Pajlug 24:17-18
Nqe cim:
“Tsis txhob zoo siab thaum koj tus yeebncuab raug kev puastsuaj, thiab tsis txhob zoo siab thaum nws ntog.” (Pajlug 24:17)
Lus nug rau sawvdaws xav:
– Vim li cas Vajtswv cov menyuam tsis txhob zoo siab thaum yeeb ncuab raug teebmeem?
– Yog peb tsis mloog lo lus qhia no, yuav zoo li cas?
– Vajtswv qhia peb yuav tsum ua li cas rau cov yeebncuab?
Tus Tswv cov menyuam yuav tsum muaj kev zoo siab thiab ua tus Tswv tsaug rau tej koob hmoov uas tus Tswv pub thiab tau tus Tswv cawmdim, tsis txhob zoo siab thaum pom lwm tus raug txomnyem, txawm yog tus ntawd kiag yus tus yeebncuab. Tus Tswv uas paub txhua yam hauv neeg lub siab yuav pom tej kev xav tsis zoo ntawd thiab tej ntawd tsis haum Nws siab. “Tus yeebncuab” ntawm no tsis yog tsuas hais txog kev tsov rog ntawm tej haivneeg, tiamsis tseem hais txog tej kev yeeb ncuab, sib ntxub ntawm ib tug rau ib tug. Txawm yog zaj twg, los tus Tswv yeej tsis kheev Nws cov menyuam zoo siab thaum lwm tus raug txomnyem. Mauxes qhia txog tus Tswv tej lus samhwm li no: “Tsis txhob ua phem pauj rau ib leeg tus twg lossis pheej ntxub nws, tiamsis yuav tsum hlub koj tej kwvtij zejzog ib yam li koj hlub koj lub cev. Kuv yog tus TSWV” (Levis Kevcai 19:18).
Nyob hauv nqe 18, Vajntxwv Xalumoos qhia txog qhov teebmeem yog hais tias zoo siab thaum yeeb ncuab raug teebmeem: “Yog koj hnyos koj tus yeebncuab, tus TSWV yeej yuav paub; nws tsis nyiam koj ua li ntawd, thiab tej zaum nws yuav tsis rau txim rau koj tus yeebncuab”. Vajtswv tsis yog tsuas yog tus uas Ncajncees thiab Dawbhuv xwb, tiamsis Nws tseem yog tus uas muaj Kev hlub, nws txaus siab zam txim thiab tso tseg tsis rau txim. Tus Tswv saib kev hnyos thiab zoo siab thaum yeeb ncuab raug teebmeem yog ib tes haujlwm txhaum cai ua neej, yog ua li ntawd Nws yuav tsis rau txim rau cov neeg ntawd ntxiv lawm. Txhua tus tibneeg yog tus Tswv tsim los yog li Nws hlub tshua thiab khuvleej txhua tus. Tus Tswv rau txim rau tibneeg tsis yog Nws xav kom lawv nyuaj siab tiamsis Nws lub homphiaj yog pab kom lawv lees txim, tso kev txhaum tseg, kom tau txais Nws tej koob hmoov.
Vajtswv cov menyuam yuav tsum ntseeg ruaj khov hais tias Vajtswv yog tus txiav txim ncaj ncees, Nws yuav ua pauj tej yam tsis zoo uas yeeb ncuab ua rau peb (II Timautes 4:14). Peb zoo siab thaum Vajtswv txojkev ncaj ncees kovyeej, tiamsis peb tsis txhob ua pauj tsis hais los ntawm kev xav phem lossis tej haujlwm phem. Peb yuav tsum nco ntsoov hais tias kev txiav txim thiab kev ua pauj yog Vajtswv li haujlwm, tsis yog peb haujlwm. Timthawj Paulaus qhia li no: “…Vajtswv txojlus hais tias: Kuv yog tus yuav ua pauj thiab kuv yog tus yuav rau txim… Yog nej cov yeebncuab tshaib plab, nej cia li muab mov rau lawv noj; yog lawv nqhis dej, nej cia li muab dej rau lawv haus… Tsis txhob cia txojkev phem kovyeej nej, tiamsis nej yuav tsum ua zoo, nej thiaj kovyeej txojkev phem” (Loos 12:19–21). Nyob hauv txhua lub sijhawm, peb yuav tsum qhia tshwm tus Tswv txojkev ncaj ncees thiab txojkev hlub. Tsis txhob muaj leejtwg cia kev sib ntxub ua rau plam kev zoo siab thiab kev thajyeeb hauv peb lubneej. Cia li ntseeg ruaj khov rau Vajtswv txojkev ncaj ncees, thiab muab txhua yam tso plhuav rau Nws, Nws yuav saibxyuas, tsomkwm thiab pab peb.
Thov Vajtswv,
Tus Tswv, nyuam yaus ua Koj tsaug vim Koj cawm nyuam yaus dim dhau tej kev txomnyem. Thov Koj pab kom nyuam yaus ua tau lubneej ncaj ncees, sib hlub thiab paub zam txim rau tej yeebncuab zoo li Koj tau hlub thiab zam txim rau nyuam yaus lawm. Nyuam yaus tuav Yexus Khetos lub npe thov, Amees.
Peb muaj kev xav zoo licas thaum peb tej yeebncuab raug teebmeem?
Nyeem Vajluskub hauv peb lub xyoos: I Xwmtxheej Vajntxwv 15
Kênh Youtube BHKTHN:
