Pajlug 21:10-12
Nqe cim
“Vajtswv yog tus ncaj ncees, nws paub txhua yam uas nyob hauv tus neeg siab phem tsev, thiab nws yuav ua kom tus ntawd raug kev puastsuaj” (Pajlug 21:12).
Lus nug rau sawvdaws xav:
– Cov neeg siab phem muaj lub neej zoo li cas?
– Txojkev cob qhia muaj feem xyuam li cas?
– Tus uas ncaj ncees yog leejtwg?
– Peb npaj lub neej li cas rau hnub uas txiav txim thaum kawg?
Pajlug 21:10-12 qhia meej hais tias tus uas Ncaj Ncees yuav txiav txim rau cov neeg siab phem. Tus neeg siab phem lub siab zoo li daim nyiaj muaj ob sab: ib sab yog hauv nws lub siab xav ntsoov rau kev ua phem, ntshaw plias kev ua phem, nyiam ua teebmeem thiab rau lwm tus mob siab. Ib sab yog lawv kev ua neej tawm sab nraum quabyuam cov neeg uas nyob ibncig ntawm lawv. Lo lus “nrhiav nrhw txojkev ua phem” (nqe 10) yog hais txog txojkev nyiam, lawv nyiam thiab nrhiav nrhw kom tau ua phem, yog lawv tsis tau ua phem ces lawv yeej noj tsis qab, pw tsis tsaug zog li (Pajlug 4:16-17). Twb tsimnyog pab cov neeg nyob ibncig, txheebze, tiamsis lawv tseem ua phem thiab zoo siab thaum pom lwm tus raug kev txomnyem.
Hauv nqe 11, Vajntxwv Xalumoos qhia meej txog qhov tseemceeb ntawm txojkev cob qhia. Xub thawj, thaum pom tus neeg siab phem raug txim, peb yuav pom qhov sib txuas ntawm txojkev phem thiab kev rau txim (Pajlug 19:25). Raws li Xalumoos hais, cob qhia yog, tus neeg ruam yuav paub hloov thaum nws raug rau txim thiab paub yam twg yog yam zoo tsimnyog ua, yam twg phem yuav qaij deb kom ua tau neeg ntse. Tus neeg ntse yog vim muaj kev kawm, kev txawj ntse muaj ntxiv zuj zus.
Raws li txoj kevcai ncaj ncees, kev txhaum yuav tsum raug txim. Txawm yog tus neeg siab phem yuav khiav dim txojkev rau txim hauv lub ntiajteb no los lawv yuav khiav tsis dim ntawm tus uas Ncaj Ncees txojkev rau txim li (nqe 12). Raws li hauvpaus lus, lo lus Tus uas Ncaj Ncees yog pib ntawm lo lus saddip, txhais tau hais tias yog tus ua kom puastsuaj, yog tus Tswv. Tus uas Ncaj Ncees niaj hnub tsomkwm qhov zoo rau txhua tus thiab cais tawm tus Tswv haivneeg los ntawm qhov ua tib zoo saib tus neeg ua phem thiab rho tawm mus.
Hnub txiav txim zaum kawg, Vajtswv yuav muab cov neeg uas ncaj ncees thiab cov neeg siab phem cais ua ob pab. Cov neeg uas muaj lub siab hlub thiab pab lwm tus, tau Vajtswv suav hais tias yog ncaj ncees. Cov neeg uas tsis muaj kev hlub thiab tsis quav ntsej leejtwg yuav raug foom phem thiab raug txim (Mathais 25:31-46). Tswv Yexus xaus lus: “Cov neeg ntawd (siab phem) yuav raug txim mus ibtxhis li, tiamsis cov neeg ncaj ncees yuav tau txojsia ntev dhawv mus ibtxhis tsis kawg”. Thov Vajtswv ntuas peb txhua tus kom peb tsis ua txhaum rau Vajtswv, lossis yog ua txhaum lawm paub lees txim rau Vajtswv, paub ntshai Vajtswv peb thiaj yog neeg ntse. Tus ntseeg yuav tsum ua neej ncaj ncees dhau los ntawm tes haujlwm qhia tshwm kev hlub, muaj lub siab hlub tshua txog lwm tus ib yam li Vajtswv twb hlub peb lawm. Cia li npaj kom txhij mus ntsib tus Tswv ntawm lub rooj txiav txim zaum kawg, thiab mus nyob lub Ntuj Ceebtsheej uas Tswv Yexus twb mus tu tseg rau cov uas ntseeg Nws thiab ua lub neej ncaj ncees pub rau Nws.
Thov Vajtswv,
Tus Tswv uas Ncaj Ncees, thov Koj zam txim rau tej uas nyuam yaus tau ua yuam kev thiab pab kom nyuam yaus taug Koj txojkev ncaj ncees. Thov Koj qhia kom nyuam yaus paub ua neej qhia tshwm Koj txojkev ncaj ncees los ntawm tej lus hais, ua rau lwm tus. Nyuam yaus tuav Tswv Yexus lub npe thov, Amees.
Puas muaj tej yam uas peb ua tsis yog, tsis ncaj ncees, tsis muaj kev hlub cheemtsum yuav tau hloov hnub no?
Nyeem Vajluskub hauv peb lub xyoo: Khiavdim 30
Kênh Youtube BHKTHN:
