Klei Aê Diê Blŭ: Y-Yakơ 4:11-12
Êlan kliăng: “Ơ phung ayŏng amai adei, đăm bi blŭ jhat hdơ̆ng diih ôh. Hlei pô blŭ jhat amâodah phat kđi kơ ayŏng adei ñu, blŭ jhat leh anăn phat kđi kơ klei bhiăn yơh” (Y-Yakơ 4:11a)
Klei êmuh ksiêm mĭn: Si pia blŭ jhat? Ya ngă phung đăo amâo dưi blŭ jhat ôh? Si ngă drei ngă hŏng klei mtă anei?
Y-Yakơ mtă kơ phung đăo “đăm bi blŭ jhat” ôh. Boh blŭ “blŭ jhat” hlăm klei Grek čiăng lač kơ jih jang klei blŭ jhat, msĕ si klei tăm pah, klei dlao wač, klei mưč, klei bi hêñ, klei phat kđi, blŭ jhat êkŭt tluôn pô mkăn. Snăn yơh, “blŭ jhat” tinei lač djŏ kơ boh blŭ wăt kơ knhuah blŭ čiăng bi luč knuih pô mkăn. Brei phung đăo mdei hĕ mtam bruă ngă soh anei, đăm blŭ jhat ôh!
Kyua dua mta klei snăn Y-Yakơ ghă amâo brei phung đăo bi blŭ jhat ôh hdơ̆ng găp. Tal sa, klei blŭ jhat ngă soh hŏng klei bhiăn Aê Diê, kyuadah tơdah drei bi blŭ jhat jing drei “blŭ jhat leh anăn phat kđi kơ klei bhiăn” yơh, amâo djŏ drei “gưt kơ klei bhiăn ôh” (êlan 11). Khua Yang Yêsu klah čŭn jih jang klei bhiăn hlăm dua mta klei, “Khăp kơ Aê Diê leh anăn khăp kơ mnuih” (Y-Mathiơ 22:37-40). Khua ƀĭng kna Y-Pôl lač hlei pô khăp kơ phung riêng gah ñu bi sĭt leh klei bhiăn (Rôm 13:6-10). Hlăm klei dôk dơ̆ng ƀơ̆ng huă hdơ̆ng mnuih, Y-Yakơ dôk blŭ djŏ kơ klei bhiăn čih leh hlăm Bruă Lêwi 19:18 snei: “brei ih khăp kơ pô riêng gah ih msĕ si kơ ih pô”. Amâo mâo ôh pô khăp kơ sa čô mnuih ƀiădah lŏ blŭ jhat kơ pô anăn.
Tal dua, amâo brei phung đăo bi blŭ jhat ôh hdơ̆ng găp kyuadah klei anăn ngă soh hŏng klei dưi Aê Diê. Y-Yakơ lač tơdah drei phat kđi pô mkăn, jing drei bi êdah klei amâo mpŭ kơ klei dưi Aê Diê Pô brei klei bhiăn leh anăn jing khua phat kđi yơh (êlan 12). Tơdah phat kđi pô mkăn, amâo djŏ drei knŏng lač drei mâo klei dưi – dưi ngă kơ klei hdĭp digơ̆ tui si drei čiăng ôh ƀiădah wăt drei gao hĕ klei dưi Aê Diê msĕ mơh.
Ênguôt đei, hruê anei ti krah Phung Sang Aê Diê ăt dôk mâo lu snăk klei bi kdơ̆ng, klei bi blŭ jhat, boh nik klei blŭ êkŭt kơ pô mkăn leh anăn mâo lu mnuih ư ai hŏng klei ngă anăn. Anăn yơh jing phŭn atăt truh kơ klei bi kah mbha phung, ngă kơ Phung Sang Aê Diê amâo lŏ dưi đĭ kyar, amâo dưi bi êdah klei guh kơang Aê Diê ôh, kăn dưi ktŭng hrip phung ka đăo hriê čiăng hmư̆ Klei Mrâo Mrang Jăk kơ klei bi mtlaih rei. Jing phung anak Aê Diê, brei grăp čô drei đru bi mđĭ hlăm klei khăp, mâo klei bi mguôp msĕ si Klei Aê Diê Blŭ mtă leh. Hrô kơ klei bi rai, mkŏ mjing bĕ. Hrô kơ klei bi blŭ jhat hdơ̆ng drei, brei drei sa ai hưn klei pap leh anăn klei khăp Khua Yang kơ jih jang mnuih. Akâo Khua Yang đru grăp čô drei thâo bi luă gŭ drei pô, thâo kral klei drei mâo kdriêl čiăng drei knang nanao kơ Khua Yang, akâo Yang Mngăt Jăk bi mlih drei mơ̆ng lam truh ti êngao, čiăng klei drei blŭ jing mnơ̆ng hưn klei pap Khua Yang kơ lu mnuih.
Ya drei srăng ngă čiăng mkhư̆ gang hĕ klei bi blŭ jhat hlăm Phung Sang Aê Diê?
Wah lač: Ơ Khua Yang, tuh bi bŏ bĕ ai tiê klei mĭn kâo hŏng klei pap leh anăn klei khăp Ih. Brei jih jang klei blŭ kbiă mơ̆ng ƀăng kƀông kâo jing klei blŭ jăk sơăi, mâo klei bi juh leh anăn bi mđĭ ai kơ pô dôk hmư̆. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 48
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
