Klei Aê Diê Blŭ: Y-Mathiơ 5:20
Êlan kliăng: “Kyuadah Kâo lač kơ diih, tơdah klei kpă ênô diih amâo jing kdlưn hĭn kơ klei kpă ênô phung khua čih hră leh anăn phung Pharisi, diih amâo srăng mŭt hlăm ƀuôn ala mtao adiê ôh.” (Y-Mathiơ 5:20)
Klei êmuh ksiêm mĭn: Ti anôk amâo djŏ ôh klei kpă ênô phung Pharisi leh anăn phung khua čih hră ngă? Si mblang klei Khua Yang mtô brei klei kpă ênô phung ƀĭng kna kdlưn hĭn kơ phung anăn? Ya klei brei drei ngă čiăng Khua Yang yap drei jing phung kpă ênô?
Y-Mathiơ kdrêč 5 jing kdrêč tal êlâo hĭn hlăm dŭm “Klei Mtô Ti Dlông Čư̆” Khua Yang Yêsu mtô kơ phung ƀĭng kna, jing phung ƀuôn sang mrâo kơ Buôn Ala Mtao Adiê. Khua Yang mtô lač kơ klei kpă ênô djŏ, čiăng kơ diñu dưi mŭt hlăm Ƀuôn Ala Mtao Adiê. Klei kpă ênô phung khua čih hră leh anăn phung Pharisi knŏng bi êdah rup ti êngao, diñu djă pioh klei bhiăn čiăng kơ arăng mpŭ bi mđĭ diñu, ƀiădah diñu amâo mâo klei kkuh mpŭ sĭt kơ Aê Diê ôh. Diñu myơr mnơ̆ng ngă yang, khăng kăm ƀơ̆ng huă, wah lač, rao kngan, myơr sa kdrêč hlăm pluh, “ƀiădah diih amâo uêñ ôh kơ klei yuôm hĭn hlăm klei bhiăn, jing klei kpă, klei pap, leh anăn klei đăo…” (Y-Mathiơ 23:23). Phung mnuih ƀuôn sang ênuk anăn mĭndah dôk hdĭp kpă ênô jing tui ngă msĕ si phung khua čih hră leh anăn phung Pharisi yơh jing hnơ̆ng čuăn čiăng dưi mŭt hlăm ƀuôn ala mtao adiê, ƀiădah Khua Yang Yêsu bi êdah leh klei ai ngăm diñu (dlăng Y-Mathiơ 23:1-39). Kyuanăn, Khua Yang mtô phung ƀĭng kna: “Kyuadah Kâo lač kơ diih, tơdah klei kpă ênô diih amâo jing kdlưn hĭn kơ klei kpă ênô phung khua čih hră leh anăn phung Pharisi, diih amâo srăng mŭt hlăm ƀuôn ala mtao adiê ôh” (êlan 20).
Khua Yang Yêsu mtô klei kpă ênô phung ƀĭng kna brei “kdlưn hĭn”, čiăng lač brei êgao dlông hĭn, anei jing klei kpă ênô mơ̆ng lam ai tiê. Phung khua čih hră leh anăn phung Pharisi djă pioh klei bhiăn mơ̆ng đưm lar čuê hŏng klei blŭ kjăp snăk, ƀiădah Klei Aê Diê Blŭ mtô snei, amâo mâo ôh pô dưi yap kpă ênô kyua hŏng bruă ñu ngă, ngă bruă klei bhiăn bi êdah ti êngao… “Ƀiădah hmei thâo leh Aê Diê yap mnuih kpă amâo djŏ kyua bruă tui si klei bhiăn ôh, ƀiădah hŏng klei đăo kơ Yêsu Krist. Wăt hmei pô mơh đăo leh kơ Krist Yêsu, čiăng dưi mâo klei yap kpă hŏng klei đăo kơ Krist, amâo djŏ hŏng bruă tui si klei bhiăn ôh, kyuadah arăng amâo dưi mâo ôh klei yap kpă hŏng bruă tui si klei bhiăn.” (Galati 2:16). Khua Yang Yêsu Krist yơh jing Pô klam brei klei soh drei, čiăng kơ hŏng klei anăn, jih jang hlei pô đăo kơ Ñu srăng dưi jing kpă ênô sơăi (II Kôrantô 5:21) leh anăn dưi mŭt hlăm Ƀuôn Ala Mtao Adiê.
Hruê anei, lu mnuih čhuai, mĭndah hŏng klei brei ngă bruă anei brei ngă bruă adih, brei mâo anôk bruă yuôm dlông, brei kiă kriê kdrăp ti êngao khuăt ênuah, brei … leh anăn brei… yơh čiăng dưi yap kpă ênô. Drei dôk juă ti dlông kru êlan klông hđăp phung Pharisi leh anăn phung khua čih hră hlăk êlâo. Akâo Khua Yang brei drei răk dlăng, hriăm Klei Aê Diê Blŭ jing Klei Blŭ Aê Diê hdĭp hlŏng lar, čiăng thâo klei Ñu čiăng leh anăn dôk hdĭp gưt hlue Klei Blŭ Khua Yang mtô. Khua Yang srăng brei drei dưi jing kpă ênô tơdah drei dôk hdĭp bi mơak kơ Khua Yang.
Si ngă drei mđing uêñ kơ bruă bhiăn ti êngao amâodah ai tiê drei hŏng Khua Yang?
Wah lač: Ơ Ama kpă ênô! Bi mni lač kơ Khua Yang brei leh kâo dưi jing kpă ênô kyua hŏng êrah yuôm Ih. Akâo Khua Yang bi mlih leh anăn bi doh ai tiê klei mĭn kâo grăp hruê hŏng Klei Blŭ hdĭp Khua Yang, čiăng kơ klei hdĭp kâo ƀrư̆ hruê ƀrư̆ jing msĕ si klei klă kluôm tui si klei Khua Yang čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 39
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
