II Hơ’mon 29:12-19
Trong tơm: “Lu sư akŭm lu ‘nhŏng oh lu sư păng hơmet kơdih akâu rơgoh, na pơm kiơ̆ thoi pơtao đei bơtho khan kiơ̆ kơ nơ̆r Kră Yang hơmet rơgoh hnam Kră Yang” (II Hơ’mon 29:15).
Nơ̆r jet tơchĕng pơwao:
– Đơ̆ng rŏng kơ kơtơ̆ng Hesekia krao pơtao lei lu bơngai Lêwi pơm kiơ?
– Yua kơ kiơ lu sư mơ̆ng pơm kiơ̆ hloi nơ̆r Pơtao athei?
– Lu bơ̆n kăl kơ tŭk lê̆ tơdrong kiơ đơ̆ng lăm chăl arih bơ̆n?
Đơ̆ng rŏng kơ kơtơ̆ng nơ̆r Pơtao krao pơtơm hơmet kơdih kâu mă rơgoh păng sut hơmet Hnam Akŭm Kră Yang Yêhôwa na lu bơngai Lêwi chu pơm kiơ̆ hloi, rơih iŏk mơjĭt puăn ‘nu klah asong ăn tơdrong jang. Lu bơngai pơgơ̆r âu pơm kiơ̆ nơ̆r pơtao, păng adrol hloh noh trŏ thoi Nơ̆r Kră Yang Yêhôwa akhan, pơpôi akŭm dih băl, adrol hloh hơmet kơdih kâu mă rơgoh kiơ̆ kơ ôp mă rơgoh gah ‘nguaih. Đơ̆ng rŏng kơ noh pơtơm jang ôp rơgoh yua kơ lu sư đĕch gơh mơ̆t tơ lăm Hnam Akŭm. Lu bơngai Lêwi klơ̆m tŭk đĭ lu rup yang nai lăng krưp dêh tŭk lê̆ tơ thong đak Sêt rôn, jơ̆ anih đe juăt kơ soh lu rup yang (II Hơ’mon 15:16).
Lăm tơhngam năr blŭng a, lu hơmet đơ̆ng ‘nguaih mơ̆t tơ lăm, rim năr rai rơgoh hloh dơ̆ng. Lu sư hơmet tơ gah ‘nguaih tơ lăm cham; đơ̆ng rŏng kơ ‘noh hơrĭ truh tơ kơdeng hnam păng tơ lăm Hnam Akŭm. Tơdrong ôp rơgoh Hnam Akŭm gơh pơm keh truh tơ mơjĭt tơdrâu năr, ‘bôh tơdrong kơnê̆ ‘mê̆ ‘mach dêh đơ̆ng chăl pơtao Ahas. Kơplah pơm keh tơdrong jang, lu sư mơ̆t tơ lăm hnam Pơtao, roi tơbăt đei pơm keh. Mă mônh, lu sư roi tơbăt lu sư ôp rơgoh jơ̆p jang lăm Hnam Akŭm lăm noh, chơnang soi ‘buh pơkhôi păng đĭ đăng lu tơmam; chơnang ‘măn lê̆ ‘bĕng păng đĭ lu tơmam; Ma ‘bar, lu sư dan pơrĕng lê̆, pơm mă rơgoh păng dan lê̆ tơmam soi tơ chơnang soi Kră Yang păng lu tơmam lăm Hnam Akŭm đơ̆ng adrol sơ̆ mă pơtao Ahas đei klơ̆m hŭt lê̆ (II Hơ’mon 28:24).
Tơdrong jang Pơtao Hesekia ôp rơgoh lăm Hnam Akŭm pơm kơ lu bơ̆n đei tơchĕng ‘blŏk khul bơngai lui noh kư̆m thoi lu ‘bok soi ăn kơ Kră Yang (Tơdrong Tơ’bôh 5:9-10), lu bơ̆n athei ôp kơdih kâu bơ̆n ‘mơ̆i păng hơmet lê̆ dôm tơdrong kơnê̆ ‘mê̆ ‘mach lăm chăl arih bơ̆n, rup yang lăm ala teh âu, kơplah bơ̆n lui sơng iŏk Kră Yang Yêsu, lu bơ̆n gơh ôp rơgoh hăm pham kăp Kră Yang Yêsu ôp rơgoh dôm tơdrong yoch kơnê̆ ‘mê̆ ‘mach, mă-lei đơ̆ng rŏng kơ noh chăl arih oei pơm yoch dơ̆ng, yua kơ thoi noh, lu bơ̆n kư̆m đei đơ̆ng ‘bok Pôl krao pơtơm: “Ơ lu ‘nhŏng oh mă inh ‘mêm kơeng, yua ‘Bok Kei-Dei wă ăn kơ bơ̆n jing kon Sư thoi noh bơih, na bơ̆n athei tŭk lê̆ đĭ dôm tơdrong kơnê̆ ‘mê̆ ‘mach đơ̆ng akâu bơ̆n juăt kơ pơm.” Sư kư̆m krao lu bơ̆n athei tŭk lê̆ đĭ lu rup yang, dôm chhur nuih, ơh blĕk kư̆m lơ tơdrong kơnê̆ noh nai dơ̆ng lăm chăl arih bơ̆n (Êphêsô 4:31). Đei lu tơdrong kơnê̆ ‘mê̆ ‘mach mơ grĭ mă mong ‘bĕnh đunh khei ‘năr lăm jơhngơ̆m bơ̆n păng lăm chăl arih mă bơ̆n athei krao apinh Kră Yang dŏng pơklaih. Bơ̆n ‘nĕ tơchĕng khan dôm blĕk ơh, chhur nuih lăm jơhngơ̆m bơ̆n ‘noh iĕ đĕch, hơi đĕch, ưh kơ kăl kơ tŭk lê̆ ôh, mă-lei athei pơm hloi ôp rơgoh lăm chăl arih bơ̆n, yua kơ ‘noh Kră Yang wă lăp đon mă đei chih bơih lăm nơ̆r Sư. Păng mă kăl hloh kơ noh dơ̆ng noh jơ̆ dôm tơdrong kơnê̆ ‘mê̆ ‘mach sư ‘bơm pơgăn tơdrong bơ̆n tơ’bưh hăm Kră Yang Yêsu. Tơ’ngla mă lôch tang lu bơ̆n.
Lu bơ̆n oei đei tơdrong kơnê̆ ‘mê̆ ‘mach hơyơ lăm chăl arih bơ̆n, kăl kơ ôp hơmet rơgoh, lu rup yang hơyơ mă kăl kơ soh tŭk lê̆?
Ơ Kră Yang, apinh pơchrang hơdah ăn kơ inh, wă kơ inh băt dôm tơdrong kơnê̆ ‘mê̆ ‘mach lăm jơhngơ̆m inh. Apinh Ih mơnat ăn dôm tơdrong yoch kơnê̆ ‘mê̆ ‘mach inh păng ôp rơgoh dôm tơdrong âu đơ̆ng lăm chăl arih inh, wă kơ gơh đei yua ăn kơ Ih. Yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 14
Kênh Youtube BHKTHN:
