Pajlug 22:24-25
Nqe cim:
“Tsis txhob ua phoojywg nrog cov neeg uas siab ceev thiab ua nruj ua tsiv.” (Pajlug 22:24)
Peb saib ntxiv hauv phau txhais tshiab,
“Tsis txhob nrog tus uas chim taus ua phoojywg, thiab tsis txhob nrog tus uas npau sai ua ke.” (Pajlug 22:24 Hmowsv).
Lus nug rau sawvdaws xav:
– Vajntxwv Xalumoos ntuas cov menyuam yam dabtsi thiab vim li cas menyuam yuav tsum ua raws li ntawd?
– Nqi zog thaum keeb cov neeg phem yog dabtsi?
– Yuav ua li cas kom peb txawj hais lus thiab paub ceev faj thaum ntsib cov neeg siab ceev lossis ua nruj ua tsiv?
Vajntxwv Xalumoos txwv cov menyuam tsis pub mus keeb cov neeg phem, tshwjxeeb yog cov neeg siab ceev, ua nruj ua tsiv lawv thiaj tsis dhau mus ua neeg phem li cov ntawd. Lo lus “ua phoojywg” hauv nqe 24 muaj lub ntsiab lus hais tias “txuas nrog” lossis “koom nrog”, txhais tau hais tias muaj qhov kev xyaum tau. Tus neeg uas siab ceev lossis ua nruj ua tsiv koom tib tug mojyam yog tswj tsis tau lawv tus kheej mus txog qib uas ua tau qhov tsis yog, tsis paub tswj siab, hais tsis yog, kev ua tsis raws cai. Thaum npautaws, cov neeg no lub hlwb tsis paub dabtsi, lawv xav tsis txog qhov nqi zog yuav raug thaum ua lossis hais lus.
Vajntxwv cov lus samhwm hais meej tseeb, qhia kom cov menyuam paub qaij lossis ua tib zoo saib thaum nrog cov neeg siab ceev, ua nruj ua tsiv ua ke thiaj tsis raug tej kev tsis zoo. Qhov uas tej phoojywg tsis zoo yaum yuav coj cov menyuam mus raug tej kev puastsuaj nyob hauv lub neej. Vim cov neeg phem muaj lub siab xav kom cov menyuam ua raws li lawv ua. Timthawj Paulus ceebtoom, “tus uas mus nrog tus uas ua phem nyob ua ke, nws yeej yuav ua phem li tus ntawd.” (I Kauleethaus 15:33). Nqi zog txaus ntshai heev yog; “nyob tsam koj mus xyaum ua li lawv” (nqe 25). Tus tsiaj mag ntxiab yeej tsis paub ua ntej. Kuj ib yam nkaus li ntawd, thaum nrog cov neeg siab ceev, ua nruj ua tsiv ua ke, cov menyuam yuav tsum xyaum tau raws li lawv ua, txawm yog menyuam tsis tau paub txog qhov uas lawv ua ntawd. Thiab qhov uas txaus ntshai dua mas yog thaum mag lawv rooj ntxiab lawm, cov menyuam yuav dim tsis tau.
Yakaunpaus qhia hais tias: “Cov kwvtij uas kuv hlub, nej yuav tsum nco ntsoov hais tias txhua tus yuav tsum kub siab lug mloog, tiamsis tsis txhob maj hais thiab tsis txhob chim sai. Rau qhov peb tej kev chim yeej pab tsis tau kom peb ua tau neeg ncaj ncees raws li Vajtswv lub siab nyiam.” (Yakaunpaus 1:19-21). Thov Vajtswv pab kom peb txhua tus paub qhov tseemceeb thaum tswj tau yus lub siab. Tsis xaiv ua raws li yus qhov kev paub tiamsis txo hwjchim kawm thiab txais yuav Vajtswv Txojlus qhia, ua neeg dawbhuv li tus Tswv qhia, coj tus ntsujplig mus kom tau txojsia ntev ibtxhis. Vamkhom Vajtswv Txojlus qhia, peb paub ua tej haujlwm zoo lossis paub qaij cov neeg siab ceev, ua nruj ua tsiv kom peb thiaj tsis mag lawv rooj ntxiab tua peb sab ntsujplig.
Thov Vajtswv,
Tus Tswv, nyuam yaus ua Koj tsaug vim muaj Koj Txojlus qhia nyuam yaus ua neej kaj siab, zoo siab. Thov Koj pab kom nyuam yaus muaj lub siab txo hwjchim txais yuav Koj Txojlus, nyuam yaus thiaj paub thiab qaij deb txojkev phem. Nyuam yaus tuav Tswv Yexus lub npe thov, Amees.
Peb puas qaij deb cov neeg siab ceev lossis cov neeg ua nruj ua tsiv?
Nyeem Vajluskub hauv peb lub xyoo: I Xamuyees 15
Kênh Youtube BHKTHN:
