Klei Aê Diê Blŭ: Klei Bi Hriêng 24:5-9
Êlan kliăng: “Hdơr bĕ kơ Ñu hlăm jih êlan ih êbat, leh anăn Ñu srăng bi kpă êlan ih. Đăm yap ih pô thâo mĭn ôh; huĭ mpŭ bĕ kơ Yêhôwa leh anăn đuĕ bĕ mơ̆ng klei jhat.” (Klei Bi Hriêng 3:6-7)
Klei êmuh ksiêm mĭn: Si ênoh yuôm klei thâo mĭn hlăm klei bi blah? Mơ̆ng anôk hriăm leh anăn duah klei thâo mĭn? Si ngă čiăng drei dưi hĭn hlăm klei bi blah hlăm mngăt?
Hdĭp thâo mĭn hlue si klei Aê Diê mtô ba klei guh kơang (Klei Bi Hriêng 3:35), ba klei bi hlao, kăp đru mơ̆ng Aê Diê (Klei Bi Hriêng 12:18). Leh anăn hlăm trăn Klei Aê Diê Blŭ hruê anei mñă klă kơ klei thâo mĭn ba klei dưi ktang čiăng mâo klei dưi hĭn.
Klei thâo mĭn yuôm bhăn hĭn kơ ai ktang. Klei thâo mĭn ba klei ktang leh anăn klei jăk hĭn čiăng mâo klei dưi. Klei bi blah êngao kơ bruă knang kơ ênoh lu mnuih, ai ktang mơ̆ng phung kahan, ênoh aseh lu, lŏ brei mâo klei thâo yua mnêč. Khua gĭt gai mbruă brei mđing hmư̆ klei thâo mĭn mơ̆ng phung kahan, jing phung mnuih amâodah êpul đru kčĕ čiăng mâo klei dưi kluôm dhuôm. Boh blŭ “ti anôk ƀăng jang” lač kơ phung khua phat kđi, phung khua gĭt gai bi trông, myơr klei thâo mĭn kơ bruă yuôm bhăn, kyua anăn tinei srăng mâo lu klei mĭn, hlăm anăn mâo klei đru mguôp thâo mĭn leh anăn ăt mâo mơh klei mĭn mluk. Klei mĭn phung mluk wăt tơdah lač dưn mơh ăt kăn mâo phung khua gĭt gai mđing uêñ leh anăn hlue ngă rei.
Ti anôk ƀăng jang ăt jing anôk phung khua phat kđi ksiêm dlăng klei soh mnuih ƀuôn sang, phung ngă măk ƀai, soh jhat brei tŭ klei bi kmhal ktang snăk (Klei Mtô Mñă Klei Bhiăn 21:19). Mnuih hdĭp thâo mĭn bi êdah nanao hlăm knuih hdĭp kpă ênô, doh jăk, anei ăt jing klei brei răng kriê hlăm êpul lu. Phung mâo klei mĭn măk ƀai, hiu mplư, phung mâo klei mĭn soh jhat, ngă mgao brei suôt mơ̆ng êpul lu, kyua snăn kơh êpul kahan dưi kjăp ktang leh anăn dưi hlăm klei bi blah.
Hruê anei, grăp čô phung đăo jing sa čô lĭng kahan kyâo bi kal, brei drei bi blah hŏng phung yang jhat grăp hruê. Čiăng dưi hĭn hlăm klei bi blah hlăm mngăt anei brei grăp čô drei thâo hdĭp thâo mĭn, ƀiădah amâo djŏ jing klei thâo mĭn drei pô ôh ƀiădah brei tui duah klei thâo mĭn mơ̆ng Aê Diê. Klei Aê Diê Blŭ čih: “Hdơr bĕ kơ Ñu hlăm jih êlan ih êbat, leh anăn Ñu srăng bi kpă êlan ih. Đăm yap ih pô thâo mĭn ôh; huĭ mpŭ bĕ kơ Yêhôwa leh anăn đuĕ bĕ mơ̆ng klei jhat” (Klei Bi Hriêng 3:6-7). Grăp čô drei brei sĭt suôr leh anăn hur har dlăng, hriăm Klei Aê Diê Blŭ grăp hruê, wah lač bi mguôp hŏng Aê Diê čiăng tui duah klei ktrâo atăt, bi hriăm mơ̆ng Aê Diê kơ êlan drei srăng nao, klei măk ƀai brei drei ñĕ đuĕ. Kmhal bĕ kơ klei soh leh anăn lui jih klei măk ƀai, klei ngă soh, leh anăn hriăm hlue ngă klei khăp, klei kpă ênô Khua Yang. Drei amâo hjăn păn ôh tơdah bi blah, ƀiădah riêng gah drei mâo nanao phung mâo klei hdĭp mngăt đĭ hriê kơ prŏng hrăm mbĭt kăp đru, leh anăn yuôm bhăn hĭn, Yang Mngăt Jăk dôk mbĭt nanao hŏng drei hlăm klei bi blah anei. Akâo kơ Khua Yang brei drei hdĭp thâo mĭn hlăm Khua Yang.
Ya klei brei drei bi mlih čiăng mđĭ kyar knuih hdĭp thâo mĭn hlăm Khua Yang?
Wah lač: Ơ Khua Yang, kâo bi mni kơ Ih brei leh Yang Mngăt Jăk ktrâo atăt, mtô lač kơ kâo hlăm êlan tui hlue Ih. Akâo kơ Ih đru kơ kâo jih ai tiê tui duah, tui hriăm klei thâo mĭn leh anăn ñĕ kbưi kơ klei soh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 52
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
