Klei Aê Diê Blŭ: Klei Bi Hriêng 22:2-4
Êlan kliăng: “Klei mưn kơ klei luă gŭ leh anăn klei huĭ mpŭ kơ Yêhôwa jing klei mdrŏng, klei arăng mpŭ, leh anăn klei hdĭp” (Klei Bi Hriêng 22:4)
Klei êmuh ksiêm mĭn: Ya ngă phung ƀuôn sang Aê Diê brei hdĭp luă gŭ leh anăn huĭ mpŭ kơ Aê Diê? Ya klei mưn kơ phung hdĭp luă gŭ leh anăn huĭ mpŭ kơ Aê Diê? Ya ngă drei đăm ñŭt ôh ăt kăn dưi mgao rei?
Anak mnuih kyua Aê Diê hrih mjing, grăp čô mâo ênoh yuôm msĕ sơăi wăt tơdah klei hdĭp ti lăn ala mâo pô mdrŏng pô ƀun. Ti anăp Aê Diê, amâo mâo pô arăng lăm lui ôh leh anăn jih jang dưi mpŭ mtăp mđơr. Hlei pô dlăng kơ phung ƀun hơăi mang, ktư̆ juă phung knap mñai, anăn jing phung amâo huĭ mpŭ kơ Aê Diê ôh. Klei Aê Diê Blŭ čih: “Hlei pô ktư̆ juă mnuih ƀun ƀin dlao wač kơ Pô Mjing gơ̆, ƀiădah hlei pô pap kơ mnuih ƀun ƀin mpŭ kơ Pô Mjing gơ̆” (Klei Bi Hriêng 14:31). Bi phung ƀun ăt kăn dlăng hơăi mang, bi keh amâodah dlăng grăp čô phung mdrŏng jing jhat sơăi ôh, ăt kăn duah dluih ai amâodah bi mguôp hŏng phung mdrŏng hlăm dŭm bruă soh čhuai ôh. Phung anak Aê Diê brei hdĭp luă gŭ kyua klei luă gŭ bi êdah klei huĭ mpŭ kơ Aê Diê. Hlăm klei mkăn, phung hdĭp luă gŭ bi êdah knuih hdĭp thâo mĭn hlue si hnơ̆ng čuăn doh jăk Aê Diê. Klei luă gŭ đru kơ anak mnuih amâo ngă mgao, ktưn hưn, ƀiădah ksiêm dlăng bi nik bruă mă, ksiêm dlăng êlam kơ knuih hdĭp čiăng thâo kral klei ƀai leh anăn ñĕ đuĕ. Mơ̆ng mphŭn dơ̆ng, Aê Diê brei leh kơ anak mnuih klei dưi êngiê ƀiădah anak mnuih tŭ đua klam kơ klei pô ruah. Ruah klei hdĭp ngă mgao, êbat hlue êlan ƀai, srăng amâo dưi ñĕ ôh kơ klei ƀai. Ƀiădah ruah knuih hdĭp luă gŭ leh anăn huĭ mpŭ kơ Aê Diê, srăng mdrŏng sah kơ ngăn drăp, klei arăng mpŭ leh anăn wăt klei hdĭp (êlan 4).
Hŏng klei đĭ kyar mơ̆ng bruă hâo hưn hruê anei, drei ênưih thâo klei hâo hưn kơ lu phung mdrŏng hdĭp mdrŏng sah amâo bi mĭn ôh kơ phung mkăn, lu phung mdrŏng ngă mgao, dlăng hơăi mang kơ klei kpă ênô, ktư̆ juă, ngă jhat kơ phung ƀun ƀin. Ăt mâo mơh đa đa mnuih ƀun khăp kơ ngăn drăp, ngă mgao, bi mĭn pô djăp klei thâo mĭn duah djăp hdră čiăng kơ mdrŏng hŏng êlan klah čŭn, ngă soh, kyua prăk lui hĕ knuih hdĭp leh anăn “hlŏng nao phă anăp” amâodah “tŭ klei knap mñai” (êlan 3). Diñu bi luč hĕ ênoh yuôm anak mnuih kyua Aê Diê hrih mjing.
Aê Diê čiăng kơ phung ƀuôn sang Ñu hdĭp luă gŭ leh anăn huĭ mpŭ kơ Aê Diê hlăm djăp boh klei. Khua Yang djiê leh kyua klei soh grăp čô mnuih, mdrŏng ăt msĕ si ƀun mơh, kyua amâo djŏ kyua ngăn drăp, bruă mă ôh ngă mgao. Klei thâo mơ̆ng pô čih hră Klei Bi Hriêng tơdah hdĭp luă gŭ, huĭ mpŭ kơ Aê Diê, Aê Diê srăng brei klei čiăng kơ mnơ̆ng dhơ̆ng, klei mpŭ. Hruê anei, tơdah drei hdĭp luă gŭ, huĭ mpŭ kơ Aê Diê, Ñu srăng brei kơ drei amâo djŏ knŏng klei jăk mơak hlăm klei hdĭp anei ôh ƀiădah Ñu ăt srăng brei klei jăk mơak kơ drei hlăm klei hdĭp lă lar.
Si drei hdĭp tơdah thâo ênoh yuôm sĭt mơ̆ng drei pô?
Wah lač: Ơ Aê Diê, kâo bi mni kơ Ih kyua Klei Aê Diê Blŭ mñă kơ kâo hlăm knuih hdĭp luă gŭ leh anăn huĭ mpŭ kơ Aê Diê. Akâo kơ Ih đru kâo ñĕ đuĕ kơ klei soh, hdĭp mpŭ kơ grăp čô mnuih, bi êdah klei khăp leh anăn klei kpă ênô Ih hlăm knuih hdĭp grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
