Klei Aê Diê Blŭ: Y‑Philêmôn êlan 17-21
Êlan kliăng: “Tơdah ñu bi msoh kơ ih, amâodah tơdah ñu đuôm nư ih, yap nư anăn jing đuôm ti kâo” (Y‑Philêmôn êlan 18)
Klei êmuh ksiêm mĭn: Mơ̆ng ya tur klei Khua ƀĭng kna Y‑Pôl kna, čiăng akâo kơ Y‑Philêmôn pap brei? Tơdah brei jih mnơ̆ng dhơ̆ng čiăng tla nư hrô kơ Y‑Ônêsim, ya klei Khua ƀĭng kna Y‑Pôl lŏ mâo?Ya klei drei srăng lui čiăng đru kơ ayŏng amai adei drei pô thâo bi djŏ?
Ti anăp boh klei hlŭn tlĕ đuĕ Y‑Ônêsim leh anăn khua Y‑Philêmôn, Khua ƀĭng kna Y‑Pôl amâo dưi ngă ngơi mang ôh. Ñu dlăng kơ tur knơ̆ng jing ƀĭng găp hlăm Khua Yang čiăng akâo kơ Y‑Philêmôn pap brei leh anăn jum Y‑Ônêsim: “Snăn tơdah ih yap kâo ƀĭng găp ih, jum bĕ ñu msĕ si ih jum kâo pô mơh” (êlan 17). Mbĭt anăn, Khua ƀĭng kna Y‑Pôl ăt thâo sĭt Y‑Philêmôn jing mnuih srăng mđing hmư̆ leh anăn hlue ngă asăp ñu, “…knang kơ klei ih srăng tŭ ư, kâo čih hră anei kơ ih, êjai kâo thâo kơ ih srăng ngă êgao hĭn kơ klei kâo lač” (êlan 21). Khădah snăn, Khua ƀĭng kna Y‑Pôl amâo mgô̆ leh anăn ăt kăn brei Y‑Philêmôn tŭ klei luč liê ôh. Ñu srăng klam nư hrô kơ hlŭn năng ai tuôm tlĕ leh mnơ̆ng khua hlăk êjai tlĕ đuĕ, leh anăn ñu ƀuăn srăng tla ênŭm kơ Y‑Philêmôn.
Hlăm Khua Yang, drei “knŏng bi đuôm klei khăp hdơ̆ng diih; kyuadah hlei pô khăp kơ pô riêng gah ñu bi sĭt leh klei bhiăn” (Rôm 13:8). Y‑Philêmôn mâo Khua ƀĭng kna Y‑Pôl atăt ñu kơ Khua Yang Yêsu kyua anăn ñu pô dôk đuôm nư Khua ƀĭng kna Y‑Pôl jing nư klei khăp, nư lă lar, ƀiădah ñu amâo lač ôh. Pô hlŭn tlĕ đuĕ Y‑Ônêsim knŏng kƀah mnơ̆ng dhơ̆ng, leh anăn Khua ƀĭng kna Y‑Pôl srăng tla brei hlue si klei bhiăn kčah, ñu knŏng čang hmăng Y‑Philêmôn tŭ jum Y‑Ônêsim, “Ơ adei, kâo čiăng mâo klei jăk jĭn mơ̆ng ih hlăm Khua Yang. Bi mđĭ bĕ ai tiê kâo hlăm Krist” (êlan 20).
Msĕ si Y‑Ônêsim, drei jing phung soh jhat năng tŭ klei djiê leh anăn amâo mâo ôh sa čô hlăm phung drei mâo sa klei amâodah ngă ya klei năng dưi mâo Aê Diê pap brei. Khădah snăn, Khua Yang Yêsu tŭ ư klam brei jih klei soh drei ti mra Ñu. Klei Khua Yang Yêsu djiê hrô ti kyâo bi kal kơ klei soh drei, kyua anăn drei mâo klei pap brei, dưi bi grăng hŏng Aê Diê, leh anăn mâo Ñu jum hlăm Khua Yang Yêsu Pô Bi Mtlaih.
Grăp čô drei mâo lu snăk nư amâo dưi tla ôh, nư klei Khua Yang bi tui, nư kơ klei bi khăp hdơ̆ng pô, nư phung atăt leh drei nao kơ Khua Yang, nư phung kriê dlăng, rông ba drei hlăm klei hdĭp mngăt… Kyua anăn, brei pap brei kơ phung ngă soh kơ pô, tŭ ư săn asei čiăng ba klei bi grăng. Khua Yang Yêsu lač: “Jăk mơak yơh phung đru brei klei êđăp ênang hdơ̆ng mnuih, kyuadah Aê Diê srăng pia diñu phung anak Aê Diê” (Y‑Mathiơ 5:9). Wăt tơdah srăng lui mnơ̆ng dhơ̆ng, hruê mmông leh anăn ai tiê čiăng bi grăng ayŏng amai adei pô hlăm Khua Yang, wăt tơdah drei tŭ klei luč liê ƀiădah mơak snăk tơdah ƀuh ayŏng amai adei pô bi pap brei, sa ai, leh anăn bi khăp.
Drei srăng săn asei kơ pô mkăn čiăng bi grăng klei amâo thâo bi djŏ mơ̆?
Wah lač: Ơ Khua Yang, kâo bi mni kơ Ih kyua Ih tla leh ênoh kơ klei soh kâo hŏng êrah Khua Yang Yêsu. Akâo kơ Ih đru kâo mâo ai tiê tŭ klei luč liê leh anăn săn asei čiăng hdĭp pap brei, sa ai, bi khăp hlăm Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
