Henplais 9:1-10
Nqe cim:
“Thaum npaj tej ntawd txhij rau hauv lawm, cov povthawj yuav tsum niaj hnub mus hauv lub tsevntaub chav ntawd ua lawv tes haujlwm. Tiamsis tsuas yog tus Povthawj Hlob tib leeg xwb thiaj mus tau rau hauv Chav Dawbhuv. Ib xyoos nws mus ib zaug; nws nqa cov ntshav tsiaj coj mus fij daws nws thiab daws sawvdaws tej kev txhaum uas sawvdaws yuam kev ua lawm” (Henplais 9:6-7).
Lus nug rau sawvdaws xav:
– Txoj cai pehawm hauv Lub Tsevntaub muaj ua ntu zus licas?
– Ua li ntawd xav qhia dabtsi txog Vajtswv thiab txog tibneeg?
– Koj tau qhuab ntuas licas thaum kawm paub txoj cai pehawm no?
Lub Tsevntaub yog qhov chaw uas tibneeg tshwm ntsejmuag nrog Vajtswv tus uas muaj hwjchim. Tiamsis, cov pejxeem tsuas tau sawv sab nraud Lub Tsevntaub xwb. Tsuas yog cov povthawj uas tau faib haujlwm lawm thiaj tau mus rau hauv Chav Dawbhuv ua tej kevcai ntawm txhua hnub. Feem ntau tej haujlwm tsuas ua rau sab nraum zoov, nyob deb Chav Dawbhuv Kawg Nkaus uas muaj Vajtswv tshwm ntsejmuag. Tsuas yog Tus Povthawj Hlob tibleeg xwb, thiaj tau cai mus lawm hauv Chav Dawbhuv kawg nkaus ib lub xyoos ib zaug. Txawm li ntawd, los nws yuav tsum nqa ntshav tsiaj mus fij daws nws tus kheej thiab sawvdaws tej kev txhaum uas tau ua yuamkev lawm (nqe 7).
Txoj cai pehawm hauv Lub Tsevntaub qhia pom txog Vajtswv yog tus Dawbhuv kawg nkaus tiamsis tibneeg puv npo kev txhaum. Thiab tej kev txhaum yog yam thaiv ntis tibneeg mus cuag Tus Uas Muaj Hwjchim Loj Kawg nkaus, txawm yuav yog tus Povthawj Hlob los kuj mus cuag tsis taus. Daim ntaub thaiv Chav Dawbhuv thiab Chav Dawbhuv Kawg Nkaus kuj yog tus ntsa yeej khov kho thaiv tibneeg txhaum los cuag Vajtswv tus uas dawbhuv. Txoj haukev uas yog nqa tej ntshav tsiaj tuaj fij tsuas yog tes haujlwm sab nraud, uas daws tau tej teebmeem raws li kevcai (nqe 10) tiamsis “pab tsis tau kom cov neeg uas tuaj pehawm Vajtswv ua tau neeg zoo” (nqe 9). Vim kev txhaum tsis yog tsuas hais txog tej kev phem, tes haujlwm yuamkev sab nraud xwb tiamsis kev txhaum pib hauv lub siab tawmtsam Vajtswv tuaj, yog li ntawd txhua tes haujlwm raws li txojcai sab nraud daws tsis tau tej teebmeem nyob sab hauv “lub siab”.
Thaum kawm txog txoj cai pehawm raws li qub Kevcai yog kev qhuab ntuas tseemceeb rau peb paub hais tias, yog tsis muaj Tswv Yexus, peb yeej tsis muaj cuabkav los cuag Vajtswv tus uas dawbhuv, tej haujlwm zoo uas peb siv zog ua tsuas zoo li lub tsho qias tabmeeg tus Tswv xwb, thiab peb lub siab tseem pheej quaj dhi rau tej kev txhaum uas tus kheej tau ua. Qhov ntawd ua rau peb nco Tswv Yexus tej txiajntsig vim peb muaj Nws ua peb tus Tswv Cawmseej. Los ntawm Tswv Yexus, niaj hnub nimno peb thiaj muaj cuabkav los cuag Vajtswv thiab pehawm Nws.
Thov Vajtswv
Tus Tswv, tomqab uas kawm txog cov Yixalayees txoj cai pehawm, nyuam yaus pom hais tias tus kheej phem qias, muaj kev txhaum, thiab tsis tsimnyog nyob ze Koj. Tiamsis los ntawm Tswv Yexus txojkev tuag theej txhoj nyuam yaus thiaj tau hloov dua tshiab, tau ywjpheej thiab muaj cuabkav los pehawm Koj. Nyuam yaus thov fij tus kheej ua yam khoomfij uas ciaj sia thiab dawbhuv los pehawm Koj. Amees.
Peb tabtom siv kev ywjpheej nyob ze thiab pehawm tus Tswv licas lawm?
Nyeem Vajluskub hauv peb lub xyoos: Lukas 20:27-21:4
Kênh Youtube BHKTHN:
https://www.youtube.com/c/bhkthn
