Pajlug 24:5-9
Nqe cim:
“Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txojkev uas yog txoj tseeb. Tsis txhob xav hais tias koj yog tus ntse tshaj. Cia li hwm tus Tswv thiab tsis txhob mus ua kev txhaum.” (Pajlug 3:6-7)
Lus nug rau sawvdaws xav:
- Tswvyim muaj nqis npaum licas hauv kev ntaus rog?
- Peb kawm thiab nrhiav tswvyim qhovtwg los?
- Yuav ua cas peb thiaj kovyeej hauv kev ua rog sab ntsujplig?
Ua neej muaj tswvyim raws li Vajtswv Txojlus qhia yuav ua rau tau koob meej (Pajlug 3:35), yuav coj tau kev kho zoo thiab kev pab ntawm Vajtswv los (Pajlug 12:18). Thiab nyob hauv ntu Vajluskub uas peb kawm hnub no hais txog lub tswvyim ua rau muaj lub zog kovyeej.
Tswvyim tseem ceeb dua lub zog. Tswvyim ua rau muaj lub zog thiab kev npaj zoo kom kovyeej. Thaum mus ntaus rog, tsis yog tsuas siv coob tus tubrog muaj zog thiab coob tus nees xwb, tiamsis tseem yuav tsum muaj tej tswvyim zoo. Ib tug thawj tubrog uas txawj yeej ib txwm nrhiav tswvyim ntawm nws cov tuavxam – yog cov uas pab tswvyim rau nws muaj yeej.
Lo lus “ntawm lub rooj loog” (HMOWSV) yog hais txog qhov chaw uas cov thawjcoj, cov txiav txim plaub ntug tuaj sib ntsib sib tham thiab muab tswvyim rau tej haujlwm tseemceeb. Vim li ntawd, qhov chaw no yuav muaj ntau lub tswvyim tawm los, nyob hauv tej tswvyim ntawd yuav muaj qee lub tswvyim zoo thiab kuj muaj qee lub tswvyim ruam. Tej tswvyim ntawm tus neeg ruam txawm yuav hais tawm, los cov thawjcoj kuj tsis quav ntsej thiab tsis coj los siv. Ntawm lub rooj loog kuj yog qhov chaw uas cov txiav txim plaub ntug txiav txim rau cov pejxeem, cov neeg phem thiab neeg ua txhaum yuav raug txim kom tsimnyog (II Kevcai 21:19). Tus neeg uas ua neej muaj tswvyim yeej ua qhia tshwm los ntawm nws tus cwjpwm ncaj ncees thiab dawbhuv, qhov ntawd yog ib yam tseemceeb uas yuav tsum muaj hauv ib pab neeg. Cov neeg muaj tswvyim phem, dag ntxias, xav phem thiab khav theeb yuav raug muab tshem tawm ntawm pab pawg, vim thaum ua li ntawd pab tubrog thiaj li yuav muaj zog thiab kovyeej hauv kev ua rog.
Niaj hnub nimno, txhua tus ntseeg puavleej yog ib tug tubrog ntawm tus ntoo khaublig, peb yuav tsum tawmtsam dab Ntxwgnyoog lub hwjchim txhua hnub. Yuav kom muaj yeej hauv kev tsov rog sab ntsujplig no, peb txhua tus yuav tsum paub ua neej muaj tswvyim. Tsis yog peb tus kheej lub tswvyim, tiamsis yog nrhiav tswvyim ntawm Vajtswv. Vajtswv Txojlus hais tias: “Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txojkev uas yog txoj tseeb. Tsis txhob xav hais tias koj yog tus ntse tshaj. Cia li hwm tus Tswv thiab tsis txhob mus ua kev txhaum” (Pajlug 3:6-7). Peb txhua tus yuav tsum muab siab rau ntseeg thiab kub siab nyeem, kawm Vajtswv Txojlus txhua hnub, sib txuas lus nrog tus Tswv, kom tau Nws coj kev, taw qhia txog txojkev yuav tsum mus, tej kev phem yuav tsum qaij. Cia li hloov siab lees txim thiab tso tseg tej tswvyim phem, tej haujlwm txhaum, thiab kawm ua raws li Vajtswv txojkev hlub thiab kev ncaj ncees. Peb tsis nyob ib leeg hauv kev ua rog sab ntsujplig, tiamsis ib ncig ntawm peb yeej muaj cov neeg uas loj hlob sab ntsujplig pab peb; thiab tseem ceeb tshaj, Vaj Ntsujplig yog tus nyob nrog peb txhua tus hauv kob tsov rog no. Thov Vajtswv pab kom peb ua tau lub neej muaj tswvyim hauv Nws txhua hnub.
Peb los sib koom ua ke hauv kev thov Vajtswv,
Tus Tswv, nyuam yaus ua Koj tsaug vim Koj pub Vaj Ntsujplig coj kev, taw qhia nyuam yaus txojkev nrog Koj mus. Thov pub rau nyuam yaus tas siab nrhiav, kawm tej tswvyim thiab paub khiav deb tej kev txhaum. Nyuam yaus tuav Yexus Khetos lub npe thov, Amees.
Puas muaj yam twg uas peb yuav tsum hloov kom lub neej loj hlob mus ua ib lub neej muaj tswvyim hauv Vajtswv?
Nyeem Vajluskub hauv peb lub xyoos: Yaxayas 52
Kênh Youtube BHKTHN:
