Pajlug 22:2-4
Nqe cim:
“Txo koj lub hwjchim thiab hwm tus Tswv, koj thiaj yuav muaj txiag npluanuj, muaj koob meej thiab muaj sia ua neej nyob ntev” (Pajlug 22:4)
Lus nug rau sawvdaws xav:
– Vim licas tus Tswv cov menyuam yuav tsum ua neej txo hwjchim thiab hwm tus Tswv?
– Nqi zog rau tus ua neej txo hwjchim thiab hwm tus Tswv yog dab tsi?
– Vim licas peb tsis txaj muag, tiamsis kuj tsis txhob muab hlob?
Tibneeg yog Vajtswv tsim, txhua tus yeej muaj nqis ib yam nkaus txawm tias thaum ua neej nyob yeej muaj tus muaj tus pluag. Nyob ntawm Vajtswv xubntiag, tsis muaj leej twg raug tshem tawm thiab txhua tus puavleej tau saib hlob ib yam nkaus. Yog leejtwg saib tsis taus tus txomnyem, ua phem rau tus pluag, ces tus ntawd tsis hwm tus Tswv. Vajtswv Txojlus qhia hais tias: “Yog koj caij tsuj cov neeg pluag, ces yog koj saib tsis taus Vajtswv tus uas tsim lawv. Tiamsis kev ua siab dawb paug rau cov pluag yog kev qhuas Vajtswv” (Pajlug 14:31). Tiamsis, tus pluag kuj txhob saib tsis taus, khib lossis suav hais tias txhua tus npluanuj puavleej yog neeg phem, kuj txhob hais lus qab roj qab ntsev los qhuas lossis koom siab nrog tus npluanuj ua tej yam phem. Tus Tswv cov menyuam yuav tsum txo hwjchim vim txo hwjchim yog qhia tshwm lub neej uas hwm tus Tswv.
Saib rau lwm seem, tus neeg txo hwjchim qhia tshwm kev ua neej muaj tswvyim raws li tus Tswv txojcai uas dawbhuv. Kev txo hwjchim pab rau tibneeg tsis khav theeb, tsis muab hlob, tiamsis xyuamxim ntsuamxyuas tes haujlwm, ntaus nqi rau kev ua zoo kom zeem paub qhov phem thiab qaij deb. Nyob puag thaum chivkeeb los, Vajtswv twb pub rau tibneeg muaj kev ywjpheej tiamsis tibneeg yuav tsum ris lub nra raws li nyias kev xaiv. Yog xaiv ua neej khav theeb, mus raws txojkev phem, yuav qaij tsis dhau teebmeem. Tiamsis yog xaiv ua neej txo hwjchim thiab hwm tus Tswv, yuav muaj txiag npluanuj, muaj koob meej thiab muaj sia ua neej nyob ntev (nqe 4).
Nrog rau kev vammeej hauv kev tshaj xov xwm nyob tiam niajhnub nimno, peb yoojyim paub tej xov xwm txog ntau tus neeg npluanuj ua neej phum lam ntsuav tsis xav txog lwm tus, ntau tus neeg npluanuj muab hlob, khav theeb, saib tsis taus txojcai, qhuab yuam caij tsuj cov neeg pluag. Kuj muaj qee tus neeg pluag ntshaw nyiaj txiag, khav theeb, xav tias tus kheej muaj txaus tswvyim nrhiav txhua txojkev ua kom npluanuj sai, vim nyiaj txiag tsis quav ntsej txojcai ua zoo, thaum kawg “tau chaw ti” lossis “raug ceeblaj” (nqe 3). Lawv ua poob txojkev muaj nqis ntawm tibneeg uas Vajtswv tsim muaj.
Tus Tswv xav kom Nws cov menyuam yuav tsum ua neej txo hwjchim thiab hwm Nws txhua lub tsamthawj. Tus Tswv tau tuag txhiv txhua tus kev txhaum, tsis hais tus muaj thiab tus pluag, yog li ntawd tsis muaj dabtsi yuav ua rau peb txajmuag tsis pom txog qhov muaj nqis ntawm peb tus kheej; kuj tsis vim nyiaj, meejmom ua rau peb ua neeg muab hlob. Raws li tus sau phau Pajlug txojkev paub, thaum ua neej txo hwjchim thiab hwm tus Tswv, tus Tswv yuav pub koobhmoov rau peb tsis yog thaum tseem ua neej nyob ntiajteb no xwb tiamsis tseem pub koobhmoov rau peb saum tebchaws Ceeb Tsheej thiab.
Thov Vajtswv,
Tus Tswv, nyuam yaus ua Koj tsaug vim Koj Txojlus qhuab ntuas nyuam yaus ntawm kev ua neej txo hwjchim thiab hwm Koj. Thov pab nyuam yaus paub qaijdeb kev txhaum, ua neej saib taus lwm tus, qhia tshwm koj txojkev hlub thiab kev ncajncees nyob hauv lubneej txhua hnub. Nyuam yaus tuav Yexus Khetos lub npe thov, Amees.
Peb ua neej li cas thaum zeem paub kev muaj nqis tseeb ntawm tus kheej?
Nyeem Vajluskub hauv peb lub xyoos: II Kevcai 29
Kênh Youtube BHKTHN:
