
Nqe cim:
“Kuv qhia rau nej hais tias, yog nej tsis ua ncaj dua cov xibhwb uas qhia Vajtswv txoj Kevcai thiab cov Falixais, ces nej yuav tsis tau mus nyob saum ntuj Ceebtsheej.” (Mathais 5:20)
Lus nug xav:
– Txojkev ncaj ncees ntawm cov Falixais thiab cov xibhwb qhia Vajtswv txoj kevcai yuamkev qhov twg?
– Tus Tswv qhuab ntuas hais tias cov thwjtim yuav tsum ua ncaj dua cov neeg ntawd muaj lub ntsiab lus yog li cas?
– Peb yuav tsum ua li cas thiaj tau Vajtswv suav hais tias ncaj ncees?
Mathais tshooj 5 yog ntu pib ntawm “Zaj Lus Qhia Saum Roob” uas Tswv Yexus qhia rau cov thwjtim, uas yog cov pejxeem tshiab hauv Tebchaws Ceeb Tsheej. Tus Tswv qhuab ntuas txog txojkev ncaj ncees kom lawv tsimnyog nyob hauv Tebchaws Ceeb Tsheej. Cov xibhwb qhia Vajtswv txoj kevcai thiab cov Falixais txojkev ncaj ncees tsuas yog mojyam sab nraud xwb, lawv tuav kevcai kom tibneeg pom thiab qhuas lawv, tsis yog qhuas Vajtswv. Lawv fij khoom, pheej ua kevcai yoo mov, thov Vajtswv, ntxuav tes, fij feem kaum, tiamsis lawv ho “tsis ua raws li tej lus tseemceeb uas Vajtswv txoj Kevcai qhia kom neeg ua ncaj ncees, muaj kev hlub thiab ua lub siab ncaj…” (Mathais 23:23). Tibneeg tiam ntawd xav hais tias ua lubneej ncaj ncees li cov xibhwb qhia Vajtswv txoj kevcai thiab cov Falixais ces yog txoj haukev pab kom tau mus rau hauv Tebchaws Ceeb Tsheej, tiamsis Tswv Yexus tau muab lawv lub ntsejmuag ncaj siab nkhaus nthuav tawm (saib Mathais 23:1-39). Vim li ntawd, tus Tswv thiaj qhia cov thwjtim tias: “Kuv qhia rau nej hais tias, yog nej tsis ua ncaj dua cov xibhwb uas qhia Vajtswv txoj Kevcai thiab cov Falixais, ces nej yuav tsis tau mus nyob saum ntuj Ceebtsheej” (nqe 20).
Tswv Yexus qhia hais tias cov thwjtim yuav tsum ua ncaj ncees dua, lub ntsiab lus yog yuav tsum ua siab dua, no yog txojkev ncaj ncees uas tawm hauv nplooj siab tuaj. Cov xibhwb qhia Vajtswv txoj kevcai thiab cov Falixais coj tej kevcai uas cov yawgkoob qhia ib tiam dhau ib tiam nruj kawg li, tiamsis Vajtswv Txojlus qhia hais tias tsis muaj leejtwg yuav tau suav hais tias yog neeg ncaj ncees dhau ntawm tes haujlwm coj kevcai, tuav mojyam… raws li Vajtswv Txojlus qhia hais tias: “…Peb yeej paub hais tias tus uas Vajtswv suav hais tias ncaj ncees, tsis yog tus uas xyaum coj raws li Vajtswv txoj kevcai, tiamsis yog tus uas ntseeg Yexus Khetos. Txawm yog peb los kuj ib yam nkaus li ntawd, qhov uas Vajtswv coj peb los nrog Vajtswv sib raug zoo twb yog vim peb ntseeg Yexus Khetos, tsis yog vim peb xyaum coj raws li Vajtswv txoj kevcai. Rau qhov tus uas Vajtswv suav hais tias ncaj ncees yeej tsis yog tus uas xyaum coj raws li Vajtswv txoj kevcai.” (Kalatias 2:16). Tswv Yexus Khetos yog tus uas ris peb tej kev txhaum, kom txhua tus uas tso siab rau Nws puavleej tau suav hais tias yog neeg ncaj ncees (II Kauleethaus 5:21) thiab tau mus rau hauv Tebchaws Ceeb Tsheej.
Niaj hnub nimno, ntau leej neeg xav yuam kev hais tias yuav tsum ua tes haujlwm no tes haujlwm tod, yuav tsum muaj meejmom siab, yuav tsum tuav mojyam sab nraud kom nruj me ntsis, yuav tsum… thiab yuav tsum… thiaj tau suav hais tias yog neeg ncaj ncees. Peb tabtom taug raws tej qub qab kev ntawm cov Falixais thiab cov xibhwb qhia Vajtswv txoj kevcai yav thaud lawm. Thov tus Tswv pab kom peb nqhis nqhawv nyeem, kawm Vajluskub uas yog Vajtswv Txojlus ciaj sia txhua hnub kom paub Nws lub siab nyiam thiab ua lubneej raws li Vajtswv Txojlus qhia. Tus Tswv yuav pub peb ua tau lub neej ncaj ncees thaum peb ntseeg thiab ua lubneej zoo haum Nws siab.
Thov Vajtswv,
Leej Txiv tus uas Ncaj Ncees! Ua Koj tsaug vim Koj tau pub nyuam yaus tau los ua neeg ncaj ncees dhau ntawm Tswv Yexus cov ntshav uas muaj nqis. Thov hloov pauv thiab ntxuav nyuam yaus lub siab, lub hlwb txhua txhua hnub los ntawm Koj Txojlus ciaj sia kom nyuam yaus lubneej nce mus txog qib ua txhij txhua raws li Leej Txiv siab nyiam. Nyuam yaus tuav Tswv Yexus Khetos lub npe thov, Amees.
Peb saib hlob kevcai raws mojyam sab nraud xwb lossis nplooj siab nrog tus Tswv?
Nyeem Vajluskub hauv peb lub xyoos: Exekees 39
Kênh Youtube BHKTHN:
