Yakaunpaus 4:11-12
Nqe cim:
“Cov kwvtij, nej ib tug tsis txhob hais lus saib tsis taus ib tug. Tus uas hais lus saib tsis taus nws kwv nws tij lossis txiav txim rau nws tej kwvtij, ces yog nws saib tsis taus Vajtswv txoj kevcai.” (Yakaunpaus 4:11a)
Lus nug rau sawvdaws xav:
– Hais lus saib tsis taus lwm tus yog li cas?
– Vim li cas Vajtswv haivneeg tsis tau cai hais phem lwm tus?
– Peb kawm tau dabtsi dhau zaj kawm no?
Yakaunpaus ntuas cov ntseeg hais tias “nej ib tug tsis txhob hais lus saib tsis taus ib tug.” Lo lus “hais lus saib tsis taus” raws li hauvpaus lus Kilis yog hais txog txhua yam kev hais lus tsis zoo, xws li txob thuam neeg, ua saib tsis taus neeg, hais lus nkaug, hais phem lossis xyav lwm tus moo. Yog li ntawd, “hais lus saib tsis taus” yog xav hais tagnrho tej lus hais lossis kev ua txob thuam lwm tus. Vajtswv haivneeg yuav tsum tsis txhob ua tej yam no, tsis txhob ua kiag li!
Yakaunpaus hais txog ob qho vimchiv uas cov ntseeg ib leeg tsis txhob hais lus saib tsis taus ib leeg. Tim ib, qhov uas ua li txhaum Vajtswv txoj kevcai; rau qhov hais lus saib tsis taus lwm tus yog peb “saib tsis taus Vajtswv txoj kevcai, thuam Vajtswv txoj kevcai” yog tsis coj “raws li Vajtswv txoj kevcai” (nqe 11). Tswv Yexus tau hais sau zog lub ntsiab ntawm txoj kevcai ua ob yam, “Hlub Vajtswv – Hlub neeg” (Mathais 22:37-40). Timthawj Paulus qhia hais tias hlub lwm tus yog ua tiav Vajtswv txoj kevcai (Loos 13:6-10). Hauv txojkev sib raug zoo uas neeg ua rau neeg, Yakaunpaus tabtom hais txog nqe kevcai hauv Levis Kevcai 19:18, “yuav tsum hlub koj tej kwvtij zejzog ib yam li koj hlub koj lub cev.” Tsis muaj qhov uas hlub ib tug neeg es yus ho hais tsis zoo rau tus neeg ntawd li.
Qhov vimchiv tim ob uas Vajtswv haivneeg ib leeg tsis txhob hais lus saib tsis taus ib leeg yog vim hla Vajtswv tus cai. Yakaunpaus hais tias thaum txiav txim rau lwm tus, peb qhia tshwm tus cwjpwm tsis hwm Vajtswv tus uas tsim muaj txojcai thiab muaj cai txiav txim lub hwjchim kav (nqe 12). Thaum txiav txim rau lwm tus, tsis yog peb huas lub meejmom txiav txim xwb, tiamsis yog peb hla Vajtswv lub hwjchim lawm.
Tu siab kawg nkaus, nimno qhov uas nkaug, ib leeg hais lus phem rau ib leeg, tshwjxeeb yog hais lus thuam lwm tus yog ib yam uas muaj rawv nyob hauv ntau lub Pawg Ntseeg thiab muaj ntau leej nyiam koom tes txhawb. Qhov no yog ib hauv cov keebtiv uas ua rau muaj kev faib ua pab ua pawg, ua rau Pawg Ntseeg tsis loj hlob, tsis ua rau Vajtswv tau ntsejmuag, coj tsis tau neeg los ntseeg Txojmoo Zoo kom tau kev cawm dim. Yog Vajtswv tus menyuam, peb txhua tus yuav tsum koom tes sib txhawb los ntawm txojkev hlub, koom siab zoo li Vajtswv Txojlus qhia. Tej kev sib rhuav cia li rov txhim kho. Tej kev ib leeg hais lus phem rau ib leeg, cia li koom tes qhia tus Tswv txoj koob hmoov hlub thiab kev hlub rau ntau leej. Thov Vajtswv pab rau peb txhua tus kom paub txo hwjchim, zeem paub yus tus kheej muaj nrim tig los vamkhom tus Tswv, Vaj Ntsujplig hloov yus tus kheej kom hais tau tej lus zoo coj tus Tswv txoj koob hmoov hlub mus rau ntau leej.
Thov Vajtswv,
Vajtswv, thov Koj pub kom nyuam yaus muaj lub siab xav zoo thiab muaj Koj txojkev hlub. Kom tej uas tawm hauv nyuam yaus lub qhovncauj los yog lus zoo, ua rau muaj kev txhim kho thiab txhawb tau cov mloog lus zog. Nyuam yaus tuav Tswv Yexus lub npe thov, Amees.
Peb cheemtsum ua dabtsi kom tiv thaiv tau txojkev ib leeg hais lus saib tsis taus ib leeg hauv yus Pawg Ntseeg?
Nyeem Vajluskub hauv peb lub xyoo: Yaxayas 48
Kênh Youtube BHKTHN:
