Filemoos nqe 17-21
Nqe cim:
“Yog nws tau ua txhaum rau koj lossis nws tshuav koj nqi, kuv yuav them rau koj” (Filemoos nqe 18)
Lus nug rau sawvdaws xav:
– Timthawj Paulus tau siv txojkev twg los thov kom Filemoos zam txim rau Auneximus?
– Thaum poob cuabtam los pab them nqi rau Auneximus, Timthawj Paulus yuav txais tau yam dab tsi?
– Peb puas kam poob yam dabtsi los pab kom tej kwvtij rov tau sib haum xeeb?
Thaum paub tej teebmeem ntawm tus qhev khiav nkaum uas yog Auneximus thiab tus tswv uas yog Filemoos, Timthawj Paulus yeej tsis nyob twjywm. Nws tau siv txojcai phoojywg hauv Yexus Khetos los taij thov kom Filemoos zam txim thiab rov txais yuav Auneximus. Nws hais tias: “Yog li ntawd, yog koj suav hais tias kuv thiab koj, wb ob leeg puavleej ua Vajtswv tes haujlwm, koj yuav tsum rov qab txais yuav nws” (Filemoos 17). Nrog rau qhov ntawd, Timthawj Paulus paub tseeb hais tias Filemoos yog tus uas txaus siab mloog thiab ua raws li nws tej lus, Nws thiaj hais tias: “…Kuv cia siab hais tias, koj yuav ua raws li kuv thov. Tsis yog li ntawd xwb, koj tseem yuav ua ntau dua li kuv thov thiab” (nqe 21). Txawm li ntawd los, Timthawj Paulus yeej tsis yuam Filemoos, thiab nws tsis cia Filemoos raug poob ib yam dabtsi twg. Nws txaus siab them nqi rau tus qhev uas tej zaum tau ua tub sab nyiag tus tswv tug thaum khiav tawm, thiab nws cog lus yuav them tag nrho tej nqi ntawd rau Filemoos.
Nyob hauv Tswv Yexus, peb “tsuas yog tshuav nqe sib hlub” (Loos 13:8). Filemoos tau Timthawj Paulus coj los ntseeg Yexus, yog li nws yeej tshuav Timthawj Paulus ib qhov nqi kev hlub yog qhov nuj nqis ib txhis, tiamsis Timthawj Paulus yeej tsis hais txog qhov ntawd. Tus qhev khiav tawm uas yog Auneximus tsuas tshuav nqi nqaij tawv, thiab Timthawj Paulus txaus siab pab them raws li txojcai, nws tsuas xav kom Filemoos txais Auneximus rov qab. Nws thiaj hais tias: “Yog li ntawd tus kwv, wb yog ob tug uas ntseeg Vajtswv, yog koj xav ua kom haum Vajtswv siab tiag, thov koj pab kuv zaj no, kuv thiaj yuav kaj siab mentsis” (nqe 20). Zoo ib yam li tus qhev Auneximus, peb yog cov neeg txhaum uas tsim nyog raug txim tuag mus ib txhis, thiab tsis muaj leejtwg muaj tej yam lossis ua tau tej yam txaus kom tau Vajtswv zam txim. Tiamsis, Tswv Yexus tau txaus siab ris tagnrho peb tej kev txhaum rau saum Nws lub xubpwg. Nws txojkev tuag saum ntoo khaub lig yog them nuj nqis rau peb tej kev txhaum, kom peb thiaj tau txais kev zam txim, tau rov nrog Vajtswv sib raug zoo thiab tau Vajtswv txais yuav hauv Tswv Yexus Khetos.
Peb txhua tus yeej tshuav ntau yam nuj nqis uas tsis muaj peevxwm them tas, tshuav nqi tus Tswv cawmdim, tshuav nqi kev hlub, tshuav nqi cov uas coj peb los ntseeg, tshuav nqi cov uas saibxyuas thiab tu peb sab kev ntseeg,… Vim li ntawd, peb yuav tsum zam txim rau cov uas ua txhaum rau peb kom muaj kev sib haum xeeb. Tswv Yexus hais tias: “Cov uas ua rau neeg nyob sib haumxeeb, cov ntawd tau koob hmoov; Vajtswv yuav hu lawv hais tias, lawv yog Vajtswv cov menyuam!” (Mathais 5:9). Txawm peb yuav raug poob nyiaj txiag, sijhawm, thiab dag zog los pab kom cov kwv tij nkauj muam rov sib haum xeeb hauv Tswv Yexus, txawm peb yuav raug poob ntau yam los peb yeej muaj kev zoo siab thiab kaj siab thaum pom peb cov kwv tij nkauj muam sib zam txim, sib raug zoo, thiab sib hlub.
Thov Vajtswv,
Vajtswv! Nyuam yaus ua Koj tsaug rau qhov Koj twb them tag nrho nyuam yaus tej nqi kev txhaum los ntawm Koj cov ntshav. Thov pab kom nyuam yaus txaus siab poob txhua yam los ua neej zam txim, koom siab, thiab sib hlub hauv Koj. Nyuam yaus tuav Yexus Khetos lub npe thov, Amees.
Peb puas txaus siab poob txhua yam rau lwm tus kom rub sawvdaws los nyob sib haum xeeb?
Nyeem Vajluskub hauv peb lub xyoos: I Xwmtxheej Vajntxwv 19
Kênh Youtube BHKTHN:
