Klei Aê Diê Blŭ: Klei Mtô Mñă Klei Bhiăn 17:8‑13
Êlan kliăng: “Ơ phung ƀuôn sang Kâo, hmư̆ bĕ Kâo, Ơ phung găp djuê Kâo, mđing bĕ knga kơ Kâo. Kyuadah klei bhiăn srăng kbiă mơ̆ng Kâo, leh anăn klei kpă Kâo srăng jing klei mngač kơ phung găp djuê mnuih” (Y‑Êsai 51:4).
Klei êmuh ksiêm mĭn: Ya klei Aê Diê mtô kơ bruă phat kđi klei truh dleh đei? Si ngă phung amâo gưt kơ khua phat kđi anei arăng srăng bi mdjiê? Si drei mă yua kơ Phung Sang Aê Diê hruê anei?
Hŏng phung buôn sang Israel, klei bhiăn Aê Diê jing klei bhiăn knŭk kna, leh anăn phung ksiêm hriăm êlam čiăng dưi mblang leh anăn yua klei bhiăn anăn kơ klei hdĭp jing phung khua ngă yang Lêwi yơh. Hlăm kdrêč 16, Aê Diê tuôm lač leh kơ phung ƀuôn sang Ñu brei mdơ̆ng knơ̆ng khua phat kđi hlăm ƀuôn sang čiăng dưi krơ̆ng klei kđi kpă ênuah. Ƀiădah mâo đa klei truh dleh đei, klei blŭ kđi amâodah klei ngă bi êka êgao kơ klei phung blŭ kđi hlăm ƀuôn sang dưi msir mkra, snăn brei diñu kgŭ nao djăl mtam ba klei kđi anăn truh kơ anôk Aê Diê ruah, tinăn phung khua ngă yang Lêwi leh anăn phung khua phat kđi dôk djă bruă srăng ksiêm bi nik hŏng klei răng leh anăn hưn brei kđi. Anôk phat kđi doh jăk anei jing anôk phat kđi tuč ruê̆ snăn klei kđi čuăn leh, pô ba kđi amâo dưi lŏ kčŭt kđi amâodah bi kdơ̆ng kđi ôh.
Si klei bi mguôp klei phat kđi ti krah phung khua ngă yang leh anăn khua phat kđi dôk djă bruă drei amâo klă ôh, ƀiădah phung khua ngă yang Lêwi jing phung thâo êlam klei bhiăn, diñu mâo bruă klam mblang bi klă mngač, mtô mtă leh anăn hưn kđi, kyuanăn Aê Diê mtô jih jang mnuih brei khut khat gưt hlue, amâo dưi bi weh klei kđi diñu hưn leh thâodah tĭng hnuă amâodah tĭng điâo. Hlei pô ngă hŏng klei mgao amâo gưt klei hưn kđi phung khua ngă yang arăng srăng bi mdjiê, kyuadah diñu dlăng hơăi mang klei bhiăn Aê Diê. Klei phat kđi kpă ênô leh anăn kjăp phĭt msĕ snăn wăt kñăm čiăng kơ phung mkăn huĭ leh anăn amâo jhŏng lŏ ngă klei soh ôh.
Klei bhiăn kjăp phĭt Aê Diê kñăm čiăng djă pioh klei doh jăk hlăm phung ƀuôn sang Ñu, amâo lui “kpei ƀiă dưi bi buk jih klŏ kpŭng” ôh, leh anăn čiăng djă pioh klei bi mguôp ti krah Aê Diê hŏng phung ƀuôn sang Ñu (I Kôrantô 5:6‑13). Hruê anei, Phung Sang Aê Diê brei djă pioh nanao klei kpĭ mjuăt čiăng krơ̆ng klei bhiăn, mâo pruê̆ êlan hlăm phung ƀuôn sang Aê Diê. Aê Diê drei kkuh mpŭ amâo djŏ jing Aê Diê kơ klei mtŭk mtŭl ôh. Ñu jing Aê Diê kơ klei êđăp ênang leh anăn mâo pruê̆ êlan (I Kôrantô 14:33). Tơdah mâo klei bi mneh msao amâodah klei gao klei bhiăn snăn brei phung gĭt gai Phung Sang Aê Diê msĭr mkra hŏng klei khăp, djŏ tui si klei Khua Yang mtô leh anăn tui si klei bhiăn, amâo dưi lui klei mĭn pô bi kgăn ôh huĭdah klei mkra srăng kƀah klei kpă ênô, klă mngač. Pô mâo bruă jao msĭr mkra brei tŭ bruă klam ti anăp Aê Diê leh anăn Ñu srăng phat kđi hlei pô dlăng hơăi mang klei bhiăn Ñu.
Si ngă drei mâo kdrêč mguôp djă poh klei bhiăn hlăm Phung Sang Aê Diê mơ̆?
Wah lač: Ơ Khua Yang, bi mni kơ Khua Yang kyua Ih jing Pô kpă ênô, klei bhiăn Ih jing kjăp phĭt. Akâo Khua Yang brei kâo djă pioh klei bhiăn Ih kjăp phĭt hlăm Phung Sang Aê Diê wăt hlăm klei hdĭp grăp hruê, čiăng kơ Anăn Khua Yang mâo klei guh kơang nanao.
Dlăng Klei Aê Diê Blŭ hlăm tlâo thŭn: Y‑Êsai 38:1–39:8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
