Klei Aê Diê Blŭ: Klei Bi Hriêng 24:17-18
Êlan kliăng: “Đăm mơak ôh tơdah pô roh ih lĕ buh, đăm brei ai tiê ih hơ̆k kdơ̆k ôh tơdah ñu têč hnêč” (Klei Bi Hriêng 24:17)
Klei êmuh ksiêm mĭn: Ya ngă phung ƀuôn sang Aê Diê đăm mơak ôh tơdah pô roh lĕ buh? Tơdah amâo gưt asăp mtô anei, si boh jhat srăng mâo? Si ngă Aê Diê mtô drei ngă hŏng pô roh?
Phung ƀuôn sang Aê Diê brei bi êdah klei mơak, bi mni kơ klei jăk mơak Aê Diê brei leh anăn mâo Aê Diê bi mtlaih ƀiădah đăm mơak ôh kyua kơ klei têč hnêč phung mkăn, wăt hŏng pô roh drei. Yêhôwa, Pô thâo jih thâo săng klă ai tiê anak mnuih srăng ƀuh knuih soh anăn leh anăn amâo mơak ôh. Phung jing “pô roh ih” amâo djŏ knŏng lač kơ klei bi blah plah wah dŭm djuê ana ôh ƀiădah lŏ mñă kơ klei bi roh, klei amâo thâo bi djŏ hjăn mnuih hŏng mnuih. Hlăm djăp boh klei, Aê Diê amâo brei ôh phung ƀuôn sang Ñu mơak kơ klei têč hnêč pô mkăn. Y‑Môis hưn leh klei Aê Diê mtă: “Đăm rŭ ênua amâodah đuôm ai ăl hŏng phung ƀuôn sang ih ôh, ƀiădah brei ih khăp kơ pô riêng gah ih msĕ si kơ ih pô. Kâo jing Yêhôwa” (Bruă Lêwi 19:18).
Hlăm êlan 18, Mtao Salômôn brei thâo kơ boh jhat bruă hơ̆k mơak tơdah pô roh lĕ buh, “huĭdah Yêhôwa ƀuh klei anăn leh anăn amâo mơak ôh, leh anăn lui amâo lŏ ăl kơ gơ̆”. Yêhôwa amâo djŏ knŏng jing Pô Kpă Ênô, Doh Jăk ôh, ƀiădah ăt jing Pô Khăp, srăng pap brei leh anăn mdei bi kmhal. Aê Diê ƀuh knuih hơ̆k mơak ti anăp klei knap mñai pô roh hŏng pô jing klei soh hŏng knuih hdĭp kyua anăn huĭdah Ñu srăng lui amâo lŏ ăl kơ gơ̆. Jih jang mnuih jing mnơ̆ng Aê Diê hrih mjing sơăi kyua anăn Ñu khăp, mđing uêñ nanao. Aê Diê bi kmhal anak mnuih amâo djŏ kyua čiăng kơ anak mnuih knap mñai ôh ƀiădah hŏng klei kñăm đru kơ anak mnuih kmhal, đuĕ mơ̆ng klei soh, čiăng dưi dưn klei jăk mơak Aê Diê brei.
Phung ƀuôn sang Aê Diê brei mâo klei đăo sĭt Aê Diê jing Pô phat kđi kpă ênô srăng rŭ ênua klei soh phung roh ngă leh kơ pô (II Y‑Timôthê 4:14). Brei drei mơak tơdah klei kpă ênô Khua Yang dưi, ƀiădah amâo dưi rông ôh klei rŭ ênua amâodah hŏng bruă ngă amâodah hŏng knuih hŏng klei mĭn jhat hlăm ai tiê. Brei hdơr klei phat kđi leh anăn klei rŭ ênua jing bruă Aê Diê amâo djŏ jing bruă drei ôh. Khua ƀĭng kna Y‑Pôl mtô: “…Klei Aê Diê Blŭ čih leh, ‘Klei rŭ ênua jing bruă Kâo; Kâo yơh srăng bi wĭt klei năng, Khua Yang lač.’ Ƀiădah ‘tơdah pô roh ih êpa, brei mnơ̆ng ƀơ̆ng huă kơ ñu; tơdah ñu mhao… Đăm brei klei jhat dưi hŏng ih ôh, ƀiădah brei klei jăk ih ngă dưi hŏng klei jhat’ ” (Rôm 12:19-21). Hlăm djăp boh klei, brei drei bi êdah nanao klei kpă ênô leh anăn klei khăp Aê Diê. Đăm mâo ôh hlei pô brei klei bi roh mă hĕ klei mơak, klei êđăp ênang hlăm klei hdĭp drei. Brei đăo kjăp hlăm klei kpă ênô Aê Diê, leh anăn jao djăp mta klei kơ Aê Diê, Ñu srăng kriê dlăng, răng mgang drei.
Si knuih drei khăng mâo tơdah pô roh drei lĕ buh?
Wah lač: Ơ Khua Yang, kâo bi mni kơ Ih đru leh kâo găn klei knap mñai. Akâo kơ Ama đru kâo hdĭp hlăm klei kpă ênô, klei khăp leh anăn thâo pap kơ phung roh kâo msĕ si Khua Yang khăp leh anăn pap brei leh kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
