Txoj Kevcai Ncaj Ncees – 14/10/2022

552

 

 

II Kevcai 17:8-13

Nqe cim:

“Kuv haivneeg, nej cia li mloog kuv hais, thiab nej cia li tig pobntseg mloog kuv tej lus; kuv txoj kevcai thiab txojkev ncaj ncees yuav ua lub teeb ci rau txhua haivneeg pom kev” (Yaxayas 51:4).

Lus nug rau sawvdaws xav:

  • Vajtswv qhia licas txog kev tu tej rooj plaub uas nyuaj?
  • Vim licas tus uas tsis mloog cov tu plaub hais yuav raug tua povtseg?
  • Peb siv zaj kawm no licas rau Vajtswv Pawg Ntseeg niaj hnub nimno?

Raws li haivneeg Yixalayees, ces Vajtswv txoj kevcai kuj yog tebchaws txoj kevcai, thiab cov kws tshawb fawb los txhais thiab siv txojcai ntawd rau kev ua neej ces yog cov povthawj uas yog xeem Levis. Nyob hauv tshooj 16, Vajtswv twb qhia kom Nws haivneeg yuav tsum xaiv tsa ib pab neeg los ua cov txiav txim, thiaj yuav muaj kev ncaj ncees nyob hauv txhua lub nroog. Tiamsis yog hais tias muaj tej rooj plaub nyuaj uas tsis pom qab txiav txim, xws li: plaub txeeb teb, plaub sib ntaus, plaub tua neeg, ces lawv yuav tsum coj tej rooj plaub ntawd mus hais rau ntawm qhov chaw Vajtswv xaiv ua chaw pehawm. Nyob qhov ntawd, cov povthawj thiab cov tu plaub yuav ua tib zoo mloog thiab txiav txim siab. Rooj plaub ntawm qhov chaw dawbhuv yog rooj txiav txim kawg, yog li ntawd sawvdaws yuav tsum ua txhua yam raws li tej lus txiav txim, tus neeg raug foob tsis muaj cai los thov hais dua lossis tawmtsam tej lus uas tau txiav txim.

Peb tsis paub hais tias kev sib koom txiav txim ntawm cov povthawj thiab cov tu plaub ntug zoo licas, tiamsis cov povthawj uas yog xeem Levis yog cov uas txawj cai, lawv tes haujlwm yog txheeb xyuas thiab tawm lus qhuab ntuas, lawv kuj muaj cai hais tej lus txiav txim, yog li ntawd tus Tswv qhia kom sawvdaws yuav tsum ua raws li lawv tej lus txiav txim huv tibsi, tsis pub hloov lus. Leejtwg saib tsis taus cov povthawj thiab cov tu plaub tej lus txiav txim, ces yuav raug muab tua povtseg, vim nws saib tsis taus Vajtswv txoj kevcai. Kev txiav txim ncaj ncees thiab nruj li ntawd tseem muaj lub homphiaj yog hem kom luag ntshai tsis kam ua txhaum ntxiv lawm.

Tus Tswv txoj kevcai ncaj ncees yog ua kom muaj kev ncaj ncees hauv tus Tswv haivneeg, tsis pub “ib nyuag qhov keeb… ua rau ib phaj hmoov su tag huvsi” thiab ceev txuag kev sib coglus ntawm Vajtswv rau Nws haivneeg (I Kauleethaus 5:6-13). Niaj hnub nimno, tus Tswv Pawg Ntseeg yuav tsum coj raws li tej kevcai tswj kom sawvdaws thiaj nyob tiaj tus. Vajtswv tus uas peb tabtom pehawm tsis yog tus Vajtswv uas nyiam kev kub ntxhov, kev ua dog ua dig, tiamsis yog tus uas nyiam kev tus yees, muaj hauvpaus hauvntsis thiab muaj kev kaj siab (I Kauleethaus 14:33). Yog muaj kev kub ntxhov lossis ua txhaum cai, tus saibxyuas Pawg Ntseeg yuav tsum siv txojkev hlub los txiav txim raws li Vajtswv Txojlus qhia thiab raws li txojcai, txhob txiav txim raws li tus kheej siabnyiam ua rau tsis muaj kev ncaj ncees. Cov uas tau ua tes haujlwm txiav txim yuav tsum lees ris txhua yam tabmeeg tus Tswv thiab tus Tswv yuav rau txim rau tus uas saib tsis taus tus Tswv txoj kevcai.

 

Thov Vajtswv

Tus Tswv, thov ua Koj tsaug, vim Koj yog tus uas ncaj ncees thiab Koj txoj kevcai kuj yog ncaj ncees. Thov pab nyuam yaus ua tib zoo ua raws li tej kevcai tswj hauv Pawg Ntseeg thiab hauv lubneej thiaj yuav ua rau Koj tau koobmeej. Amees.

Peb puas ua raws tej kevcai tswj hauv Pawg Ntseeg lawm tau?

Nyeem Vajluskub hauv peb lub xyoos: Yaxayas 38:1-39:8

Kênh Youtube BHKTHN:

https://www.youtube.com/c/bhkthn

Bài trướcCần Thơ: Hiệp Nguyện Tháng 10/2022
Bài tiếp theoKlei Bhiăn Kjăp Phĭt – 14/10/2022