Klei Aê Diê Blŭ: Klei Bi Hriêng 21:10-12
Êlan kliăng: “Aê Diê, Pô kpă ênô ksiêm dlăng sang mnuih ƀai, leh anăn klư̆ phung ƀai hlăm klei knap mñai.” (Klei Bi Hriêng 21:12)
Klei êmuh ksiêm mĭn: Si knuih hdĭp phung ƀai? Si bruă klam klei mtô bi hriăm? Hlei jing Pô Kpă Ênô? Si diih mprăp knuih hdĭp kơ hruê phat kđi knhal tuč?
Klei Bi Hriêng 21:10-12 mñă klă Pô Kpă Ênô srăng bi kmhal phung ƀai. Ai tiê phung ƀai msĕ si prăk dua nah: nah điâo jing knuih hdĭp hlăm lam ai tiê čang hmăng ngă klei ƀai, khăp ba klei ênguôt hnĭng leh anăn klei jhat kơ phung mkăn, leh anăn nah adôk jing knuih hdĭp ngă dleh dlan kơ phung riêng gah. Boh blŭ “tluh kơ klei jhat” (êlan 10) čiăng lač kơ klei khăp, êpa mhao ngă klei ƀai, tơdah ka dưi ngă klei ƀai snăn diñu dôk amâo hơĭt, pĭt amâo ênang (Klei Bi Hriêng 4:16-17). Hrô kơ đru phung riêng gah, diñu lŏ ngă jhat, mơak tơdah ƀuh klei ênguôt hnĭng phung mkăn.
Hlăm êlan 11, Mtao Y-Salômôn mñă klă hnơ̆ng yuôm bhăn mơ̆ng klei mtô bi hriăm. Tal êlâo, tơdah phung ƀai tŭ klei bi kmhal, diñu srăng ƀuh klei bi mguôp plah wah klei ƀai leh anăn klei bi kmhal (Klei Bi Hriêng 19:25). Hlue si ñu, kyua klei mtô bi hriăm djŏ, phung mluk mgu mâo klei găl lŏ bi mĭn leh tŭ klei bi kmhal, thâo ya jing klei jăk brei ngă leh anăn ya jing klei ƀai brei ñĕ đuĕ, kyua anăn srăng jing thâo mĭn. Bi phung thâo mĭn ăt kyua mâo klei mtô bi hriăm, klei thâo ƀrư̆ đĭ hĭn.
Hlue si klei bhiăn kpă ênô, klei soh brei tŭ klei bi kmhal. Wăt tơdah phung ƀai dưi ñĕ kơ klei phat kđi mơ̆ng klei bhiăn hlăm lăn ala anei, diñu amâo dưi tlaih ôh klei bi kmhal mơ̆ng Pô Kpă Ênô (êlan 12). Hlăm klei blŭ phŭn, boh blŭ Pô Kpă Ênô mâo phŭn agha mơ̆ng boh hră saddiq, jing Pô ba klei bi rai čiăng bi doh, jing Yêhôwa. Pô Kpă Ênô răng mgang nanao klei tŭ dưn kơ êpul êya leh anăn bi doh phung ƀuôn sang Ñu hŏng hdră ksiêm dlăng bi nik sang phung ƀai leh anăn lăm lui diñu.
Hlăm hruê phat kđi knhal tuč, Aê Diê srăng kah mbha phung kpă ênô leh anăn phung ƀai jing dua êpul. Phung mâo ai tiê thâo khăp đru kơ phung riêng gah, mâo Aê Diê yap jing kpă ênô. Bi phung ngă dleh dlan, amâo mđing ôh kơ phung riêng gah srăng tŭ klei tăm pah leh anăn tŭ klei bi kmhal (Y-Mathiơ 25:31-46). Khua Yang Yêsu klah čŭn: “Leh anăn phung anăn srăng nao mŭt hlăm klei bi kmhal hlŏng lar, ƀiădah phung kpă srăng nao kơ klei hdĭp hlŏng lar.” Akâo kơ Khua Yang mñă kơ drei thâo ñĕ đuĕ kbưi mơ̆ng klei soh leh anăn kmhal klei soh mtam tơdah ngă soh, jih ai tiê hdĭp huĭ mpŭ kơ Khua Yang čiăng jing thâo mĭn. Phung đăo brei hdĭp kpă ênô hlăm klei bi êdah klei khăp, ai tiê thâo pap hŏng phung riêng gah msĕ si Khua Yang khăp leh leh anăn pap brei leh kơ drei. Brei mđing ai tiê, mprăp nao ti anăp Khua Yang hlăm hruê phat kđi knhal tuč, leh anăn dưn Ƀuôn Ala Mtao Ñu mprăp leh kơ hlei pô đăo kơ Ñu leh anăn hdĭp kpă ênô msĕ si Khua Yang.
Mâo ya bruă ngă soh, kƀah klei kpă ênô, kƀah klei khăp brei drei bi mlih mơ̆?
Wah lač: Ơ Khua Yang jing Pô Kpă Ênô, akâo kơ Ih pap brei klei soh kâo leh anăn akâo kơ Ih đru kâo êbat hlăm êlan kpă Ih. Akâo kơ Ih đru kâo bi êdah klei kpă ênô Ih hlăm klei blŭ tlao hŏng grăp čô mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
