Klei Aê Diê Blŭ: Klei Čŏk Hia 2:8-12
Êlan kliăng: “Yêhôwa čuăn leh bi rai mnư̆ anak mniê ƀuôn Siôn; Ñu dăng leh klei mkă gơ̆, Ñu amâo kơ̆ng ôh kngan ñu kơ klei bi rai gơ̆, Ñu brei mnư̆ mgang leh anăn mnư̆ ƀuôn čŏk hia, ênguôt hnĭng mđrăm mbĭt.” (Klei Čŏk Hia 2:8)
Klei êmuh ksiêm mĭn: Ya jing “klei mkă”? Pruê̆ blŭ “Ñu dăng leh klei mkă gơ̆” si jing? Si hnơ̆ng mkă Aê Diê kơ anak mnuih ară anei ?
Yêhôwa mâo klei mĭn srăng “…bi rai mnư̆ anak mniê ƀuôn Siôn; Ñu dăng leh klei mkă gơ̆, Ñu amâo kơ̆ng ôh kngan Ñu kơ klei bi rai gơ̆…” (êlan 8). Klei mkă amâodah klei hnơ̆ng mkă jing klei yua hlăm bruă rŭ mdơ̆ng đru kơ phung rŭ mdơ̆ng kmeh, mtih djŏ si hnơ̆ng čuăn kpă, amâo bi kpleh ôh. Klei Aê Diê Blŭ khăng lač kơ klei mkă tơdah čiăng lač kơ klei Aê Diê phat kđi kơ phung, djuê ana amâo djăp hnơ̆ng čuăn Aê Diê tơdah Ñu dăng leh klei mkă. Lŏ lač jing, tơdah Aê Diê dăng leh klei mkă, mnuih srăng ƀuh klei êdu awăt pô leh anăn ƀuh amâo dưi lŏ dôk hlăm boh klei anăn ôh ƀiădah brei bi mlih, tơdah amâo mlih, Ñu srăng bi rai čiăng lŏ ngă bi djŏ hnơ̆ng čuăn.
Tinei, pô čih hră brei ƀuh phung ƀuôn sang Aê Diê hdĭp leh hlăm klei soh, kkuh kơ rup yang, ai tiê khăng amâo kmhal ôh snăn Aê Diê ngă kơ “mnư̆ mgang leh anăn mnư̆ ƀuôn čŏk hia, ênguôt hnĭng mđrăm mbĭt”, “Ƀăng jang gơ̆ klŭn leh hlăm lăn” joh leh anăn bi rai leh giê kal (êlan 8-9). Hdră kñăm amâo djŏ čiăng mdjiê jih ôh ƀiădah lŏ čiăng mkra mrâo bi djŏ hŏng hnơ̆ng čuăn Aê Diê. Yêrusalem ăt dôk hlăm boh klei snăn, kyua anăn klei ênguôt kluôm ala čar, khua mduôn dôk gŭ ti lăn ñăt kriêp, digơ̆ ƀui ƀruih lăn ti boh kŏ, klei ư̆ êpa mâo hlăm kluôm krĭng, “…phung hđeh ĭ leh anăn phung hđeh điêt djiê hwăt hlăm êlan ƀuôn”, leh anăn mâo phung hđeh “tuč ai ti đah da amĭ digơ̆” (êlan 11-12). Sa boh klei bŏ hŏng ruă êka, pap mñai snăk, ngă ruă ai tiê snăk kơ phung ƀuh klei anăn, kyua anăn Khua pô hưn êlâo Y-Yêrêmi hia pap mñai kơ djuê ana pô tơl ală amâo lŏ mngač, ai tiê mtŭk mtŭl, ai tiê ruă êka. Jih jang klei lač anăn bi êdah klei pap mñai snăk mơ̆ng pô čih găn leh kyua ƀuh ti ală mta boh klei djuê ana pô tŭ klei bi kmhal leh Yêhôwa dăng leh klei mkă.
Hruê anei, anak mnuih čŏng kčah lu hnơ̆ng mkă knuih hdĭp, klei djŏ kơ pô leh anăn iêô jak lu phung tui hlue. Ƀiădah “Kyuadah jih jang mnuih soh leh sơăi leh anăn amâo tơl mâo klei guh kơang Aê Diê ôh” (Rôm 3:23) kyua anăn hnơ̆ng čuăn anak mnuih ăt kăn kluôm ênŭm mơh, amâo dưi bi mtlaih anak mnuih mơ̆ng klei soh ôh. Knŏng Aê Diê doh jăk, khăp hơiêng brei leh hnơ̆ng mkă kơ anak mnuih hlăm Klei Aê Diê Blŭ čiăng kơ phung soh thâo klei soh pô, kmhal đăo kơ Khua Yang Yêsu čiăng mâo klei bi mtlaih, leh anăn čiăng kơ phung ƀuôn sang Ñu hdĭp hlue si hnơ̆ng čuăn Aê Diê, mâo Ñu hơêč hmưi ară anei leh anăn dưi dôk lă lar hŏng Khua Yang hlăm ƀuôn ala mtao.
Klei Aê Diê Blŭ jing hnơ̆ng mkă yuôm bhăn hĭn hlăm klei hdĭp drei mơ̆?
Wah lač: Ơ Aê Diê Kpă Ênô! Akâo kơ Ih đru kâo thâo ksiêm dlăng bi nik klei hdĭp kâo ti anăp hnơ̆ng čuăn Ih, amâo khăng ai tiê, amâo mgang ôh kơ klei soh ƀiădah bi ti gŭ pô kmhal čiăng dưi mâo klei pap brei, bi mrâo mơ̆ng Ih pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
