Nkauj Quaj Ntsuag 2:8-12
Nqe cim:
“Tus Tswv yeej txiav txim siab ua kom Xi-oos tus ntxhais tus ntsayeej raug puastsuaj; nws twb muab hlua ntsuas tib zoo tas lawm; nws yeej tsis cheem nws txhais tes uas rhuav lub nroog ntawd. Tej chaw tsomfaj thiab tej ntsayeej nimno twb vau tas ua ib pawg lawm” (Nkauj Quaj Ntsuag 2:8)
Lus nug rau sawvdaws xav:
– Muab “Hlua ntsuas” yog dab tsi?
– Lo lus “Nws twb muab hlua ntsuas” muaj lub ntsiab licas?
– Vajtswv txoj hlua ntsuas tibneeg tiam no yog dabtsi?
Tus Tswv txiav txim siab yuav “…ua kom Xi-oos tus ntxhais tus ntsayeej raug puastsuaj; nws twb muab hlua ntsuas tib zoo tas lawm; nws yeej tsis cheem nws txhais tes uas rhuav lub nroog ntawd…” (nqe 8). Hlua ntsuas yog txoj hlua tshim uas siv hauv kev ua vajtse, pab tus kws ua tsev txhim tau tej ncej, tej phab ntsa sawv ntseg, tsis qaij qaug. Vajluskub pheej siv txoj hlua ntsuas los hais txog Vajtswv txojkev txiav txim rau tej tus neeg, tej haivneeg uas ua txhaum Nws txojcai, thaum tsis raws li Nws rub hlua ntsuas. Thaum tus Tswv rub hlua ntsuas, tus raug ntsuas yuav pom txog lawv tej kev txhaum thiab zeem paub kho kom tsis txhob ua lubneej zoo li qub ntxiv, yuav tsum pauv hloov. Yog tsis muaj kev pauv hloov ces tus Tswv yuav rhuav tshem povtseg thiab rov txhim kom ncaj, kom zoo.
Nyob hauv ntu Vajluskub no qhia pom hais tias, tus Tswv haivneeg tau ua txhaum lawm, lawv mus pe mlom, muaj lub siab tawv tsis lees kev txhaum, Vajtswv thiaj chim thiab ua rau “tej chaw tsomfaj thiab tej ntsayeej… vau tas ua ib pawg”, “tej roojvag puas tas vau rau hauv av, tej nqaj roojvag tsoo tawg ua tej daim” (nqe 8-9). Lub homphiaj tsis yog ua kom puastsuaj huv tibsi mus tiamsis yog muab rhuav tas mam txhim kho kom yog raws li tus Tswv txojcai. Lub nroog Yeluxalees tabtom nyob rau lub tsamthawj ntawd, thiaj ua rau muaj kev ntxhov siab thoob plaws lub tebchaws, cov neeg laus hnav ntaubtsaj zaum tsaws hauv av, tsuab hmoov av rau saum taubhau, muaj kev tshaib nqhis thoob plaws hauv lub tebchaws, “tej menyuam thiab cov menyuam mos ntog tsis nco qab tas rau ntawm tej kev hauv nroog”, muaj tej menyuam “siav yau zuj zus thiab tuag rau ntawm lawv niam lub xubntiag” (nqe 11-12). Tej ntawd yog ib yam txaus tu siab heev, ua neej nyob tsaus ntuj nti, txhua tus pom li ntawd ua rau nplooj siab hlais rhe. Vim li ntawd tus Cevlus Yelemis thiaj quaj rau nws haivneeg txog qib uas qhovmuag plooj tas, sab ntsujplig qaug zog zis thiab tu siab heev. Txhua lo lus no qhia tawm kev mob siab kawg nkaus ntawm tus hais cov lus ntawd tau ntsib vim nws pom nws haivneeg raug tus Tswv rau txim hnyav heev thaum tus Tswv rub txoj hlua ncaj ncees los ntsuas.
Niaj hnub nimno, tibneeg xwbtim txhim muaj tej kevcai txwv tus kheej kom ua zoo thiab muaj coob leej mus ntseeg raws. Tiamsis kom sawvdaws nco ntsoov hais tias, “…txhua tus puavleej ua txhaum thiab tu ncua Vajtswv lub tshwjchim lawm” (Loos 3:23), tibneeg thiaj tsis muaj tus yuav ua tau zoo txaus thiab tsis muaj peevxwm cawm tau tibneeg dim kev txhaum. Tsuas yog Vajtswv tus uas dawbhuv txoj kev hlub pub dawb thiaj pab tau tibneeg los ua neeg ncaj ncees. Dhau ntawm Phau Vajluskub pab tau tibneeg zeem paub kev txhaum, tso kev txhaum tseg thiab los txais yuav Tswv Yexus kom tau kev cawmdim. Thaum Vajtswv cov menyuam ua raws li Vajtswv kev npaj tseg hauv Tswv Yexus, lawv yuav tau Vajtswv foom koob hmoov rau lub neej tiam no thiab yuav tau nrog Vajtswv nyob ibtxhis saum ntuj Ceebtsheej.
Thov Vajtswv:
Vajtswv tus uas ncaj ncees! Thov pab nyuam yaus paub ntsuam xyuas tus kheej raws li Koj txojcai; tsis muaj lub siab tawv, tsis lwv ncauj thaum ua txhaum, tiamsis paub txo hwjchim lees kev txhaum kom tau kev zam txim ntawm Koj. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Vajluskub puas yog txoj hlua ntsuas rau peb kev ua lub neej?
Nyeem Vajluskub hauv peb lub xyoos: Henplais 9
Kênh Youtube BHKTHN:
